Nkulunkulu uphe bantfu sipho lesikhetsekile—lokulilungelo lekukwati kukhuluma naye futsi bavete indlela labativa ngayo ngemthantazo. Umphrofethi Davide wathantaza watsi: “Wena lova imithandazo uyiphendvule; bonkhe bantfu bafanele kuta kuwe.” (Tihlabelelo 65:2) Kodvwa singathantaza kanjani kute siviwe nguNkulunkulu futsi asibusise?

Imithantazo lotentela yona ikuniketa litfuba lekutsi ‘utfululele inhlitiyo yakho [kuNkulunkulu],’ uvete indlela lotiva ngayo. (Tihlabelelo 62:8) Nkulunkulu Somandla uyayitsandza imithantazo lecotfo lesuka enhlitiyweni.

Nanobe Nkulunkulu aneticu letinyenti, unalo libito lakhe. “[NginguJehova], lelo libito lami.” (Isaya 42:8) Ligama lelitsi Jehova livela tikhatsi letingetulu kwa-7 000 emiBhalweni Lengcwele. Baphrofethi labanyenti bebasebentisa ligama laNkulunkulu nabakhuluma naye. Abrahama watsi: “Ngicela kutsi iNkhosi [Jehova] ingatfukutseli ngekutsi ngisakhuluma.” (Genesisi 18:30) Natsi kufanele silisebentise ligama laNkulunkulu lelitsi Jehova, nasithantaza.

Nkulunkulu uyayicondza imicabango nendlela lesitiva ngayo ngisho noma sikhuluma luphi lulwimi. LiVi lakhe liyasicinisekisa: “Nkulunkulu akakhetsi, kodvwa etiveni tonkhe wonkhe umuntfu lomesabako nalowenta lokulungile uyemukeleka kuye.”—Imisebenti 10:34, 35.

Nanobe kunjalo, kuze sitfole tibusiso taNkulunkulu kudzingeka lokungetulu nje kwekumane sithantaze. Kulesihloko lesilandzelako sitawuhlola lokudzingeka sikwente.