1. Yini leyenta kube kuhlakanipha kulungela inhlekelele?

 NANGABE sisilungele simo lesitsite, loko kungasindzisa kuphila kwetfu. Sibonelo nje, nakugadla inhlekelele bantfu lebebasilungele leso simo basematfubeni ekusindza futsi bangakhona kusita nalabanye. Lenye inhlangano leseYurophu leyetama kusita bantfu itsi: “Kutilungiselela kahle kungasindzisa kuphila.”

2. Kubaluleke ngani kutsi sikulungele kuhlupheka lokukhulu? (Matewu 24:44)

² ‘Kuhlupheka lokukhulu’ kutawucala ngekushesha. (Mat. 24:21) Kodvwa kutawehluka kuletinye tinhlekelele ngoba siyati kutsi kuyeta. Cishe eminyakeni lengu-2 000 leyendlulile, Jesu wecwayisa balandzeli bakhe kutsi balilungele lelo langa. (Fundza Matewu 24:44.) Nangabe sililungele, kutawuba melula kutsi sicinisele nalifika futsi sisite nalabanye kutsi bente kanjalo.​—Luk. 21:36.

3. Kucinisela, luvelo nelutsandvo kutasisita njani silungele kuhlupheka lokukhulu?

³ Cabanga nganati tintfo letintsatfu letitasisita kutsi sikulungele kuhlupheka lokukhulu. Sitawenta njani nasicelwa kutsi sishumayele umlayeto lomatima wesehlulelo futsi bantfu basiphikisa? (Semb. 16:21) Sitawudzinga kucinisela kuze silalele Jehova futsi setsembe kutsi utasivikela. Sitawenta njani nangabe bazalwane betfu balahlekelwa tintfo tabo nobe konkhe labanako? (Hab. 3:17, 18) Kutawudzingeka sibe neluvelo kuze sibasite ngaloko labakudzingako. Sitawenta njani nangabe kutawudzingeka kutsi sihlale endzaweni lencane nebazalwane betfu nabodzadze ngesikhatsi kuhlasela tive letihlangene? (Hez. 38:10-12) Kubatsandza kakhulu kutasisita kutsi sibeketelele lesikhatsi lesimatima.

4. LiBhayibheli likhombisa njani kutsi kufanele sichubeke sicinisela, sibe neluvelo futsi sitsandzana?

 ⁴ LiVi laNkulunkulu lisikhutsata kutsi sichubeke sicinisela, sibe neluvelo futsi sichubeke sitsandzana. Lukha 21:19 utsi: “Ngekucinisela kwenu nitawusindzisa kuphila kwenu.” KubaseKholose 3:12 utsi: “Gcokani luvelo.” Kantsi 1 KubaseThesalonika 4:9, 10 utsi: “Nifundziswa nguNkulunkulu kutsi nitsandzane. . . . Kodvwa sinikhutsata ngalokugcwele kutsi nichubeke nikwenta.” Onkhe lamavesi bekabhalelwe emaKhristu lebekavele akukhombisile kucinisela, luvelo kanye nelutsandvo. Nanobe kunjalo, bekufanele achubeke atenta letintfo. Natsi kufanele sente lokufanako. Kuze sikhone kukwenta loku, sitawucoca ngekutsi lamaKhristu ekucala abukhombisa njani lobuntfu ngabunye. Sitawubese sicoca ngekutsi singawalingisa njani lamaKhristu, lokutawusenta sikhombise kutsi sikulungele kuhlupheka lokukhulu.

5. EmaKhristu ekucala acinisela njani nakabhekana netinkinga?

⁵ EmaKhristu ekucala bekufanele acinisele. (Heb. 10:36) Ngetulu kwekuba netinkinga bantfu labanyenti lebebanato, lamaKhristu bekaphindze abe naletinye tinkinga. Linyenti lawo beliphatfwa kabi, hhayi nje kuphela baholi benkholo yemaJuda netiphatsimandla letingemaRoma kodvwa bewaphatfwa kabi nayimindeni yawo. (Mat. 10:21) Ngetulu kwaloko, ngaletinye tikhatsi ebandleni bekudzingeka alwisane nemoya wetihlubuki kanye netimfundziso tato lebetehlukanisa libandla. (Imis. 20:29, 30) Nanobe kunjalo, lamaKhristu acinisela. (Semb. 2:3) Kanjani? Acabangisisa ngetibonelo talabanye labacinisela lokukhulunywa ngabo eBhayibhelini, njengaJobe. (Jak. 5:10, 11) Athantaza acela emandla. (Imis. 4:29-31) Achubeka akhumbula kutsi Jehova utawabusisa nangabe acinisela.​—Imis. 5:41.

6. Yini loyifundzako kuloko Merita lakwenta kuze acinisele?

⁶ Natsi singacinisela nangabe sihlale sifundza ngetibonelo talabacinisela lokukhunywa ngabo eVini laNkulunkulu nasetincwadzini tetfu futsi sicabangisise ngato. Ngekwenta njalo, lomunye dzadze lokutsiwa nguMerita wase-Albania wakhona kubhekana nekuphikiswa lokuhambisana nebudlova. Utsi: “Ngatsintseka kakhulu nangifundza ngendzaba yaJobe eBhayibhelini. Wabhekana netinkinga letimatima kakhulu, bekangati nekutsi tibangelwa yini. Nanobe kunjalo watsi: ‘Ngitawuze ngife solo ngingakabulahli bucotfo bami!’ (Jobe 27:5) Ngacabanga ngekutsi tinkinga tami betitincane kakhulu kunetaJobe. Bekangati kutsi tibangelwa yini, kodvwa mine bengati.”

7. Ngisho nobe site tinkinga letinkhulu nyalo, yini lokufanele sitifundzise kuyenta?

⁷ Lokunye lokungasisita kuze sicinisele kutsi sihlale sithantaza kuJehova simtjele konkhe lokusikhatsatako. (Fil. 4:6; 1 Thes. 5:17) Mhlawumbe nyalo awukabhekani nenkinga lenkhulu. Nobe kunjalo, uyasicela yini sicondziso saJehova nangabe utfukutsele, udidekile nobe ungati kutsi kufanele wenteni? Nangabe uhlale uthantaza kuNkulunkulu kuze akusite ngetintfo letincane letikukhatsatako tamalanga onkhe, kutawuba melula kutsi wente kanjalo ngisho ubhekana netinkinga letinkhulu esikhatsini lesitako. Nawenta njalo, utawuciniseka kutsi yena uyati kutsi akusite nini nekutsi kanjani.​—Hla. 27:1, 3.

8. Sibonelo saMira sikhombisa njani kutsi kubeketelela tinkinga lamuhla kungasisita nasibhekana netinkinga esikhatsini lesitako? (Jakobe 1:2-4) (Buka nesitfombe.)

⁸ Manyenti ematfuba ekutsi sikhone kucinisela esikhatsini lesitako ngekuhlupheka lokukhulu nangabe kwanyalo sicinisela nasinetinkinga. (Rom. 5:3) Sisho ngani? Bazalwane nabodzadze labanyenti babonile kutsi njalo nabacinisela nabanetinkinga, loko kuyabasita  kutsi bacinisele nababhekana nenkinga lelandzelako. Kucinisela kubaniketa emandla, kwenta betsembe kakhulu kutsi Jehova ukulungele kubasita nekutsi uyafuna kubasita. Ngetulu kwaloko, kukholwa kubasitile kutsi bacinisele nababhekana nalenye inkinga. (Fundza Jakobe 1:2-4.) Mira lolihlahlandlela e-Albania ubonile kutsi kucinisela nakabhekene netinkinga esikhatsini lesendlulile kumsitile kutsi achubeke acinisela. Uyavuma kutsi ngaletinye tikhatsi uva shengatsi nguye yedvwa lonetinkinga letinyenti. Kodvwa ubese ukhumbula loko Jehova lamentele kona kuleminyaka lengu-20 leyendlulile kuze amsite. Ngako ubese uyacabanga utsi: ‘Hlala wetsembekile. Ungavumi kutsi yonkhe leminyaka umkhonta kanye netintfo lakusite kuto kuhambe nemfula.’ Nawe ungacabanga ngendlela Jehova lakusite ngayo kutsi ucinisele. Ciniseka kutsi njalo nawubeketelela inkinga, yena uyabona futsi utakubusisa. (Mat. 5:10-12) Nakucala kuhlupheka lokukhulu, utawube sewukufundzile kucinisela futsi utawutimisela kuchubeka ucinisela.

9. Libandla lase-Antiyokhi yaseSiriya, lalukhombisa njani luvelo?

⁹ Cabanga ngaloko lokwenteka kumaKhristu aseJudiya ngesikhatsi kuba nendlala lenkhulu. Ngemuva kwekutsi libandla lase-Antiyokhi yaseSiriya live ngalendlala, labavela bazalwane baseJudiya. Ngako lenta lokutsite kuze libasite. ‘Lavumelana kutsi nguloyo naloyo atfumele loko langakukhona kuze kusitwe bazalwane baseJudiya.’ (Imis. 11:27-30) Nanobe labazalwane lebebahlaselwe ngulendlala bebahlala khashane, lamaKhristu ase-Antiyokhi bekatimisele kubasita.​—1 Joh. 3:17, 18.

10. Ngutiphi letinye tindlela lesingakhombisa ngato kutsi siyabavela bazalwane betfu nabodzadze nakuvele sehlakalo? (Buka nesitfombe.)

¹⁰ Natsi lamuhla singalukhombisa luvelo nasiva ngebazalwane betfu nabodzadze labatsintfwe sehlakalo. Singasukumela etulu, mhlawumbe ngekutsi sibute labadzala belibandla kutsi kukhona yini lasingasita khona, sinikele emsebentini wemhlaba wonkhe, nobe sithantazele labo labatsintfwe ngulesehlakalo. b (Taga 17:17) Sibonelo nje, nga-2020, kwaba nemaKomidi Ekusita Nakuvele Tehlakalo langetulu kwa-950 emhlabeni wonkhe lebekasita labo bebadzinga lusito ngesikhatsi se-COVID-19. Kufanele sibabonge labo labasitako nakuvela tehlakalo. Ngenca yekutsi labazalwane bayabavela bazalwane babo nabodzadze, bamikise tintfo labatidzingako, babasita kutsi bachubeke bakhonta Jehova, kantsi kuletinye timo, balungisa nobe bakha kabusha emakhaya abo netindzawo tekukhontela Nkulunkulu.​—Catsanisa na-2 KubaseKhorinte 8:1-4.

11. Simdvumisa njani Babe wetfu wasezulwini nasikhombisa luvelo?

¹¹ Nasikhombise luvelo ngemuva kwesehlakalo, labanye bayakubona loko lesikwentako. Sibonelo nje, nga-2019 Siphepho Lesikhulu lokutsiwa nguDorian sabhidlita liHholwa leMbuso eBahamas. Njengobe bazalwane betfu bakha kabusha lelihholwa, babuta lomunye umnikati wenkapani yekwakha longasuye Fakazi kutsi kungaba ngumalini kwenta lomunye umsebenti lebewudzingeka. Lomnikati walenkapani watsi: “Ngingatsandza kunikela ngemathulusi . . . ngetisebenti nangaletinye tintfo lenitidzingako tekwakha. . . . Loku ngikwentela inhlangano yenu. Kuyangijabulisa kubona loko lenikwentela lenikholwa nabo.” Bantfu labanyenti emhlabeni abamati Jehova. Kodvwa linyenti labo liyakubona loko BoFakazi BaJehova labakwentako. Sijabula kakhulu nasibona kutsi nasikhombisa labanye luvelo,  loko kungenta bantfu bafune kwati lokunyenti ngaJehova ‘lonesihawu lesikhulu’!​—Ef. 2:4.

12. Kukhombisa luvelo lamuhla kungasilungiselela njani kuhlupheka lokukhulu? (Sembulo 13:16, 17)

¹² Yini letawenta kudzingeke kutsi sikhombise luvelo ngekuhlupheka lokukhulu? LiBhayibheli likhombisa kutsi labo labangeke babasekele bohulumende balelive batawubhekana netinkinga nyalo nasesikhatsi lesitako. (Fundza Sembulo 13:16, 17.) Kungenteka bazalwane betfu nabodzadze badzinge lusito kuze batfole tintfo labatidzingako kuze baphile. Shengatsi ingatsi nayifika iNkhosi yetfu Jesu Khristu kuze itawehlulela isitfole sikhombisa luvelo futsi isimeme kutsi ‘sitewudla lifa lembuso.’​—Mat. 25:34-40.

13. Njengobe kuvetwe embhalweni waKubaseRoma 15:7, yini emaKhristu ekucala layenta kuze atsandzane kakhulu?

¹³ Bonkhe bantfu bebati kutsi emaKhristu ekucala bekatsandzana. Kodvwa bekumelula yini kutsi atsandzane? Libandla laseRoma belinemaKhristu langafani. Ngetulu nje kwekuba nemaJuda lebakakhuliswe ngeMtsetfo waMosi, bekuphindze kube nebantfu betive lebebabakhuliswe ngendlela leyehlukile. Kungenteka lamanye emaKhristu bekatigcili kantsi lamanye bekangasiwo, kungenteka nekutsi lamanye bekanetigcili. Yini lamaKhristu layenta kuze achubeke atsandzana ngisho nobe bekangafani? Umphostoli Pawula wawakhutsata kutsi ‘emukelane.’ (Fundza KubaseRoma 15:7.) Bekasho kutsini? Ligama lelihunyushwe ngekutsi ‘kwemukelana’ lisho kungenisa lotsite, kungaba kumngenisa ekhaya lakho nobe kumenta abe yincenye yebangani bakho. Sibonelo nje, Pawula watjela Filemoni kutsi amemukele njani Onesimuse lebekasigcila lesibalekile, nakatsi: “Memukele ngemusa.” (Flm. 17) Phrisila na-Akhwila bemukela Apholosi, lebekati lokuncane ngebuKhristu kunabo ngekutsi ‘bamtsatse bamchazele kahle indlela yaNkulunkulu.’ (Imis. 18:26) LamaKhristu akazange avume kutsi lokungafanani kubange tinkinga emkhatsini wawo, kunaloko emukelana.

14. Anna nendvodza yakhe balukhombisa njani lutsandvo?

¹⁴ Natsi singakhombisa kutsi siyabatsandza bazalwane betfu nabodzadze ngekutsi sibente bangani betfu. Ngalokuvamile nasenta njalo, nabo batawukhombisa kutsi bayasitsandza. (2 Khor. 6:11-13) Cabanga ngalokwenteka ku-Anna nendvodza yakhe. Ngekushesha nje nabefika esabelweni sabo lesisha eWest Africa batitfunywa telivangeli, kwacala i-COVID-19. Bebangakhoni kuya matfupha emihlanganweni yelibandla. Laba labashadene, bebatawukhombisa njani kutsi bayabatsandza bazalwane babo nabodzadze? Basebentisa tintfo tebuchwephesha kuze bachumane nabo futsi babatjela kutsi bebafuna mbamba kubati kancono. Loko labakwenta kwayitsintsa kakhulu imindeni kulelibandla, futsi yabese icala kubashayela nekubatfumelela imilayeto. Yini leyenta laba labashadene batsatsa sinyatselo kucala? Anna utsi: “Angeke ngibakhohlwe bazalwane nabodzadze labakhombisa mine nemndeni wami lutsandvo ngetikhatsi letimatima naletimnandzi. Sibonelo sabo sangikhutsata kutsi ngibakhombise lutsandvo labanye.”

15. Yini loyifundza esibonelweni saVanessa ngekutsandza bonkhe bazalwane betfu nabodzadze? (Buka nesitfombe.)

¹⁵ Linyenti letfu lisemabandleni lanebazalwane nabodzadze labakhule ngetindlela letingafani futsi labanebuntfu lobungafani. Singachubeka sibatsandza bonkhe ngekutsi sinake buntfu babo lobuhle. Lomunye dzadze waseNew Zealand lokutsiwa nguVanessa utsi bekakutfola kumatima kuvana nalabanye ebandleni.  Kodvwa kunekutsi atehlukanise nebantfu labanebuntfu langabutsandzi, wancuma kucitsa sikhatsi lesinyenti nabo. Kwenta njalo kwamsita wabona loko Jehova lakutsandzako kubo. Utsi: “Njengobe umyeni wami angumbonisi wesigodzi, sivame kuba ndzawonye nebazalwane nabodzadze labanyenti labanebuntfu lobungafani futsi ngikutfola kumelula kuvana nabo. Nyalo sekuyangijabulisa kutsi bazalwane betfu nabodzadze behlukahlukene. Kusebaleni kutsi naJehova uyakutsandza loko, ngobe uvumele bantfu labehlukahlukene kutsi bamkhonte.” Nasifundza kubuka labanye ngendlela Jehova lababuka ngayo, sisuke sikhombisa kutsi siyabatsandza.​—2 Khor. 8:24.

16. Yini letawenta lutsandvo lubaluleke ngekuhlupheka lokukhulu? (Buka nesitfombe.)

¹⁶ Lutsandvo lutawubaluleka kakhulu ngekuhlupheka lokukhulu. Nakucala kuhlupheka lokukhulu, sitasitfolaphi sivikelo? Naka naku Jehova latjela bantfu bakhe kutsi bakwente nakuhlaselwa iBhabhulona ngesikhatsi sasendvulo. Watsi: “Hambani bantfu bami niyongena emakamelweni enu langekhatsi, nivale iminyango ngemuva kwenu. Bhacani sikhashana kuze kwendlule lulaka lwami.” (Isa. 26:20) Kubonakala ngatsi lamavi atawusebenta ngesikhatsi sekuhlupheka lokukhulu. Kusenekwenteka ‘lamakamelo’ asho emabandla lesikuwo. Ngekuhlupheka lokukhulu, sitawutfola sivikelo Jehova lasetsembisa sona nangabe sihlala simunye nebazalwane betfu nabodzadze. Ngako kufanele sisebente kamatima nyalo kuze sibatsandze, singenti ngatsi siyabatsandza. Kusenekwenteka kutsi kusindza kwetfu kutawuya ngekutsi siyakwenta yini loko!

17. Yini lesitawukhona kuyenta ngekuhlupheka lokukhulu nasitilungiselela nyalo?

¹⁷ “Lilanga laJehova lelikhulu” litawubangela kuhlupheka lokukhulu kubo bonkhe bantfu. (Zef. 1:14, 15) Ngisho nebantfu baJehova batawubhekana nabo lobumatima. Kodvwa nangabe sitilungiselela nyalo, sitawukhona kuba nemoya lophansi futsi sisite labanye. Sitawucinisela ngisho singabhekana nayiphi inkinga. Nakwenteka bazalwane betfu nabodzadze behlelwa ngunobe nguyiphi inkinga, sitawenta konkhe lesingakwenta kuze sibasite ngekutsi sibakhombise luvelo futsi sibasite ngetintfo labatidzingako. Ngetulu kwaloko, nasifundza kutsandza bazalwane betfu nabodzadze nyalo sitawukhona kukhombisa kutsi siyabatsandza nasesikhatsini lesitako. Nasenta njalo, Jehova utawubese usibusisa ngekuphila lokuphakadze emhlabeni lote tehlako futsi sitakukhohlwa konkhe kuhlupheka.​—Isa. 65:17.