LIGAMA lelihunyushwe ngekutsi “inkalishi” eHumushweni Lemhlaba Lomusha lingasho tincola tetinhlobo letehlukahlukene. (Imis. 8:28, 29, 38) Nobe kunjalo, kubonakala ngatsi lomTopiya bekagibele incola lenkhulu kunaleyo lesetjentiswa emphini nobe leyo lokucudzelwana ngayo. Cabanga nganati tizatfu letisenta sisho njalo.

LomTopiya bekayindvuna lebeyihambe libanga lelidze. ‘Beyisiphatsimandla lesingephansi kwaKhandase indlovukazi yaseTopiya, futsi beyinakekela yonkhe imali yakhe.’ (Imis. 8:27) ITopiya yakadzeni beyifaka ekhatsi iSudan yalamuhla kanye nencenye leseningizimu ye-Egypt yalamuhla. Nanobe kungenteka kutsi lendvodza ayizange ihambe ngencola yinye kulo lonkhe lulohambo, kungenteka beyitfwele umtfwalo. Letinye tincola lebetisetjentiswa ngaleso sikhatsi kuze tilayishe bantfu bekutinkalishi letinemasondvo lamane futsi tivalekile. Lenye incwadzi letsi Acts—An Exegetical Commentary itsi: “Letinkalishi betinesikhala lesikhulu kuze kulayishwe imitfwalo, lebekungenta labatigibele bakujabulele kuhamba ngato, futsi bantfu lebebatisebentisa bebangakhona kuhamba libanga lelidze.”

LomTopiya bekafundza ngesikhatsi kufika Filiphu. Lendzaba itsi “Filiphu wagijima eceleni kwalenkalishi, weva lendvuna ifundza incwadzi yemphrofethi Isaya ngelivi lelivakalako.” (Imis. 8:30) Tinkalishi lebetetfwala bantfu betingakakhelwa kutsi tigijime. Ngenca yekutsi letinkalishi betihamba kancane, bekungenta kutsi lendvuna ikhone kufundza futsi kwente naFiliphu akhone kugijima aze ayikhandze.

LomTopiya ‘wancenga Filiphu kutsi agibele ahlale naye.’ (Imis. 8:31) Labo lebebagibela tincola tekuncintisana bebema kuto. Kodvwa incola lelayisha bantfu beyingaba nesikhala sekutsi lendvuna kanye naFiliphu bakhone kuhlala.

Ngekuvumelana nemavi lasencwadzini yeMisebenti sehluko 8 kanye nebufakazi lobuvetwa ngumlandvo, eminyakeni yakamuva tincwadzi tetfu betiveta lomTopiya ahleti encoleni lenkhulu kunaleyo lesetjentiswa emphini nobe nakuncintiswanwa.