1-2. Nguyiphi indlela lencono yekufundza liBhayibheli neyekulidadisha? Fanekisa.

 ASE sitsi ufuna kutsenga indlu. Yini longatsandza kuyibona kucala ngaphambi kwekutsi wente sincumo? Bongenetiswa kubona sitfombe sayo sangembili kuphela yini? Siyaciniseka kutsi bongafuna kutibonela yona lendlu, ungene ngekhatsi kuyo, ubuke onkhe emakamelo ayo futsi uyibone yonkhe. Mhlawumbe ungatsandza nekubuka kutsi yakhiwa njani. Kusebaleni kutsi ungatsandza kubona konkhe ngalendlu lofuna kuyitsenga.

² Singenta lokufanako nangalapho sifundza liBhayibheli futsi silidadisha. Lomunye umbhali wafananisa umlayeto weliBhayibheli “nendlu lenkhulu lenemibhoshongo lemidze nesisekelo lesijulile.” Ngako yini lesingayenta kuze silati kahle liBhayibheli? Nawufundza ngekushesha, ungahle ugcine ngekwati emaciniso lasisekelo, ‘lokutintfo letimelula temavi aNkulunkulu.’ (Heb. 5:12) Kodvwa njengobe kudzingeka kutsi ungene ngekhatsi kulendlu kuze ubone tintfo letinyenti ngayo, kufanele ulifundze ngekucophelela liBhayibheli kuze ulicondze kahle. Indlela lekahle yekudadisha liBhayibheli kubuka kutsi tintfo lelitisho kulenye indzawo tihlangana njani nalelitisho kulenye indzawo. Yetama kucondza emaciniso lowakholelwako nekutsi yini lekwenta uwakholelwe.

3. Yini umphostoli Pawula lakhutsata bazalwane bakhe nabodzadze kutsi bayente, futsi leni? (Kubase-Efesu 3:14-19)

³ Kuze silicondze kahle lonkhe liVi laNkulunkulu, kufanele sifundze emaciniso lajulile lakulo. Umphostoli Pawula wakhutsata bazalwane bakhe nabodzadze kutsi balidadishe ngekucophelela kuze bakwati “kubucondzisisa bubanti, budze, kuphakama, kanye nekujula” kweliciniso. Nabenta njalo, ‘bebatawucina  futsi basime’ ekukholweni. (Fundza Kubase-Efesu 3:14-19.) Natsi kufanele sente lokufanako. Ase sicoce ngekutsi singalidadisha njani ngekucophelela liVi laNkulunkulu kuze sikutfole konkhe lelikushoko.

4. Yini lesingayenta kuze sisondzelane kakhulu naJehova? Niketa tibonelo.

⁴ Njengobe singemaKhristu, asenetiswa nje kucondza emaciniso lasisekelo laseBhayibhelini. Sifuna kufundza “ngisho netintfo letijulile taNkulunkulu” ngekusitwa ngumoya longcwele. (1 Khor. 2:9, 10) Kungaba njani kutsi ucale kumba ujule eBhayibhelini unemgomo wekusondzelana naJehova? Sibonelo nje, ungacwaninga ngendlela Jehova lakhombisa ngayo kutsi uyatitsandza tikhonti takhe tasesikhatsini lesendlulile, nekutsi loko kukhombisa njani kutsi nawe uyakutsandza. Ungaphindze udadishe ngendlela Jehova bekafuna ema-Israyeli amkhonte ngayo, loko ukucatsanise nendlela lafuna simkhonte ngayo lamuhla. Nobe ungacwaninga ngetiphrofetho letagcwaliswa nguJesu ngesikhatsi enta umsebenti wekushumayela lamhlabeni.

5. Ikhona yini indzaba longacwaninga ngayo nawutidadishela liBhayibheli?

⁵ Labanye labatsandza kucwaninga basho tintfo labangatsandza kuticwaninga eVini laNkulunkulu. Loko labakusho kutfolakala ebhokisini lelitsi “ Longacwaninga Ngako.” Kungakujabulisa kakhulu kucwaninga ngaletintfo usitwa yi-Watch Tower Publications Index nobe Lithulisi Lekucwaninga LaBofakazi BaJehova. Kumba ujule eBhayibhelini kungakucinisa kukholwa kwakho futsi kukusite ube “nelwati ngaNkulunkulu.” (Taga 2:4, 5) Nyalo ase sicoce ngalamanye emaciniso lajulile laseBhayibhelini lesingacwaninga ngawo.

6. (a) Uyini umehluko emkhatsini weluhlelo nenjongo? (b) Kushiwo ngani kutsi injongo yaJehova ngebantfu nangemhlaba “yaphakadze”? (Kubase-Efesu 3:11)

⁶ Cabanga ngaloko liBhayibheli lelikushoko mayelana nenjongo yaNkulunkulu. Kunemehluko lomkhulu emkhatsini weluhlelo nenjongo. Kuhlela singakufananisa nekukhetsa  kutsi ngumuphi umgwaco lofuna kuhamba ngawo kuze ufike lapho uya khona. Kodvwa nangabe kunetintfo letikuvimbelako kulomgwaco, ungahle ungefiki lawufuna kuya khona. Injongo singayifananisa nalendzawo lesifuna kuya kuyo. Siyati kutsi sifuna kuya kuphi futsi singasebentisa nobe nguyiphi indlela. Nangabe umgwaco uvaliwe, singasebentisa lenye indlela. Sijabula kakhulu ngekutsi Jehova bekasolo asembulela “injongo [yakhe] yaphakadze” eBhayibhelini. Uhlale aphumelela ngobe “wenta kutsi tonkhe tintfo tigcwalise injongo yakhe.” (Taga 16:4) Ngetulu kwaloko, umphumela waloko Jehova lakwentako utawuhlala kuze kube phakadze. Iyini injongo yaJehova, futsi nguluphi lushintjo lalwentile kuze ayifeze?

7. Ngemuva kwekuvukela kwebantfu bekucala, Jehova wayishintja njani indlela lebekatawufeza ngayo injongo yakhe? (Matewu 25:34)

⁷ Nkulunkulu watjela bantfu bekucala injongo yakhe ngabo. Bekufanele ‘batalane bandze bagcwale emhlabeni futsi bawuncobe, babuse tonkhe tilwane’ letisemhlabeni. (Gen. 1:28) Ngesikhatsi bo-Adamu na-Eva bavukela, futsi babangela kutsi bantfu babe nesono, loko akuzange kumvimbe Jehova kutsi afeze injongo yakhe. Washintja indlela lebekatayifeza ngayo. Ngekushesha wancuma kubeka uMbuso ezulwini lebewutawufeza injongo yakhe yasekucaleni ngebantfu nangemhlaba. (Fundza Matewu 25:34.) Ngesikhatsi sakhe lesifanele, Jehova watfumela iNdvodzana yakhe lelitibulo emhlabeni kuze ifundzise bantfu ngaloMbuso futsi isihlawulele esonweni nasekufeni ngenca yekutsi uyasitsandza. Ngemuva kwaloko, Jesu wavuselwa ezulwini kuze abe yiNkhosi yeMbuso waNkulunkulu. Kodvwa kusesekunyenti lokufanele sikufundze ngenjongo yaNkulunkulu.

8. (a) Uyini umlayeto weliBhayibheli? (b) Njengobe kuchazwe Kubase-Efesu 1:8-11, iyini injongo yaJehova leyinhloko? (Buka sitfombe lesisekhasini lekucala.)

⁸ Umlayeto loyinhloko weliBhayibheli kutsi libito laJehova litawungcweliswa njengobe afeza injongo yakhe ngemhlaba asebentisa uMbuso loholwa nguKhristu. Kute lotawushintja injongo yaJehova. Usicinisekisile kutsi nakanjani utayifeza. (Isa. 46:10, 11, imibhalo lengentasi; Heb. 6:17, 18) Ngekuhamba kwesikhatsi, umhlaba utawushintja ube lipharadisi lapho khona situkulwane sa-Adamu na-Eva lesesite sono ‘sitawuphila kuze kube phakadze.’ (Hla. 22:26) Kodvwa kusenalokunye Jehova latawukwenta. Utawubese wenta kutsi tonkhe tidalwa takhe letihlakaniphile tasezulwini tibe nebunye netasemhlabeni. Ngemuva kwaloko, bonkhe labaphilako batawutitfoba ngekwetsembeka ngephansi kwekubusa kwakhe. (Fundza Kubase-Efesu 1:8-11.) Ayikumangalisi yini indlela Jehova latayifeza ngayo injongo yakhe?

9. Nasifundza liBhayibheli, singabona khashane kangakanani nelikusasa?

⁹ Cabanga ngesiphrofetho lesashiwo nguJehova ensimini yase-Edeni lesibhalwe kuGenesisi 3:15. b Saveta tintfo lebetitawenteka lebetitawufeza injongo yakhe. Kodvwa letintfo betitawenteka ngemuva kwetinkhulungwane teminyaka. Sibonelo nje, Nkulunkulu watjela Abrahama kutsi ngemuva kwetitukulwane takhe letinyenti, bekutawuvela lomunye esitukulwaneni sakhe lebekatawuba nguKhristu. (Gen. 22:15-18) Nga-33 C.E., Jesu walinyatwa esitsendzeni njengobe bekuphrofethiwe. (Imis. 3:13-15) Incenye yekugcina yalesiphrofetho  itawufezeka ngemuva kwekutsi Sathane sekafihlitwe inhloko, njengobe loko kutawenteka eminyakeni lengetulu kwalengu-1 000 kusukela nyalo. (Semb. 20:7-10) LiBhayibheli liphindze lisho lokunye lokutawenteka njengobe buya ngasesiphetfweni butsa emkhatsini welive laSathane nenhlangano yaJehova.

10. (a) Ngutiphi tintfo letitawenteka ngekushesha? (b) Singatilungisa njani tingcondvo tetfu netinhlitiyo tetfu? (Buka umbhalo longentasi.)

¹⁰ Cabanga nganati tintfo letaphrofethwa letitawenteka letitawunyakatisa umhlaba. Kwekucala, tive titawumemetela “kuthula nekulondzeka!” (1 Thes. 5:2, 3) “Ngekushesha lokukhulu,” kutawucala kuhlupheka lokukhulu ngesikhatsi tive tihlasela yonkhe inkholo yemanga. (Semb. 17:16) Ngemuva kwaloko, kusenekwenteka kutawuba netibonakaliso letingakavami ‘teNdvodzana yemuntfu ita isemafini inemandla nenkhatimulo lenkhulu.’ (Mat. 24:30) Jesu utawubese wehlulela bantfu, ehlukanise timvu etimbutini. (Mat. 25:31-33, 46) Nobe kunjalo, Sathane utawube angakahlali nje abukele. Agcwele inzondo, utawubangela tive, liBhayibheli lelitibita ngekutsi nguGogi waseveni lakaMagogi kutsi tihlasele bantfu baJehova. (Hez. 38:2, 10, 11) Kutawuba nesikhatsi lapho labagcotjiwe labaselamhlabeni batawugcogcelwa ezulwini kuze babe naKhristu nelibutfo lakhe lasezulwini futsi balwe imphi ye-Amagedoni, lokuyincenye yekugcina yekuhlupheka lokukhulu. c (Mat. 24:31; Semb. 16:14, 16) Ngemuva kwaloko, kutawubese kucala Kubusa KwaKhristu Kweminyaka Leyinkhulungwane lamhlabeni.​—Semb. 20:6.

11. Lisho kutsini kuwe litsemba lekuphila phakadze? (Buka nesitfombe.)

¹¹ Nyalo cabanga ngalokutawenteka eminyakeni leminyenti leseta. LiBhayibheli litsi uMdali wetfu “ufake ngisho nebuphakadze etinhlitiyweni” tetfu. (Shu. 3:11) Cabanga nje kutsi loko kusho kutsini kuwe nasebuhlotjeni bakho naJehova. Incwadzi letsi Sondela kuJehova, ekhasini 319, isho naku kuze isisite: “Ngemuva kwekuphila iminyaka  lengemakhulu, letinkhulungwane, letigidzi ngisho naletigidzigidzi, sitawati lokunyenti kakhulu ngaJehova Nkulunkulu kwendlula loko lesikwatiko nyalo. Kodvwa sitawubona ngatsi kusenetintfo letinyenti letimangalisako lokusafanele sitifundze. . . . Asikhoni ngisho nekucabanga indlela kuphila lokutawuba kuhle ngayo futsi kujabulise ngayo epharadisi. Lokutawuhlale kuhamba embili kutawuba kuhlale sisondzelana kakhulu naJehova.” Kodvwa kwanyalo yini lesingayifundza njengobe sidadisha liVi laNkulunkulu?

12. Singabuka njani emazulwini? Niketa sibonelo.

¹² LiVI laNkulunkulu lisitjela lokuncane ‘ngendzawo lephakeme’ yaJehova. (Isa. 33:5) LiBhayibheli lisitjela ngetintfo letimangalisako letimayelana naJehova kanye nencenye yasezulwini yenhlangano yakhe. (Isa. 6:1-4; Dan. 7:9, 10; Semb. 4:1-6) Sibonelo nje, singafundza ngetintfo letimangalisako letabonwa nguHezekeli ngesikhatsi ‘kuvuleka emazulu, abona imibono yaNkulunkulu.’​—Hez. 1:1.

13. Utiva njani ngaloko Jesu lakwenta emazulwini njengobe kuvetwe KumaHebheru 4:14-16?

¹³ Cabanga nangemisebenti leyentiwa nguJesu ezulwini njengobe ayiNkhosi yetfu lebusako futsi angumPhristi Lophakeme lovelana natsi. Ngaye siyakhona kusondzela ngemthantazo “esihlalweni sebukhosi [saNkulunkulu] semusa lomkhulu” futsi sicele umusa nelusito “ngesikhatsi lesifanele.” (Fundza KumaHebheru 4:14-16.) Shengatsi lingete lashona lilanga singakacabangi ngaloko Jehova naJesu labasentele kona nalabasentela kona basezulwini. Lutsandvo labasikhombisa lona kufanele lusitsintse ekujuleni kwetinhlitiyo futsi lusente sikhutsale emisebentini lesiyentela Jehova nasekumkhonteni.​—2 Khor. 5:14, 15.

14. Nguyiphi lenye indlela lesingakhombisa ngayo kutsi siyabonga kuJehova nakuJesu? (Buka netitfombe.)

 ¹⁴ Lenye indlela lehamba embili lesingakhombisa ngayo kutsi siyabonga kuNkulunkulu wetfu naseNdvodzaneni yakhe kutsi sitimisele kusita labanye babe BoFakazi BaJehova futsi babe bafundzi baJesu. (Mat. 28:19, 20) Nguloko lokwentiwa ngumphostoli Pawula achutjwa kubonga kuNkulunkulu nakuKhristu. Bekati kutsi intsandvo yaJehova ikutsi “tonkhe tinhlobo tebantfu tisindziswe, titfole nelwati lolungulonalona lweliciniso.” (1 Thim. 2:3, 4) Wasebenta ngawo onkhe emandla akhe asita bantfu labanyenti emsebentini wekushumayela “kuze kutsi [asindzise] labatsite nakungenteka.”​—1 Khor. 9:22, 23.

15. Ngekusho kweTihlabelelo 1:2, yini lengasenta sijabule?

¹⁵ Umhlabeleli wayibeka kahle nakatsi umuntfu lojabulako nalophumelelako ‘ngulojabula kakhulu ngemtsetfo waJehova’ futsi “ucabangisisa ngawo imini nebusuku.” (Hla. 1:1-3) Lomunye umhumushi weliBhayibheli lokutsiwa nguJoseph Rotherham nakabhala encwadzini yakhe letsi Studies in the Psalms, watsi umuntfu kufanele “akujabulele kakhulu kufuna sicondziso salo, kulifundza nekutinika sikhatsi lesinyenti acabangisisa ngalo.” Wengeta watsi “nangabe kuphela lilanga umuntfu angalifundzi liBhayibheli, lelo langa kufanele alitsatse ngatsi selonakele.” Ungayitfola injabulo ngekudadisha liBhayibheli ngekutsi utfole tintfo letimangalisako letikulo futsi ubuke kutsi tihlangana njani. Kujabulisa kakhulu kumba ujule eVini laNkulunkulu!

16. Sitawucoca ngani esihlokweni lesilandzelako?

¹⁶ Singakhona kuwacondza emaciniso lamangalisako Jehova lasifundzisa wona eVini lakhe. Esihlokweni lesilandzelako, sitawucoca ngalelinye liciniso lelijulile, lokulithempeli lelikhulu laJehova lelingumfanekiso lelachazwa nguPawula encwadzini layibhalela emaKhristu langemaHebheru. Shengatsi kungakujabulisa kakhulu kumba ujule ngalendzaba.