Lokuhlangenwe nako lokumbalwa kwaseBritain kutakusita kute ubone kutsi ngusiphi sizatfu lesingakwenta ungaphelelwa litsemba. Utawuphindze ubone kutsi yini longayenta kute ‘ujike sinkhwa sakho emantini,’ ukhone kusita labo labasengakalemukeli liciniso.—Shu. 11:1.

Lokunye lokubaluleke kakhulu lokufanele ukwente, kuchubeka ukhonta Jehova. Kufanele unamatsele ecinisweni futsi ubambelele kuJehova. (Dut. 10:20) Nguloko lokwentiwa nguGeorgina. Nakacala kuchutjelwa sifundvo boFakazi BaJehova nga-1970, indvodza yakhe, Kyriacos yatfukutsela kakhulu. Yetama kumyekelisa kufundza, beyingabavumeli boFakazi kutsi bangene kayo futsi yatsatsa tonkhe tincwadzi taboFakazi BaJehova leyatitfola endlini.

Ngesikhatsi Georgina acala kuya esifundvweni, Kyriacos kwamtfukutselisa kakhulu loko. Ngalelinye lilanga waya eHholweni leMbuso kute ayewulwisa labebalapho. Lomunye dzadze lobekaseHholweni nakeva kutsi Kyriacos usikhuluma kahle siGriki kunesiNgisi, washayela lomunye umzalwane lokhuluma siGriki wakulelinye libandla kute atewulekelela. Kyriacos wehlisa umoya njengobe lomzalwane abekhuluma naye ngemusa. Lomzalwane wafundza naye liBhayibheli tinyanga letimbalwa. Nobe kunjalo, Kyriacos wabese uyayekela kufundza.

Kwaphela iminyaka lemitsatfu, Georgina aphikiswa yindvodza yakhe. Kyriacos watsi utawehlukana naye nangabe abhajatiswa. Ngelilanga labhajatiswa ngalo, Georgina wathantaza kuJehova amcela kutsi Kyriacos angamlahli. Nabefika boFakazi batemtsatsa kute kuyiwe emhlanganweni, Kyriacos watsi kubo: “Hambani sitanilandzela ngemoto yetfu.” Waba khona eluhlelweni lwasekuseni futsi wambona umfati wakhe abhajatiswa.

Ngemuva kwekutsi Kyriacos sekalehlisile lizinga labephikisa ngalo umfati wakhe, kancane kancane wenta tingucuko letinkhulu. Ngemuva kweminyaka lengu-40 Georgina ahlangene naboFakazi, wabona indvodza yakhe ibhajatiswa. Yini leyasita Kyriacos? Utsi: “Ngajatjuliswa nguGeorgina ngobe akazange avumele lutfo kutsi lumyekelise kukhonta Jehova.” Georgina uyachaza: “Ngisho nobe indvodza yami yayingiphikisa, kute lobekungangivimba kutsi ngikhonte Nkulunkulu wami. Ngaso sonkhe sikhatsi ngangithantaza kuJehova futsi angizange ngiphelelwe litsemba.”

Lokunye lokungasita umlingani wakho wemshado, kutsi wena ube nebuntfu bebuKhristu. Umphostoli Phetro wayala bafati labangemaKhristu: “Tfobelani emadvodza enu, kuze kutsi nakukhona emadvodza langalikholwa livi, nawo azuzeke ngaphandle kwenkhulumo, azuzwe yintfobeko yebafati bawo.” (1 Phet. 3:1) Christine wasisebentisa leseluleko nanobe kwatsatsa iminyaka kutsi indvodza yakhe ibe ngumKhristu. Nakaba nguFakazi eminyakeni lengu-20 leyendlulile, indvodza yakhe John, beyingakholelwa kuNkulunkulu. John abengafuni kutihlanganisa nenkholo nanobe abona kutsi inkholo lensha yaChristine yayibaluleke kakhulu kuye. John utsi: “Ngangibona kutsi iyamjabulisa. Wacala kuba ngumuntfu lengetsembela kuye futsi loko kwangisita etimeni letinyenti letilukhuni.”

Christine akazange afune ngenkhani kutsi indvodza yakhe ibe senkholweni labekakuyo. John utsi: “Christine wabona tisuka nje kutsi kuncono angakhulumi nami ngenkholo yakhe, wangibeketelela ngafundza ngesikhatsi sami nangendlela lengifuna ngayo.” Christine nakabona tihloko ku-Sicongosekulindza nobe ku-“Phaphama!” latiko kutsi titamjabulisa John, mhlawumbe letikhuluma ngesayensi nobe ngemvelo, abeyikhombisa indvodza yakhe bese utsi: “Ngicabanga kutsi utakujabulela kufundza letihloko.”

Ngemuva kwesikhatsi, John watsatsa umhlalaphansi emsebentini wase wenta umsebenti wekulima ingadze. Njengobe abesanesikhatsi lesinyenti sekucabanga ngemibuto lejulile lephatselene nekuphila, wacala kutibuta: ‘Samane nje saba khona yini nobe sadalelwa injongo letsite?’ Ngalelinye lilanga lomunye umzalwane lobekacoca naJohn wambuta: “Kungaba njani ngikuchubele sifundvo seliBhayibheli?” John utsi: “Ngesizatfu sekutsi besengicalile kukholelwa kuNkulunkulu, ngavuma kutsi angifundzele.”

Kungaphelelwa litsemba kwaChristine kwaba yintfo lebaluleke kakhulu. Ngemuva kwekuthantaza iminyaka lengu-20 acela kutsi John amane emukele liciniso, ekugcineni wabhajatiswa. Nyalo bakhonta Jehova bobabili ngenkhutsalo. John uyakhumbula: “Timbili tintfo letangenta ngaba nguFakazi—ngumusa nebungani lengaboniswa bona boFakazi. Nangabe ushade nalomunye waboFakazi BaJehova, usuke unemlingani wemshado lowetsembekile nalote bugovu.” Christine wawasebentisa emavi laku-1 Phetro 3:1, futsi aba nemiphumela lemihle.

Kutsiwani ngalabo lesibachubela tifundvo teliBhayibheli ngesizatfu lesitsite labaphelelwa lutsandvo labebanalo ekucaleni? INkhosi Solomoni yabhala: “Ekuseni hlanyela inhlanyelo yakho, ungayekeli kusebenta lize liyewushona, ngobe awuyati lenguyona itawuphumelela, kutsi ngulena yini nome nguleyo, nome totimbili tiyawuphumelela kahle ngalokufananako.” (Shu. 11:6) Ngasikhatsi inhlanyelo yeliciniso ingase itsatse iminyaka kutsi ihlume. Nobe kunjalo, umuntfu angase ngekuhamba kwesikhatsi akubone kubaluleka kwekusondzela kuNkulunkulu. (Jak. 4:8) Kuliciniso kutsi ngalelinye lilanga ungase umangale nawumbona alitsatsa liciniso.

Cabanga nga-Alice lowesuka eNdiya watfutsela eNgilandi. Wacala kufundza liBhayibheli nga-1974. Abekhuluma siHindi kodvwa afuna kutfutfukisa siNgisi sakhe. Alice wachutjelwa sifundvo iminyaka letsite futsi abeya kuleminye imihlangano ebandleni lesiNgisi. Abati kutsi loko lakufundzako kuliciniso kodvwa abengaboni kutsi kubaluleke kangakanani. Ngaphandle nje kwaloko, abenake kakhulu imali futsi atsandza kutijabulisa. Ngekuhamba kwesikhatsi Alice wayekela kufundza.

Cishe ngemuva kweminyaka lengu-30, Stella lobekachubela Alice sifundvo, watfola incwadzi layibhalelwe ngu-Alice. Lencwadzi yayitsi: “Ngiyati kutsi utawujabula kwati kutsi sifundvo sakho seliBhayibheli lowacala kusichuba nga-1974, sibhajatisiwe kulomhlangano wesigodzi lesisandza kuba nawo. Ube sibonelo lesihle kakhulu ekuphileni kwami. Wayihlanyela inhlanyelo yeliciniso kimi, ngisho nobe ngaleso sikhatsi bengingakakulungeli kutinikela kuNkulunkulu, lenhlanyelo yeliciniso yahlala engcondvweni yami yangena nasenhlitiyweni.”

Kwakwentekeni? Alice uyachaza kutsi wacindzeteleka kakhulu nakushona indvodza yakhe nga-1997. Wathantaza kuNkulunkulu. Kungakapheli nemizuzu lelishumi, boFakazi lababili labakhuluma siPunjabi befika kakhe bamshiyela lipheshana lelinesihloko lesitsi Liyini Litsemba Ngalabatsandzekako Labafile? Alice wabona kutsi umthantazo wakhe uphendvulekile wase uncuma kutihlanganisa naboFakazi BaJehova. Kodvwa abengabatfola kuphi? Watfola bhukwana wakhe lomdzala lonelikheli laliniketwa nguStella, lelibandla lesiPunjabi. Alice waya eHholweni leMbuso futsi bazalwane nabodzadze labakhuluma siPunjabi bamemukela ngemusa. Alice utsi: “Lutsandvo labangibonisa lona lwangitsintsa kangangekutsi ngisho sengihambile lwangisita kwaba shengatsi lungetfule umtfwalo kulokucindzeteleka kwami.”

Wacala kuya njalo esifundvweni futsi wachubeka nesifundvo sakhe seliBhayibheli, wafundza kukhuluma nekufundza kahle siPunjabi. Nga-2003 wabhajatiswa. Incwadzi layibhalela Stella iphetsa ngekutsi: “Ngibonga kakhulu ngekuhlanyela kwakho leyo nhlanyelo eminyakeni lengu-29 leyendlulile nekungibekela sibonelo lesihle kutsi ngisilandzele.”

“Ngibonga kakhulu ngekuhlanyela kwakho leyo nhlanyelo eminyakeni lengu-29 leyendlulile nekungibekela sibonelo lesihle kutsi ngisilandzele.”—Alice

Yini longayifundza kuletibonelo? Kungenteka kutsatse sikhatsi lesidze kunaleso losicabangako, kodvwa nangabe umuntfu afuna kwati Nkulunkulu, etsembekile futsi atfobekile, Jehova utawenta kutsi liciniso likhule enhlitiyweni yakhe. Khumbula loko lokwashiwo nguJesu emfanekisweni wakhe: ‘Inhlanyelo iyamila ikhule, kodvwa [umhlanyeli] yena abe angati kutsi ikhula njani. Umhlaba ngekwawo uveta kudla: Kucala kube likhaba, bese kuyabhaceka, kube netibhuluja leticinile.’ (Mak. 4:27, 28) Loko kukhula kwenteka kancane kancane futsi kutivelela ‘ngekwako.’ Ecinisweni, ummemeteli weMbuso akati kutsi loko kungenteka njani. Ngako-ke, chubeka uhlanyela kakhulu. Kungenteka kutsi uvune kakhulu.

Ungakukhohlwa kubaluleka kwemthantazo. Georgina naChristine bachubeka bathantaza kuJehova. ‘Nawucinisela njalo emthantazweni’ futsi ungalilahli litsemba, ‘emvakwemalanga lamanyenti’ ungaphindze usitfole ‘sinkhwa’ sakho lobewusijike emantini.—Rom. 12:12; Shu. 11:1.