Nicolas naCéline babhekana nenkinga leyehlukile. Bemukela sabelo labasinikwa lihhovisi leligatja laseFrance sekutsi batfutsele ebandleni lelisha. Batsi: “Ekucaleni besijabule kakhulu, kodvwa sabese sicala kukhumbula bangani betfu. Besisengakabetayeli bazalwane nabodzadze kulelibandla lelisha.” a Ngenca yekutsi kungaba matima kutfutsela ebandleni lelisha, yini longayenta kuze ujabule futsi wente lokunyenti emsebentini waJehova? Yini labanye labangayenta kuze basite? Ungabakhutsata njani labanye ebandleni lelisha futsi nabo bangakukhutsata njani?

TIMISO LETINE LETINGAKUSITA KUZE UBHEKANE NALENKINGA

1. Yetsembela kuJehova. (Hla. 37:5) Kazumi, waseJapan, washiya libandla lebekakulo iminyaka lengu-20 ngesikhatsi indvodza yakhe itfola umsebenti kulenye indzawo. ‘Wamvumela njani Jehova kutsi amhole’? Utsi: “Ngatfulula sifuba sami kuJehova, ngamtjela kutsi bengesaba, ngitiva ngingedvwa futsi ngicindzetelekile. Ngaso sonkhe sikhatsi nangithantaza, bekanginiketa emandla lebengiwadzinga.”

Yini longayenta kuze umetsembe kakhulu Jehova? Njengobe nesitjalo sidzinga emanti nemhlabatsi lovundzile kuze sikhule, natsi kudzingeka sikunake kukholwa kwetfu kuze kukhule. Nicolas lesike sakhuluma ngaye utsi kucabangisisa ngesibonelo sa-Abrahama, saJesu nesaPawula, lokungemadvodza latidzela kakhulu kuze ente intsandvo yaNkulunkulu kumente waciniseka kakhulu kutsi Jehova utamsekela. Kuhlale utidadishela liBhayibheli  kutakusita kutsi ubhekane nanobe nguluphi lushintjo lolwenteka ekuphileni kwakho futsi utawufundza tintfo longatisebentisa kuze ukhutsate bazalwane bakho nabodzadze ebandleni lelisha.

2. Ungacatsanisi libandla lokulo nalelo losuka kulo. (Shu. 7:10) Jules kwadzingeka etayelane nemasiko lamasha nakesuka eBenin aya eMelika. Utsi: “Bengicabanga kutsi bekufanele ngicocele wonkhe muntfu lengihlangana naye ngemphilo yami.” Ngenca yekutsi indlela yekuphila beyehlukile kunaleyo bekayetayele, wacala kutehlukanisa nebazalwane bakhe nabodzadze ebandleni. Kodvwa ngemuva kwekubati kahle bazalwane bakhe nabodzadze wayishintja indlela bekacabanga ngayo. Utsi: “Sengibonile kutsi nobe ungaya kuphi lamhlabeni, bantfu bayafana. Bamane nje bakhulume nobe bente ngendlela lengafani. Kubalulekile kwemukela bantfu njengobe banjalo.” Ngako kugweme kucatsanisa libandla lelisha nalelo losuka kulo. Kunjengobe lomunye dzadze lolihlahlandlela lokutsiwa ngu-Anne-Lise asho nakatsi: “Angizange ngitfutse kuze ngitfole loko lengakushiya lapho ngisuka khona. Ngatfutsa kuze ngifundze tintfo letinsha.”

Labadzala belibandla nabo kufanele bakugweme kucatsanisa libandla lelisha nelibandla labasuka kulo. Akusiko kubi kwenta tintfo ngendlela leyehlukile. Kukuhlakanipha kwati timo telibandla ngaphambi kwekutsi uvete imibono yakho. (Shu. 3:1, 7b) Kukahle kakhulu kuhola ngesibonelo kunekutsi ufune tintfo tentiwe ngendlela yakho.​—2 Khor. 1:24.

3. Hlale umatasa ebandleni lesewukulo. (Fil. 1:27) Kutfutsela kulenye indzawo kudzinga sikhatsi lesinyenti nemandla, kodvwa kubaluleke kakhulu kutsi ube khona emihlanganweni yelibandla, nakungenteka ube khona matfupha kusukela nje ufika kulendzawo. Kudzingeka kutsi bazalwane bakho nabodzadze bahlale bakubona kuze bative basondzelene nawe futsi bakhone kukusita. Lucinda lowatfutsela edolobheni lelikhulu eSouth Africa akanye nemadvodzakati akhe lamabili utsi: “Bangani bami bangitjela kutsi kufanele ngente konkhe lokusemandleni ami kuze ngisondzelane nebazalwane bami nabodzadze ebandleni, ngisebente nabo emsebentini wekushumayela futsi ngiphendvule emihlanganweni yelibandla. Saphindze savula likhaya letfu kutsi kwentiwe khona umhlangano wangaphambi kwekuyoshumayela.”

Kwenta imisebenti leminyenti ebandleni nebazalwane bakho nabodzadze kutakusita ucinise kukholwa kwakho kanye nekwalabanye. Anne-Lise, lesike sacoca ngaye wakhutsatwa ngulabadzala belibandla kutsi etame kushumayela nabo bonkhe bamemeteli ebandleni. Waba yini umphumela? Utsi: “Ngabona kutsi lena bekuyindlela lekahle kakhulu yekutiva uyincenye yelibandla.” Ngetulu kwako konkhe, kwenta imisebenti letsite ebandleni lefaka ekhatsi kuhlanta liHholwa leMbuso kanye nekulinakekela kutawukhombisa bazalwane bakho nabodzadze kutsi sewutiva usekhaya. Nawuchubeka wenta imisebenti ebandleni, bazalwane  bakho nabodzadze batakwemukela futsi utawuva kutsi lona ngumndeni wakho.

4. Yakha bangani labasha. (2 Khor. 6:11-13) Kunaka bantfu kuyindlela lekahle kakhulu yekwakha bangani, ngako tinikete sikhatsi ngaphambi kwekutsi kucale imihlangano nangemuva kwayo kuze ucoce nalabanye futsi ubati. Yetama kwati emagama abo. Kukhumbula emagama ebantfu futsi ube nebungani kutakwenta kutsi labanye basondzelane nawe futsi nakanjani nitawugcine nibangani.

Kunekutsi ukhatsateke ngekutsi bayakwemukela yini, vumela bazalwane bakho nabodzadze bakwati kutsi ungumuntfu lonjani. Yenta naku lokwashiwo nguLucinda, watsi: “Nyalo sinebangani ngobe kwaba ngitsi lesacale samema bantfu kutsi bete ekhaya letfu.”

“YEMUKELANANI”

Labanye kungabesabisa kungena eHholweni leMbuso leligcwele bantfu labangabati. Ngako yini longayenta kuze kube melula ngalabo labatfutsele ebandleni lelisha? Umphostoli Pawula wasikhutsata watsi “yemukelanani, njengobe nje naKhristu anemukela.” (Rom. 15:7) Nabalingisa Khristu, labadzala belibandla bangasita labo labafikako kutsi bative basekhaya. (Buka libhokisi lelitsi “ Yini Letakusita Kutsi Kuhambe Kahle Njengobe Utfutsela Kulelinye Libandla?”) Nanobe kunjalo, bonkhe ebandleni lokufaka ekhatsi bantfwana bangabasita labo labefikako kutsi bative bemukelekile.

Kwemukela labanye kufaka ekhatsi kubamema ekhaya lakho futsi ubasite ngetintfo labatidzingako. Sibonelo nje, lomunye dzadze wasebentisa sikhatsi sakhe kuze aye edolobheni nalomunye dzadze lebekefika kulendzawo futsi wamchazela nekutsi tintfo tekuhamba temphakatsi tisebenta njani. Lodzadze kwamtsintsa kakhulu loko futsi kwamsita kutsi atayelane nalendzawo.

LITFUBA LEKUKHULA

Njengobe intsetse ikhula, isuka sikhumba tikhatsi letinyenti ngaphambi kwekutsi ikhone kundiza. Ngendlela lefanako, nawutfutsela ebandleni lelisha  kufanele ususe nobe ngukuphi kukhatsateka lonako kuze ukhone kwenta lokunyenti emsebentini waJehova. Nicolas naCéline batsi: “Kutfutsela kulenye indzawo kuyakucecesha. Kuze sikhone kwetayelana nebantfu labasha kanye nendzawo leyehlukile kwadzingeka sibe nebuntfu lobusha.” Nakakhuluma ngekutsi umndeni wakhe wasitakala njani, Jean-Charles lesike sacoca ngaye ekucaleni utsi: “Lolushintjo lwente kutsi bantfwana betfu bavutfwe futsi basondzelane naJehova. Ngemuva nje kwetinyanga letimbalwa, indvodzakati yetfu yacala kubeka tinkhulumo emhlanganweni losekhatsi neliviki kantsi indzodzana yetfu yaba ngummemeteli longakabhajatiswa.”

Kutsiwani nangabe timo tingakuvumeli kutsi utfutsele kulelinye libandla, mhlawumbe lelinesidzingo lesikhulu sebamemeteli? Kungakusita kutsi utsatse libandla lokulo ngatsi lisha ngekutsi wetame kwenta letinye taletintfo lesesicoce ngato kulesihloko. Njengobe wetsembela kuJehova, chubeka uba matasatasa ebandleni lokulo ngekutsi uhlele kusebenta nalabanye emsebentini wekushumayela, wakhe bangani labasha futsi ube ngumngani loncono kulabo lonabo. Mhlawumbe ungabasita ngalabakudzingako labo labasandza kufika ebandleni nobe labeswele. Njengobe sibonakala ngelutsandvo kutsi singemaKhristu eliciniso, kusita labanye kungakusondzeta kakhulu kuJehova. (Joh. 13:35) Ungaciniseka kutsi “Nkulunkulu uyajabula ngeminikelo lenjalo.”​—Heb. 13:16.

Ngisho nobe tikhona tinkinga, emaKhristu lamanyenti akujabulele kutfutsela kulelinye libandla, futsi nawe ungakhona! Anne-Lise utsi: “Kutfutsela kulelinye libandla kungente ngati bazalwane nabodzadze labanyenti.” Nyalo Kazumi uyaciniseka ngekutsi nawutfutsela kulelinye libandla, “Jehova utakusita ngetindlela lebewungaticabangi.” Utiva njani Jules? Utsi: “Bangani lesenginabo nyalo bangisitile kutsi ngitive ngisekhaya. Sengitiva ngiyincenye yelibandla futsi sekungaba matima kushiya lelibandla lengikulo.”