1, 2. (a) Sifaka ekhatsi ini ‘sipho lesingachazeki’ saNkulunkulu? (b) Ngumiphi imibuto lesitawucoca ngayo kulesihloko?

JEHOVA wasipha sipho lesibaluleke kakhulu lesikhombisa kutsi uyasitsandza ngesikhatsi atfumela Jesu, loyiNdvodzana yakhe leligugu kutsi ete emhlabeni! (Johane 3:16; 1 Johane 4:9, 10) Umphostoli Pawula wabita lesipho ngekutsi ‘sipho lesingachazeki.’ (2 Khorinte 9:15) Kungani Pawula asebentisa lamavi?

² Pawula bekati kutsi umhlatjelo waJesu usicinisekiso sekutsi tonkhe tintfo letinhle letetsenjiswa nguNkulunkulu titawugcwaliseka. (Fundza 2 Khorinte 1:20.) Loku kusho kutsi ‘sipho lesingachazeki’ saNkulunkulu sifaka ekhatsi umhlatjelo waJesu nabo bonkhe buhle nelutsandvo Jehova lasikhombisa lona. Kumatima kusichaza ngendlela lecondzakalako lesipho. Kufanele sitive njani ngalesipho lesikhetsekile? Kufanele sisikhutsate kutsi senteni njengobe silungiselela Sikhumbuto sekufa kwaKhristu lesitawuba ngaLesitsatfu March 23, 2016?

3, 4. (a) Utiva njani nangabe umuntfu akupha sipho? (b) Sipho lesibalulekile singakushintja njani kuphila kwakho?

³ Siyajabula nangabe umuntfu asipha sipho. Kodvwa letinye tipho tibaluleke kakhulu kangangekutsi tingakushintja kuphila kwetfu. Nasi sibonelo: Ase uticabange wente licala, futsi sigwebo selicala lakho kukufa. Ungakalindzeli, umuntfu longamati avolontiye kutsi kugwetjwe yena esikhundleni sakho. Utimisele kukufela! Ungativa njani ngesipho lesibaluleke kangaka?

⁴ Lesipho lesibalulekile nalesikhombisa lutsandvo, singakwenta kutsi wente lushintjo ekuphileni kwakho. Mhlawumbe ungaphindze ukhutsateke kutsi uphe labanye, ubatsandze futsi utsetselele nobe ngubani loke wakuphatsa kabi. Kuko konkhe kuphila kwakho, ungafuna kukhombisa kutsi uyabonga ngaloko lomuntfu lakwentele kona.

5. Kungani sipho saNkulunkulu senhlawulo sibaluleke kakhulu kwendlula nobe ngusiphi lesinye?

⁵ Sipho saNkulunkulu senhlawulo sibaluleke kakhulu kunalesipho lesisandza kukhuluma ngaso. (1 Phetro 3:18) Cabanga ngaloku: Sonkhe sazuza sono ku-Adamu, futsi sigwebo saso kufa. (Roma 5:12) Lutsandvo lwenta Jehova watfumela Jesu emhlabeni kute “afele bonkhe bantfu.” (Hebheru 2:9) Kodvwa umhlatjelo waJesu utawenta lokungetulu kwaloku! Utawucedza kufa kuze kube phakadze. (Isaya 25:7, 8; 1 Khorinte 15:22, 26) Bonkhe bantfu labakhombisa kukholwa kuJesu batawuphila ngekuthula futsi bajabule phakadze, labanye batawuba ngemakhosi naKhristu ezulwini labanye baphile emhlabeni babuswa nguMbuso waNkulunkulu. (Roma 6:23; Sembulo 5:9, 10) Ngutiphi letinye tibusiso letitawutfolakala ngesipho saJehova?

6. (a) Ngutiphi tibusiso letitawutfolakala ngesipho saJehova lobuke phambili kuto? (b) Shano tintfo letintsatfu sipho saNkulunkulu lesitakukhutsata kutsi utente.

⁶ Njengencenye yesipho saNkulunkulu, umhlaba utawuba lipharadisi, kwelashwe labagulako futsi kuvuswe nalabafile. (Isaya 33:24; 35:5, 6; Johane 5:28, 29) Siyamtsandza Jehova neNdvodzana yakhe ngekusipha ‘lesipho lesingachazeki.’ Lesipho sitasikhutsata kutsi senteni? Sitasikhutsata kutsi (1) silingise Jesu Khristu, (2) sitsandze bazalwane betfu, futsi (3) sicolele labanye ngalokusuka enhlitiyweni.

7, 8. Kufanele sitive njani ngelutsandvo lwaKhristu, futsi kufanele lusikhutsate kutsi senteni?

⁷ Kwekucala, kufanele sikhutsateke kutsi sisebentise kuphila kwetfu kute sidvumise Jesu. Umphostoli Pawula watsi: “Lutsandvo Khristu lanalo luyasichuba.” (Fundza 2 Khorinte 5:14, 15.) Pawula bekati kutsi nasemukela lutsandvo lolukhulu lwaJesu, lutasikhutsata kutsi simtsandze futsi simdvumise. Nangabe sikucondza kahle loko Jehova lasentele kona, lutsandvo lwakhe lutasenta siphile ngendlela lekhombisa kutsi siyamhlonipha Jesu. Sitakwenta njani loko?

⁸ Kumtsandza kwetfu Jehova kutasenta kutsi silingise sibonelo saJesu, silandzele tinyatselo takhe edvute. (1 Phetro 2:21; 1 Johane 2:6) Nasilalela Nkulunkulu naKhristu, sisuke sikhombisa kutsi siyabatsandza. Jesu watsi: “Loyo lowati imiyalo yami futsi ayigcine, nguye longitsandzako. Naloyo longitsandzako utawutsandvwa nguBabe, nami ngitamtsandza bese ngitiveta  ngalokucacile kuye.”​—Johane 14:21; 1 Johane 5:3.

9. Ngukuphi kucindzetelwa lesibhekana nako?

⁹ Kulesikhatsi seSikhumbuto, kuhle kuzindla ngendlela lesikusebentisa ngayo kuphila kwetfu. Ngako tibute: ‘Tikhona yini tindlela lengimlingisa ngato Jesu? Ngukuphi lapho ngingatfutfukisa khona?’ Kubalulekile kutibuta lemibuto ngobe bantfu labakulelive bafuna siphile ngendlela labaphila ngayo. (Roma 12:2) Nangabe singakanaki, singatikhandza sicindzetelwa kutsi silingise bothishela labakulelive, bantfu labadvumile kanye netihlabani tetemidlalo. (Kholose 2:8; 1 Johane 2:15-17) Singamelana njani nalokucindzetelwa?

10. Ngumiphi imibuto lesingatibuta yona kulesikhatsi seSikhumbuto, futsi timphendvulo tayo tingasikhutsata kutsi senteni? (Buka sitfombe lesisekucaleni kwalesihloko.)

¹⁰ Kuhle kutsi kulesikhatsi seSikhumbuto sesike sihlole timphahla tetfu, ema-movie, tingoma, loko lokukubongcondvomshini betfu, kubomakhalekhikhini nobe kuma-tablet. Tibute: ‘Bengingativa nginemahloni yini kube Jesu ulana futsi abone loko lengikugcokile?’ (Fundza 1 Thimothi 2:9, 10.) ‘Timphahla tami tiyakhombisa yini kutsi ngingumlandzeli waKhristu? Jesu bekangakujabulela yini kubukela ema-movie lengiwabukelako? Abengatilalela yini tingoma lengitilalelako? Nangabe Jesu bekangaboleka makhalekhikhini nobe i-tablet yami, bengingaba nemahloni yini ngaloko bekatakubona? Bekungaba matima yini kumchazela kutsi kungani ngitsandza imidlalo ye-video lengiyidlalako?’ Indlela lesimtsandza ngayo Jehova kufanele isikhutsate kutsi silahle nobe yini lengakamfaneli umKhristu, ngisho nobe idule kangakanani. (Imisebenti 19:19, 20) Ngesikhatsi sinikela kuphila kwetfu kuJehova, setsembisa kusebentisa kuphila kwetfu kute sidvumise Khristu. Ngako akukafaneli sigcine nobe yini lengenta kube matima ngatsi kulingisa Jesu.​—Matewu 5:29, 30; Filiphi 4:8.

11. (a) Indlela lesimtsandza ngayo Jehova naJesu isikhutsata njani emsebentini wekushumayela? (b) Lutsandvo lungasikhutsata njani kutsi sisite labanye ebandleni?

¹¹ Indlela lesimtsandza ngayo Jesu isikhutsata kutsi sishumayele futsi sishiseke nasifundzisa labanye. (Matewu 28:19, 20; Lukha 4:43) Kulesikhatsi seSikhumbuto, ungahlela yini timo takho kute ube lihlahlandlela lelisitako futsi ucitse ema-awa langu-30 nobe langu-50 ushumayela? Lomunye umfelwa lobekaneminyaka lengu-84 budzala, abecabanga kutsi angeke akhone kuba lihlahlandlela ngenca yekukhula nekugula. Kodvwa emahlahlandlela lasebandleni lakhe abefuna kumsita. Bekamsekela ngekwekuhamba futsi akhetsa insimu langakhona kuyisebenta. Ngenca yaloko, lomzalwane wawufinyelela umgomo wakhe wema-awa langu-30. Ukhona yini longamsita ebandleni lokulo kute abe lihlahlandlela lelisitako ngaMarch nobe nga-April? Kuliciniso kutsi akusitsi sonkhe lesingaba ngemahlahlandlela, kodvwa singasebentisa sikhatsi nemandla etfu kute sente lokunyenti emsebentini waJehova. Nasenta njalo, sitawukhombisa kutsi sichutjwa lutsandvo lwaJesu, njengaPawula. Yini lenye lutsandvo lwaNkulunkulu lolutasikhutsata kutsi siyente?

12. Yini lutsandvo lwaNkulunkulu lolusikhutsata kutsi siyente?

¹² Kwesibili, indlela Nkulunkulu lasitsandza ngayo kufanele isente sitsandze bazalwane betfu. Umphostoli Johane wabhala watsi: “Bazalwane labatsandzekako, nangabe  Nkulunkulu asitsandze ngalendlela, natsi sibophekile kutsi sitsandzane.” (1 Johane 4:7-11) Nangabe sikwemukela kutsandvwa nguNkulunkulu, kufanele sitsandze bazalwane betfu. (1 Johane 3:16) Singakhombisa njani kutsi siyabatsandza?

13. Ngusiphi sibonelo Jesu lasibeka endleleni latsandza ngayo labanye?

¹³ Sibonelo saJesu sisikhombisa indlela lesingabatsandza ngayo labanye. Ngesikhatsi alamhlabeni, wasita bantfu, ikakhulukati labo labatfobekile. Welapha labagulako, labangakhoni kuhamba, labangaboni, labangeva nalabangakhulumi. (Matewu 11:4, 5) Ngalokungafani nebaholi benkholo, Jesu bekakujabulela kufundzisa bantfu lebebafuna kufundza ngaNkulunkulu. (Johane 7:49) Abebatsandza bantfu labatfobekile futsi wasebenta ngekutimisela kute abasite.​—Matewu 20:28.

14. Yini longayenta kute ukhombise kutsi uyabatsandza bazalwane bakho?

¹⁴ Sikhatsi seSikhumbuto siphindze sibe sikhatsi lesikahle sekucabanga ngendlela longabasita ngayo bazalwane nabodzadze ebandleni lokulo, ikakhulukati labo lasebakhulile. Ungabavakashela yini lasebakhulile? Mhlawumbe ubaphatsele kudla, ubasite ngemsebenti wasekhaya, uhambe nabo ngemoto nawuya esifundvweni, nobe ubacele kutsi bahambe nawe ensimini. (Fundza Lukha 14:12-14.) Vumela lutsandvo lwaNkulunkulu lukwente ukhombise kutsi uyabatsandza bazalwane bakho!

15. Yini lokufanele siyitsatse njengalebalulekile?

¹⁵ Kwesitsatfu, indlela Jehova lasitsandza ngayo isenta sicolele bazalwane nabodzadzewetfu. Sonkhe satfola sono nekufa ku-Adamu, ngako kute longatsi: “Angiyidzingi inhlawulo.” Ngisho nenceku yaNkulunkulu leyetsembeke kakhulu iyayidzinga inhlawulo. Ngamunye wetfu ucolelwe sikweleti lesikhulu! Kungani kufanele sikutsatse njengalokubalulekile loku? Imphendvulo itfolakala kulomunye umfanekiso waJesu.

16, 17. (a) Yini lesingayifundza emfanekisweni waJesu wenkhosi netisebenti? (b) Ngemuva kwekuzindla ngemfanekiso waJesu, yini lotimisele kuyenta?

¹⁶ Jesu washo umfanekiso wenkhosi leyacolela sisebenti sayo lebesiyikweleta sikweleti lesikhulu sabodenariyu labangu-60 000 000. Kodvwa ngekuhamba kwesikhatsi lesisebenti asizange sicolele lesinye sisebenti lebesisikweleta sikweleti lesincane sabodenariyu labangu-100. Umusa lowakhonjiswa ngulenkhosi bekufanele wente lesisebenti sicolele lelesinye. Lenkhosi yatfukutsela kakhulu nayiva kutsi lesisebenti asikasicoleli lelesinye lebesisikweleta imali lencane. Yatsi: “Sisebenti lesibi, mine ngisesulile sikweleti sakho ngesikhatsi ungincenga. Bekungakafaneli yini nawe usihawukele lelesinye sisebenti njengobe nami ngikuhawukele?” (Matewu 18:23-35) Njengobe kwenta lenkhosi, natsi  Jehova wesule sikweleti setfu lesikhulu. Lutsandvo nemusa waJehova kufanele kusikhutsate kutsi senteni?

¹⁷ Njengobe silungiselela Sikhumbuto, singatibuta: ‘Ukhona yini umzalwane loke wangiphatsa kabi? Ngikutfola kulukhuni yini kumcolela?’ Nangabe kunjalo, lesi sikhatsi lesikahle sekulingisa Jehova, ngobe ‘ukulungele kutsetselela.’ (Nehemiya 9:17; Tihlabelelo 86:5) Nasiwujabulela umusa lomkhulu waJehova, sitabakhombisa umusa labanye futsi sibacolele ngalokusuka enhlitiyweni. Nangabe singabatsandzi futsi singabacoleli bazalwane betfu, akukafaneli silindzele kutsi Jehova asitsandze futsi asicolele. (Matewu 6:14, 15) Nasicolela labanye, akushintji kutsi basivise buhlungu, kodvwa loko kutasenta sibe nelikusasa lelijabulisako.

18. Lutsandvo lwaNkulunkulu lwamsita njani dzadze lotsite kutsi abeketelele emaphutsa alomunye dzadze?

¹⁸ Kungahle kube matima kubeketelela emaphutsa ebazalwane nabodzadzewetfu. (Fundza Efesu 4:32; Kholose 3:13, 14.) Lomunye dzadze lowakwenta loko ngu-Lily. ^[1] (Fundza kwatiswa lokusekugcineni.) Wasita lomunye umfelokati libito lakhe lokunguCarol. Sibonelo saloko kutsi abemmikisa nobe ngukuphi lapho abefuna kuya khona, ahamba naye nakayotsenga futsi amentela tintfo letinyenti. Ngetulu kwako konkhe labementela kona, Carol abehlale amnyembenya futsi ngaletinye tikhatsi bekuba matima kumsita. Kodvwa Lily abenaka buntfu lobuhle baCarol futsi wachubeka amsita iminyaka leminyenti kwate kwaba ngulapho Carol asagula kakhulu futsi ashona. Nanobe kwakumatima ngaLily kusita Carol, kodvwa utsi: “Ngibuke phambili ekuboneni Carol asavusiwe. Ngifuna kumati sekete sono.” Kuyacaca kutsi lutsandvo lwaNkulunkulu lungasenta sibeketelele bazalwane nabodzadzewetfu, futsi sibuke phambili lapho bantfu sebete sono phakadze.

19. Sitasikhutsata njani ‘sipho lesingachazeki’ saNkulunkulu?

¹⁹ Jehova usinike ‘sipho sakhe lesingachazeki.’ Shengatsi singahlale sikhombisa kutsi siyabonga ngaso! Sikhatsi seSikhumbuto sisikhatsi lesikahle sekuzindla ngako konkhe Jehova naJesu labasentele kona. Shengatsi lutsandvo lwabo lungasenta silingise Jesu, sitsandze bazalwane betfu futsi sibacolele ngalokusuka enhlitiyweni.