Imibuto Levela Kubafundzi
Ngubani ‘lomfati’ lokukhulunywa ngaye ku-Isaya 60:1, futsi ‘usukuma’ njani ‘akhanyise’?
Isaya 60:1 utsi: “Sukuma wena mfati, khanya ngobe kukhanya kwakho sekufikile. Inkhatimulo yaJehova iyakukhanyisa.” Lendzaba ikhombisa kutsi ‘lomfati’ bekuyiSiyoni nobe iJerusalema lebekuyinhlokodolobha yakaJuda ngaleso sikhatsi. (Isa. 60:14; 62:1, 2) Lelidolobha limelela sonkhe lesive. Emavi a-Isaya aphakamisa imibuto lemibili: Wekucala, iJerusalema ‘yasukuma’ nini futsi kanjani kuze ikhanyise? Wesibili, lamavi a-Isaya agcwaliseka ngelizinga lelikhulu yini lamuhla?
IJerusalema ‘yasukuma’ nini futsi kanjani kuze ikhanyise ngendlela lengumfanekiso? IJerusalema nelithempeli kwasala kutindzala njengobe emaJuda bekatfunjwe eBhabhulona iminyaka lengu-70. Kodvwa ngemuva kwekutsi iBhabhulona incotjwe ngemaMediya nemaPheresiya, ema-Israyeli lebekahlala eMbusweni waseBhabhulona besekakhululekile kubuyela eveni lawo futsi abuyisele kukhonta kweliciniso. (Ezra 1:1-4) Ema-Israyeli letsembekile akuto tonkhe tive letingu-12 lasele abuyela ekhaya nga-537 B.C.E. (Isa. 60:4) Acala kwentela Jehova imihlatjelo, agubha imikhosi futsi akha kabusha lithempeli. (Ezra 3:1-4, 7-11; 6:16-22) Inkhatimulo yaJehova yaphindze yakhanya eJerusalema, yakhanyisela bantfu bakhe. Labantfu babese bakhanyisela tive lebetingamati Jehova, batikhanyisela ngendlela lengumfanekiso.
Nobe kunjalo, tiphrofetho ta-Isaya letimayelana nekubuyiselwa atizange tigcwaliseke ngalokuphelele eJerusalema. Ema-Israyeli lamanyenti awazange achubeke amlalela Nkulunkulu. (Neh. 13:27; Mal. 1:6-8; 2:13, 14; Mat. 15:7-9) Ngekuhamba kwesikhatsi, aze ala ngisho naMesiya, lokunguJesu Khristu. (Mat. 27:1, 2) IJerusalema nelithempeli kwaphindze kwabhujiswa nga-70 C.E.
Jehova bekashito kutsi loku kutawenteka. (Dan. 9:24-27) Kusebaleni kutsi bekungasiyo injongo yakhe kutsi iJerusalema itigcwalise ngalokuphelele letiphrofethi letimayelana nekubuyiselwa letiku-Isaya sehluko 60.
Lamavi a-Isaya agcwaliseka ngelizinga lelikhulu yini lamuhla? Yebo, kodvwa loku kwenteka kumfati longumfanekiso, ‘lokuyiJerusalema lesetulu.’ Umphostoli Pawula wabhala ngaye watsi: ‘Ungumake wetfu.’ (Gal. 4:26) IJerusalema lesetulu yincenye lesezulwini yenhlangano yaNkulunkulu leyakhiwa tidalwa letetsembekile letingumoya. Bantfwana bayo nguJesu kanye nemaKhristu lagcotjwe ngemoya langu-144 000, lanelitsemba lekuphila ezulwini njengaPawula. EmaKhristu lagcotjiwe akha “sive lesingcwele,” “lokungu-Israyeli waNkulunkulu.”—1 Phet. 2:9; Gal. 6:16.
IJerusalema lesetulu ‘yasukuma’ futsi ‘yakhanyisa’ njani? Loko yakwenta isebentisa bantfwana bayo labagcotjiwe. Naka kutsi lokwenteka kubo kufana njani nalokwashiwo ku-Isaya sehluko 60.
EmaKhristu lagcotjiwe kwadzingeka ‘asukume’ ngobe bekasebumnyameni lobungumfanekiso ngesikhatsi kwandza tihlubuki ngemuva kwekufa kwebaphostoli. (Mat. 13:37-43) Ngaleyo ndlela atfunjwa yiBhabhulona Lenkhulu, lokungumbuso wemhlaba wenkholo yemanga. Labagcotjiwe bachubeka batfunjiwe kwaze kwaba ‘sekupheleni kwalelive,’ lokusikhatsi lesacala nga-1914. (Mat. 13:39, 40) Ngekushesha ngemuva kwaloko, nga-1919, lamaKhristu akhululwa futsi acala kukhanyisela bantfu ngekutsi ashumayele ngekutimisela. a Kuleminyaka, bantfu labavela kuto tonkhe tive sebasekukhanyeni, lokufaka ekhatsi labo labasele labakha Israyeli waNkulunkulu, ‘lokungemakhosi’ lokukhulunywa ngawo ku-Isaya 60:3.—Semb. 5:9, 10.
Esikhatsini lesitako, emaKhristu lagcotjiwe atawukhanya kakhulu. Kanjani? Nasekuphelile kuphila kwawo lamhlabeni, atawuba yincenye ‘yeJerusalema lensha,’ nobe makoti waKhristu, lokungulabangu-144 000 labatawuba ngemakhosi nebaphristi kanye naye.—Semb. 14:1; 21:1, 2, 24; 22:3-5.
IJerusalema Lensha itawudlala indzima lebalulekile ekugcwaliseni Isaya 60:1. (Catsanisa Isaya 60:1, 3, 5, 11, 19, 20, umcatsanise neSembulo 21:2, 9-11, 22-26.) Njengobe nenkhosi yaka-Israyeli beyibusa iseJerusalema, neJerusalema Lensha kanye naKhristu batawakha hulumende waseveni lelisha. Kwenteka njani kutsi iJerusalema Lensha ‘yehle ezulwini ivela kuNkulunkulu’? Ngekutsi inake kakhulu umhlaba. Bantfu labesaba Nkulunkulu labavela kuto tonkhe tive ‘batawuhamba ekukhanyeni kwayo.’ Ngetulu kwaloko, batawukhululwa esonweni nasekufeni. (Semb. 21:3, 4, 24) Umphumela waloko utawuba kutsi ‘kutawubuyiselwa tonkhe tintfo,’ njengobe Isaya nalabanye baphrofethi basho. (Imis. 3:21) Kubuyisela lokukhulu kwacala ngesikhatsi Khristu aba yiNkhosi futsi kutawuchubeka kuze kube sekupheleni Kwekubusa Kwakhe Kweminyaka Leyinkhulungwane.
a Kubuyiselwa kwekukhonta lokuhlantekile lokwenteka nga-1919 kuphindze kukhulunywe ngako kuHezekeli 37:1-14 nakuSembulo 11:7-12. Hezekeli waphrofetha kutsi onkhe emaKhristu lagcotjiwe bekatawubuyiselwa ekukhonteni kweliciniso ngemuva kwesikhatsi lesidze atfunjiwe. Siphrofetho lesikuSembulo sikhuluma ngekutalwa kabusha lokungumfanekiso kwelicembu lelincane lebazalwane labagcotjiwe lebebahola ngemuva kwekuphazamiseka sikhashana ekukhonteni Jehova ngemuva kwekuboshwa. Nga-1919, babekwa kutsi babe ‘sisebenti lesetsembekile nalesihlakaniphile.’—Mat. 24:45; buka incwadzi letsi Kukhonta Jehova Ngendlela Lehlantekile—Kuyabuyiselwa Ekugcineni!, likh. 118.
