Ngatalelwa eCiudad Mante, esigodzini lesihle saseTamaulipas, eMexico. Takhamuti takhona tiyephana futsi tinemusa, kodvwa lokubuhlungu kutsi ngenca yebugebengu lobuhleliwe, lendzawo yagcina iyingoti.

Ngatalwa ngaba wesibili kubafana labane. Batali bami bangibhabhatisela esontfweni lemaKatolika, futsi ngekuhamba kwesikhatsi ngaba sekwayeni yelisontfo. Bengifuna kujabulisa Nkulunkulu ngoba bengikwesaba kwehlulelwa nekushiswa esihogweni.

Nangineminyaka lesihlanu, babe wetfu wahamba ekhaya. Ngeva buhlungu kakhulu futsi ngativa ngilahliwe. Bengingacondzi kutsi usishiyeleni ngobe besimtsandza kakhulu. Make besekufanele asebente ema-awa lamanyenti kute asondle.

Ngenca yalesimo ngasiyekela sikolwa futsi ngatfola litfuba lekutihlanginisa nabontsanga yami. Bangifundzisa kwetfuka, kubhema, kweba kanye nekulwa. Njengoba bengikutsandza kuhlupha labanye, ngafundza kulwa, kushaya sibhakela kanye nekaradi. Ngafundza nekusebentisa tilimato futsi ngaba sidlova. Bengivame kuba khona nakudutjulwana futsi emahlandla lamanyenti bengitikhandza ngisesitibeni sengati ngophela kufa etigangeni. Cabanga ngebuhlungu lobebuviwa ngumake wami nakangikhandza ngikuleso simo, ngobe besekufanele kube nguye longiphutfumisa esibhedlela.

Nangineminyaka lengu-16, Jorge lijaha lesakhula nalo lasivakashela ekhaya. Wasitjela kutsi unguFakazi WaJehova futsi bekafuna kucoca natsi ngemlayeto lobalulekile loseBhayibhelini. Wacala ngekusichazela tinkholelo takhe asebentisa liBhayibheli. Bengingazange sengilifundze futsi ngamangala nangifundza ngelibito laNkulunkulu nangetinjongo takhe. Jorge wacela kufundza natsi liBhayibheli futsi savuma.

Ngajabula kakhulu nangifundza kutsi imfundziso yesihogo semlilo ayikho eBhayibhelini. (Tihlabelelo 146:4; Umshumayeli 9:5) Nasengikufundzile loko angiphindzanga ngamesabisa kwenyoka Nkulunkulu. Esikhundleni saloko, ngacala kumtsatsa njengaBabe lonelutsandvo futsi lobafisela lokuhle kuphela bantfwabakhe.

 Njengobe ngichubeka nekufundza liBhayibheli ngasibona sidzingo sekwenta tingucuko ekuphileni kwami. Kwadzingeka kutsi ngifundze kutfobeka futsi ngiyekele budlova. Sangisita kakhulu seluleko lesitfolakala embhalweni wa-1 Khorinte 15:33, lotsi: “Kutihlanganisa nebantfu lababi kona imikhuba lemihle.” Ngabona kutsi kuze ngikhone kushintja bekufanele ngiyekele kutihlanganisa nebantfu labebangangikhutsati kutsi ngente lokuhle. Ngako-ke ngabalahla bangani lebenginabo ngase ngitakhela bangani labakahle ebandleni lebuKhristu, lokubantfu labebalungisa tinkinga ngekusebentisa timiso teliBhayibheli, hhayi ngetibhakela noma ngaletinye tinhlobo tebudlova.

Lomunye umbhalo lowangitsintsa kakhulu, nguRoma 12:17-19, lotsi: “Ningaphindziseli lokubi ngalokubi kunobe ngubani. .  .  . Nakungenteka, yentani konkhe lokusemandleni enu kuze nibe nekuthula nabo bonkhe bantfu. Ningatiphindziseleli,  . . . Ngobe kubhaliwe: “Jehova utsi: ‘Kuphindzisela kwami, ngimi lengitawuphindzisela.’” Ngabese ngiyakwemukela kutsi Jehova utatilungisa tintfo ngendlela yakhe nangesikhatsi sakhe. Kancane kancane ngayiyekela lemphilo yebudlova.

Angiyuze ngikukhohlwe lokwenteka ngalenye intsambama nangibuyela ekhaya. Ngahlaselwa licembu lebafana labebanebudlova lebengikadze ngikulo futsi umholi walo wangishaya kamatima emhlane watsi: “Tivikele!” Kulowo mzuzu, ngashaya umthandazo lomfishane ngacela Jehova kutsi angisite ngikubeketelele lokuhlaselwa. Ngisho noma ngativa ngifutfumala kutsi angitiphindziselele, kodvwa ngabayekela ngabaleka. Ngakusasa ngahlangana nalomholi walelicembu. Ngafisa kumbamba ngetandla kodvwa ngaphindze ngacela Jehova kutsi angisite ngitibambe. Lokwangimangalisa kutsi lelijaha leta kimi latsi: “Ngicela ungicolele ngalokwenteke itolo ebusuku. Nangikhuluma liciniso, nami ngiyafisa kuba njengawe. Ngifuna kufundza liBhayibheli.” Kwangijabulisa kakhulu kutsi ngakhona kutibamba! Umphumela waloko waba kutsi sabese sicala kufundza liBhayibheli ndzawonye.

Lokubuhlungu kutsi wonkhe umndeni wakitsi wabese uyayekela kufundza liBhayibheli. Noma kunjalo, ngakhetsa kuchubeka ngifundza liBhayibheli futsi angivumelanga lutfo kutsi lungiphatamise. Bengati kutsi kutihlanganisa njalo nebantfu baNkulunkulu bekutangisita futsi bengitawutfola umndeni lokahle. Ngachubeka ngitfutfuka futsi ngemnyaka wanga-1991 ngabhajatiswa ngaba nguFakazi WaJehova.

Benginenhlitiyo lembi, ngingacabangelani futsi ngineludlame. LiVi laNkulunkulu lakushintja ngalokuphelele kuphila kwami. Nyalo sengishumayela umlayeto weliBhayibheli kunoma ngubani longilalelako. Sekuphele iminyaka lengu-23 solo ngisebentisa sikhatsi sami enkonzweni yasikhatsi sonkhe.

Ngaphindze ngaba sisebenti sekutitsandzela ehhovisini leligatja laBoFakazi BaJehova eMexico. Ngesikhatsi ngilapho ngahlangana nadzadze lokhutsele libito lakhe nguClaudia. Nga-1999 ngamtsatsa waba ngumkami. Ngimbonga kakhulu Jehova ngalesibusiso langipha sona lesingumngani locotfo!

Sakhonta kanyekanye ebandleni leLulwimi Lwetandla leliseMexico sifundzisa labangeva etindlebeni ngaJehova. Ngekuhamba kwesikhatsi sacelwa kutsi siye eBelize kuyofundzisa bantfu bakhona liBhayibheli. Ngisho nome site lokungako, kodvwa sinato tintfo lesitidzingako kute sijabule. Kute lokungasenetisa ngephandle kwako.

Ngekuhamba kwesikhatsi make wabese uyachubeka nekufundza liBhayibheli wagcina abhajatisiwe waba nguFakazi WaJehova. Umnaketfu lomdzala kanye nemndeni wakhe nabo sebaBoFakazi BaJehova. Labanye labebabangani bami lengake ngabacocela ngetindzaba teliBhayibheli nabo sebakhonta Jehova.

Lokubuhlungu kutsi labanye bomnaketfu bafa ngenca yekutsi abazange bayekele kuba tidlova. Kube nami ngachubeka ngiphila njengabo, kungenteka ngabe sengafa. Ngimbonga kakhulu Jehova ngekungisondzeta kuye nakubakhulekeli bakhe, labangibeketelela futsi baba nemusa nabangifundzisa kusebentisa timiso teliBhayibheli ekuphileni kwami.