BENGIKUTSANDZA loko lokufundziswa liBhayibheli. Make bekanetincwadzi letisekelwe eBhayibhelini futsi nami bengititsandza kakhulu letincwadzi, ikakhulukati titfombe tato. Babe bekangafuni kutsi make akhulume nami ngaloko lebekakufundza. Nanobe kunjalo, mine bengifuna kwati loko lokushiwo nguletincwadzi futsi ngibuta imibuto, ngako bekutsi babe nakangekho ekhaya make afundze nami liBhayibheli. Ngenca yaloko, nami ngakhetsa kutinikela kuJehova. Nga-1943, ngabhatjatiswa eBlackpool eNgilandi nangineminyaka lelishumi budzala.

Kusukela ngaleso sikhatsi kuchubeke, mine namake besiwenta njalo umsebenti wekushumayela. Besisebentisa emagilamafoni nasishumayela. Lamagilamafoni bekamakhulu futsi anesisindvo lesingaba ngemakhilogremu langu-4.5. Sewungangicabanga nje ngingumfanyana ngititimisa legilamafoni.

Nangineminyaka lengu-14 budzala ngaba nesifiso sekuba lihlahlandlela. Make watsi angikhulume nembonisi wesigodzi ngalesifiso sami. Umbonisi wesigodzi watsi kufanele ngitfole  likhono lengingatisekela ngalo nasengilihlahlandlela. Ngako ngenta njengobe asho. Ngemuva kwekusebenta iminyaka lemibili, ngakhuluma nalomunye umbonisi wesigodzi mayelana nalesifiso sami sekuba lihlahlandlela. Wavele watsi: “Kute inkinga!”

Ngako, nga-Apri 1949, mine namake salahla ifenisha lebesinayo endlini lebesesingasayidzingi sase sitfutsela eMiddleton eceleni kwaseManchester, lapho sacala khona kuba ngemahlahlandlela. Ngemuva kwetinyanga letine, ngatfola lomunye umzalwane lesaba ngemahlahlandlela naye. Lihhovisi leligatja lasicela kutsi sitfutsele ebandleni lebelisandza kusungulwa eIrlam. Make wachubeka alihlahlandlela nalomunye dzadze kulelinye libandla.

Nanobe bengineminyaka lengu-17 nje kuphela, mine nalona lebesingemahlahlandlela naye sacelwa kutsi sichube imihlangano ngenca yekutsi bebabancane bazalwane labafanelekako kulelibandla lelisha. Ngekuhamba kwesikhatsi ngatfunyelwa ebandleni laseBuxton lebelinelinani lelincane lebamemeteli futsi lebelidzinga lusito. Lemisebenti lebengiyenta bengati kutsi iyindlela lengiceceshwa ngayo.

Nga-1951, ngagcwalisa lifomu lekuya eSikolweni SeliBhayibheli SaseGileyadi. Kodvwa ngaDecember 1952, ngabitelwa emasotjeni. Ngafaka sicelo sekungayi emphini, ngabeka sizatfu sekutsi  ngisisebenti sasikhatsi sonkhe lesifundzisa bantfu ngaNkulunkulu, kodvwa inkantolo ayisivanga lesizatfu sami ngako ngagwetjwa tinyanga letisitfupha ngisejele. Nangiselapho, ngamenyelwa eklasini lesi-22 laseGileyadi. Ngako ngaJuly 1953, ngagibela umkhumbi lobitwa ngekutsi yiGeorgic ngalibangisa eNew York.

Nangifika lapho, ngaya emhlanganweni weNew World Society Assembly wa-1953. Ngemuva kwalomhlangano ngagibela sitimela ngaya eSouth Lansing eNew York, lapho lesikolwa besitawuba khona. Njengobe bengisandza kuphuma ejele, benginemali lencane. Nangehla esitimeleni, bekufanele ngigibele ibhasi lebeyitangimikisa eSouth Lansing, ngako kwadzingeka ngiboleke 25 cent kulebengigibele naye.

Sikolwa saseGileyadi sasicecesha kutsi sibe “ngiko konkhe kubantfu bato tonkhe tinhlobo,” ikakhulukati emsebentini wetitfunywa telivangeli. (1 Khor. 9:22) Mine naPaul Bruun kanye naRaymond Leach satfunyelwa ePhilippines. Kwadzingeka simele kuphuma kwema-visa etfu lokwatsatsa tinyanga letimbalwa. Nasesiwatfolile, sagibela umkhumbi lowaphuma ngaseRotterdam, sadzabula iMediterranean Sea, sendlula iSuez Canal, saphindze sadzabula i-Indian Ocean sabheka eMalaysia saze sayofika eHong Kong. Loluhambo lwatsatsa emalanga langu-47 solo siselwandle! Ekugcineni sefika eManila ngaNovember 19, 1954.

Kwadzingeka kutsi sitayelane nebantfu labasha, indzawo lensha kanye nelulwimi lolusha. Kodvwa, tsine sobatsatfu besabelwe ebandleni lelisedolobheni laseQuezon, lapho bekunebantfu labanyenti labakhuluma siNgisi. Ngako, ngemuva kwetinyanga letisitfupha, besati nje emagama lambalwa elulwimi lwesiTagalog. Kodvwa sabelo setfu lesalandzela sasisita salufundza lolulwimi lwesiTagalog.

Ngalelinye lilanga ngaMay 1955 nasifika ekhaya sibuya kuyoshumayela, mine nemzalwane Leach satfola tincwadzi endlini yetfu. Nasitifundza letincwadzi, satfola kutsi besesabelwe kuba babonisi besigodzi. Bengineminyaka lengu-22 nje kuphela budzala kodvwa lesabelo sanginiketa litfuba lelihle lekuba “ngiko konkhe kubantfu bato tonkhe tinhlobo” ngetindlela letinyenti.

Nasi sibonelo: Ngetfula inkhulumo yami yekucala yelinyenti njengembonisi wesigodzi embikwesitolo semphakatsi. Ngekushesha ngabona kutsi bekuvamile ePhilippines kutsi inkhulumo yelinyenti yetfulwe etindzaweni tawonkhe wonkhe. Njengobe bengihambela emabandla lehlukene, bengetfula tinkhulumo emathendeni, etimakethe, embikwekwemahholwa emphakatsi, lakudlalelwa khona ibhola, emapaki kanye nasetitaladini. Ngalelinye lilanga edolobheni laseSan Pablo kwaba nemvula lenkhulu leyabangela kutsi ngingakhoni kwetfula inkhulumo emakethe. Ngako ngacela kubazalwane kutsi lenkhulumo ngiyetfule eHholweni leMbuso. Kodvwa labazalwane bangibuta kutsi bekutawushiwo yini kutsi leyo yinkhulumo yelinyenti, ibe ingekho lapho bekunelinyenti khona.

Bengivame kulala emakhaya ebazalwane. Nanobe labazalwane bebangakemi kahle ngekwetimali, emakhaya abo bekahlala ahlobile. Bengivame kulala ecansini. Tindzawo tekugezela betivulekile ngakho ngafundza kugeza khona lapho. Bengivame kuhamba ngebhasi nome ngesikebhe nangiya kuletinye tichingi. Kuyo yonkhe leminyaka ngisemsebentini wasikhatsi sonkhe, angizange sengibe nemoto.

Kushumayela kanye nekuvakashela emabandla kwangisita ngafundza lulwimi lwesiTagalog. Angizange sengiye eklasini kuyofundza lolulwimi kodvwa ngekulalela bazalwane nabashumayela kanye nasemihlanganweni, kwangenta ngalufundza lolulwimi. Bazalwane bebatimisele kungisita kuze ngilufundze lolulwimi futsi ngibonga kakhulu ngekungibeketelela kwabo kanye nangekungikhutsata.

Njengobe sikhatsi sichubeka, ngatfola tabelo  letinsha letadzinga kutsi ngitivumelanise netimo. Nga-1956, nakuvakashe umzalwane Nathan Knorr, nganikwa sabelo sekukhulumela inhlangano emhlanganweni lomkhulu lebesinawo. Bengingakaze ngisente lesabelo, kodvwa labanye bazalwane bangisita. Kungakapheli umnyaka, kwaphindze kwaba nalomunye umhlangano lomkhulu futsi besivakashelwe ngumzalwane Frederick Franz lobekabuya endlunkhulu. Njengobe bengingumbonisi wemhlangano, ngayibona indlela umzalwane Franz lebekakulungele ngayo kuhambisana nesimo sendzawo. Bazalwane bajabula kakhulu nababona umzalwane Franz avunule ibarong Tagalog, lokutimphahla temdzabu tasePhilippines, naketfula inkhulumo yelinyenti.

Kwadzingeka kutsi ngente lolunye lushintjo nangitfola sabelo sekuba ngumbonisi wesifundza. Ngaleso sikhatsi besitjengisa bantfu lifilimu lelitsi The Happiness of the New World Society cishe kuyo yonkhe indzawo labekunebantfu khona. Ngaletinye tikhatsi, besihlushwa tilokatana. Betidvonswa ngulokukhanya kwe-projector futsi bese tingena lakhatsi kuyo. Bekungumsebenti lomkhulu kutikhipha. Bekungasilula kubukelisa labantfu lelifilimu kodvwa besijabula nasibabona kutsi sebayati kahle inhlangano yaJehova.

Bafundisi bemaKatolika bebacindzetela tiphatsimandla kutsi tingasiniki imvume yekuba nemihlangano  lemikhulu. Ngalesinye sikhatsi bebashaya tinsimbi temasontfo nangabe imihlangano idvutane nemasontfo abo kute nje baphatamise luhlelo lwemhlangano. Kodvwa imihlangano beyichubeka futsi bantfu labanyenti kuleto tindzawo sebatikhonti taJehova.

Nga-1959 ngatfola incwadzi lebeyingatisa kutsi sengabelwe ehhovisini leligatja. Lesabelo sangenta ngafundza tintfo letinyenti. Ngekuhamba kwesikhatsi ngacelwa kutsi ngivakashele lamanye emagatja lakulamanye emave. Nangisahambela emave, ngahlangana naJanet Dumond lobekasitfunywa selivangeli eThailand. Sasiloku sichumana futsi kamuva sashada. Sesineminyaka lengu-51 sishadile futsi sikhonta Jehova kanye kanye.

Lengikujabulele nakakhulu kutsi ngibe nelilungelo lekuvakashela bantfu baJehova emaveni langu-33. Ngibonga kakhulu ngekutsi tabelo lengatitfola tangisita kutsi ngikhone kuphilisana kahle nebantfu labahlala emaveni lehlukene. Kuvakashela emave kwaphindze kwangisita ngabona indlela Jehova labatsandza ngayo bantfu bato tonkhe tinhlanga.​—Imis. 10:34, 35.

Kungijabulise kakhulu kukhonta Jehova ngikanye nebazalwane basePhilippines. Linani lebamemeteli ePhilippines seliphindvwe ngemanani lalishumi kunangalesikhatsi ngicala kukhonta khona. Mine naJanet solo sisakhonta Jehova egatjeni lasePhilippines lelisedolobheni laseQuezon. Ngisho nanobe sengineminyaka lengetulu kwa-60 ngikulelinye live, solo ngikulungele kwenta nobe yini Jehova latsi angiyente. Lushintjo lolube khona kulamalanga enhlanganweni yaJehova lusikhutsate kutsi sihlale sikulungele kutivumelanisa netimo njengobe sisakhonta Jehova sikanye nebazalwane betfu.

Sente konkhe lesingakwenta kuze sente loko lokuyintsandvo yaJehova futsi lendlela yekuphila isijabulise kakhulu. Setamile nekutivumelanisa netimo kuze sikwati kukhonta kahle bazalwane betfu. Sitimisele nekutsi sibe “ngiko konkhe kubantfu bato tonkhe tinhlobo” uma nje Jehova asesivumele kutsi sente kanjalo.