1, 2. Yini Jesu layenta ngebusuku bangaNisan 14, 33 C.E.? (Buka sitfombe lesisekucaleni kwalesihloko.)

SEKUHLWILE, kodvwa inyeti legcwele ikhanya eJerusalema. Kusebusuku bangaNisan 14, 33 C.E. Jesu nebaphostoli bakhe bacedza kugubha umkhosi weliPhasika, lobewukhumbuta ema-Israyeli ngekukhululwa kwawo ebugcilini eGibhithe eminyakeni lengu-1 500 leyengcile. Anebaphostoli bakhe labangu-11 labetsembekile, Jesu wacalisa umkhosi lobalulekile lobewutabakhumbuta ngekufa labetawubhekana nako ngalo lelo langa. *—Mat. 26:1, 2.

² Jesu wabonga futsi wendlulisa sinkhwa lesingenambiliso kubaphostoli bakhe, watsi: “Tsatsani nidle.” Watsatsa nendzebe yeliwayini, wabonga futsi watsi: “Natsani kuyo nonkhe.” (Mat. 26:26, 27) Jesu abengeke abanikete lokunye kudla, kepha bekusekunyenti labetakutjela baphostoli bakhe labetsembekile kulobo busuku lobubalulekile.

3. Lesihloko sitawuphendvula miphi imibuto?

³ Jesu wasicalisa kanjalo-ke Sikhumbuto sekufa kwakhe, lesibitwa  nangekutsi “Sidlo SeNkhosi Sakusihlwa.” (1 Khor. 11:20) Mayelana naso, labanye bangabuta batsi: Kungani kubalulekile kukhumbula kufa kwaJesu? Simelelani sinkhwa kanye neliwayini? Singasilungiselela njani Sikhumbuto? Bobani lokufanele badle futsi banatse letifanekiselo? EmaKhristu ativa njani ngaloko imiBhalo lekushoko ngelitsemba lawo?

4. Kufa kwaJesu kwasivulela litfuba lani?

⁴ Njengobe sisitukulwane sa-Adamu, sazuza sono nekufa. (Rom. 5:12) Kute umuntfu lonesono longanika Nkulunkulu inhlawulo yemphilo yakhe nome ahlawulele labanye. (Hla. 49:6-9) Kepha ngekufa kwakhe, Jesu wanikela lokukuphela kwemhlatjelo lowemukelekako—lokungumtimba lote sono nengati yakhe leyacitseka. Ngekwetfula umhlatjelo wakhe kuNkulunkulu, Jesu wasivulela litfuba lekutsi sikhululwe esonweni nasekufeni siphindze sitfole sipho sekuphila lokuphakadze.—Rom. 6:23; 1 Khor. 15:21, 22.

5. (a) Sati ngani kutsi Nkulunkulu naKhristu bayabatsandza bantfu? (b) Kungani kufanele sibe khona esikhumbutweni sekufa kwaJesu?

⁵ Lelilungiselelo lenhlawulo likhombisa kutsi Nkulunkulu uyabatsandza bantfu. (Joh. 3:16) Umhlatjelo waJesu ukhombisa kutsi naye uyasitsandza. Phela ngesikhatsi asaphila ezulwini futsi ‘ayingcweti yekwakha’ yaNkulunkulu, Jesu ‘abejabulela bantfu bonkhe.’ (Taga 8:30, 31) Kubonga Nkulunkulu neNdvodzana yakhe kufanele kusikhutsate kutsi sibe khona esikhumbutweni sekufa kwaJesu, futsi ngekwenta njalo sitawube silalela umyalo lotsi: “Chubekani nikwenta, ningikhumbula.”—1 Khor. 11:23-25.

6. Kufanele sisitsatse njani sinkhwa neliwayini lokusetjentiswa eSikhumbutweni?

⁶ Ngesikhatsi acalisa Sikhumbuto, Jesu akazange ashintje sinkhwa neliwayini kutsi kube yinyama nengati yakhe ngalokusimangaliso. Esikhundleni saloko, naku lakusho ngesinkhwa: “Loku kusho umtimba wami.” Mayelana neliwayini watsi: “Loku kusho ‘ingati yami yesivumelwane,’ letawucitfwa ngenca yalabanyenti.” (Mak. 14:22-24) Kuyacaca-ke kutsi sinkhwa neliwayini kufanele kutsatfwe njengetifanekiselo.

7. Simelelani sinkhwa lesisetjentiswa eSikhumbutweni?

⁷ Ngalomkhosi lobalulekile nga-33 C.E., Jesu wasebentisa sinkhwa lesite imbiliso lesasisele emkhosini weliPhasika. (Eks. 12:8) Ngaletinye tikhatsi, eBhayibhelini imbiliso imelela konakala nobe sono. (Mat. 16:6, 11, 12; Luk. 12:1) Ngako-ke, kusebentisa kwaJesu sinkhwa lesite imbiliso kwakubalulekile ngobe besiwumelela kahle umtimba wakhe lote sono. (Heb. 7:26) Sinkhwa lesinjalo ngiso lesisetjentiswako eSikhumbutweni.

8. Imelelani indzebe yeliwayini lesetjentiswa eSikhumbutweni?

⁸ Liwayini lelasetjentiswa nguJesu ngaNisan 14, 33 C.E., lalimelela ingati yakhe njengobe nalamuhla indzebe yeliwayini lesetjentiswa eSikhumbutweni imelela ingati yakhe. EGolgotha, lokuyindzawo lebeyingaphandle kweJerusalema, ingati yaJesu yacitseka “kute kutsetselelwe tono.” (Mat. 26:28; 27:33) Ngesizatfu sekutsi sinkhwa neliwayini lokusetjentiswa eSikhumbutweni kumelela umhlatjelo waJesu loligugu lowanikelwa ngenca yebantfu labalalelako, nangesizatfu sekutsi siyalijabulela lelo lungiselelo lelutsandvo, kubalulekile kutsi sisilungele Sidlo SeNkhosi Sakusihlwa saminyaka yonkhe.

9. (a) Kungani kubalulekile kuhambisana nekufundvwa kweliBhayibheli kwemalanga eSikhumbuto? (b) Utiva njani ngenhlawulo yaJesu?

⁹ Kuhambisana nekufundvwa kweliBhayibheli  kwemalanga eSikhumbuto lokutfolakala kubhukwana lotsi Kuhlolisisa ImiBhalo Malanga Onkhe, kutasisita kutsi sizindle ngaloko Jesu lakwenta ngaphambi nje kwekutsi afe. Loko kutawenta tinhlitiyo tetfu tisilungele Sidlo SeNkhosi Sakusihlwa. * Lomunye dzadze wabhala: “Sisibuke ngalabovu Sikhumbuto. Siba ngumkhosi lokhetsekile minyaka yonkhe. Ngikhumbula ngisemngcwabeni . . . ngibuka babe wami lebengimtsandza futsi ngicala kuyijabulela ngalokusuka enhlitiyweni inhlawulo yaJesu. . . . Ngangiyati kahle yonkhe imibhalo futsi ngikwati nekuyichaza! Kodvwa ngesikhatsi ngiva buhlungu bekushonelwa, kwaba ngukhona inhlitiyo yami ijabula kakhulu ngaloko lokutawufezwa yinhlawulo yaJesu leligugu.” Ecinisweni, nasilungiselela Sikhumbuto kuhle kutsi sicabange ngendlela umhlatjelo waJesu losikhulula ngayo ekugcilatweni sono nekufa.

10. Yini lenye lesingayenta kute silungiselele Sikhumbuto?

¹⁰ Kulungiselela Sikhumbuto kungase kuhlanganise kuhlela kwandzisa umsebenti wetfu wekushumayela ngetindlela letitsite, mhlawumbe sibe ngemahlahlandlela lasitako ngesikhatsi seSikhumbuto. Njengobe simema labo lesibafundzela liBhayibheli nalabanye kutsi bete emkhosini weSidlo SeNkhosi Sakusihlwa, sitawutfola injabulo ngekukhuluma ngaNkulunkulu, iNdvodzana yakhe, nangetibusiso letitawutfolwa ngulabo labajabulisa Jehova nalabamkhontako.—Hla. 148:12, 13.

11. Kungani Pawula atsi labanye baseKhorinte badla tifanekiselo teSikhumbuto babe bangafaneleki?

¹¹ Njengobe ulungiselela Sidlo SeNkhosi Sakusihlwa, cabanga ngaloko umphostoli Pawula lakubhalela emaKhristu asebandleni laseKhorinte. (Fundza 1 Khorinte 11:27-34.) Pawula wakwenta kwacaca kutsi nome ngubani lodla lesinkhwa futsi anatse leliwayini abe angafaneleki “utawuba nelicala emtimbeni nasengatini yeNkhosi,” Jesu Khristu. Ngako umuntfu logcotjiwe kufanele “atihlolisise yena kutsi uyafaneleka yini” ngaphambi kwekutsi adle letifanekiselo. Nakangakwenti loko, “usuke adla futsi anatsa kwehlulelwa kwakhe.” Ngesizatfu sekutiphatsa lokubi, labanyenti eKhorinte ‘besebabutsakatsaka, bagula, futsi labambalwa besebafile’ ebuhlotjeni babo naNkulunkulu. Kungenteka  kutsi labanye bebadla futsi banatsa kakhulu ngaphambi kweSikhumbuto nobe nasisachubeka, kangangekutsi abazange basakhona kucabanga kahle. Kudla letifanekiselo babe bangafaneleki kwabenta bangemukeleki kuNkulunkulu.

12. (a) Pawula wasifanisa nani Sikhumbuto, futsi ngusiphi secwayiso lasinika labo labadla tifanekiselo? (b) Yini lokufanele yentiwe ngumuntfu lodla tifanekiselo nangabe ente sono lesikhulu?

¹² Pawula wafanisa Sikhumbuto nesidlo lesihlanganyelwa nalabanye, futsi wecwayisa labadlako watsi: “Ngeke ninatse indzebe yaJehova niphindze ninatse indzebe yemadimoni; ngeke nidle ‘etafuleni laJehova’ niphindze nidle etafuleni lemadimoni.” (1 Khor. 10:16-21) Nangabe umuntfu lodla tifanekiselo eSidlweni SeNkhosi Sakusihlwa enta sono lesikhulu, kufanele acele lusito kulabadzala belibandla. (Fundza Jakobe 5:14-16.) Nangabe lona logcotjiwe akhombisa “titselo letiveta kuphendvuka,” usuke angawedzeleli umhlatjelo waJesu ngekudla tifanekiselo teSikhumbuto.—Luk. 3:8.

13. Kungani kungaba lusito kuthantaza mayelana nelitsemba lesilinikwe nguNkulunkulu?

¹³ Nasisalungiselela Sikhumbuto, sitakutfola kulusito kuthantaza mayelana nelitsemba lesilinikwe nguNkulunkulu. Kute sikhonti saJehova lesitinikele nalesingumlandzeli lowetsembekile weNdvodzana yakhe lesifuna kwedzelela umhlatjelo waJesu ngekudla letifanekiselo nangabe kungasicaceli kahle kutsi sigcotjiwe yini nobe cha. Ngako umuntfu angabona njani kutsi uyafaneleka yini kudla letifanekiselo nobe akafaneleki?

14. Sivumelwane lesisha sisebenta njani kulabo labadla tifanekiselo eSikhumbutweni?

¹⁴ Labo lekubafanele kudla tifanekiselo eSikhumbutweni bayaciniseka kutsi banencenye esivumelwaneni lesisha. Mayelana neliwayini, Jesu watsi: “Lendzebe isho sivumelwane lesisha lengisenta ngengati yami.” (1 Khor. 11:25) Ngemphrofethi Jeremiya, Nkulunkulu wabiketela kutsi utawenta sivumelwane lesisha lesehlukile esivumelwaneni seMtsetfo labekasente nema-Israyeli. (Fundza Jeremiya 31:31-34.) Wenta sivumelwane lesisha na-Israyeli waNkulunkulu. (Gal. 6:15, 16) Lesivumelwane sacinisekiswa ngemhlatjelo waKhristu futsi sentiwa sasebenta ngengati yakhe leyacitseka. (Luk. 22:20) Jesu unguMlamuleli wesivumelwane lesisha, futsi labagcotjiwe labetsembekile labahlanganyela kuso bazuza kuphila kwasezulwini.—Heb. 8:6; 9:15.

15. Bobani labanencenye esivumelwaneni seMbuso, futsi nguliphi lilungelo labatalitfola nabatawuchubeka betsembekile?

¹⁵ Bantfu lekubafanele kudla tifanekiselo eSikhumbutweni bayati kutsi banencenye esivumelwaneni seMbuso. (Fundza Lukha 12:32.) Bafundzi baJesu labagcotjiwe labangazange bamshiye, nalabahlupheka naye, batawubusa naye ezulwini. (Fil. 3:10) Ngesizatfu sekutsi basesivumelwaneni seMbuso, labo labagcotjiwe labetsembekile batawubusa naJesu njengemakhosi ezulwini kute kube phakadze. (Semb. 22:5) Bantfu labanjalo bayakufanelekela kudla tifanekiselo eSidlweni SeNkhosi Sakusihlwa.

16. Chaza kafishane kutsi usho kutsini Roma 8:15-17.

¹⁶ Labo umoya waNkulunkulu lobafakazela kutsi babantfwana bakhe ngibo kuphela lokufanele badle tifanekiselo eSikhumbutweni. (Fundza Roma 8:15-17.) Naka kutsi Pawula wasebentisa ligama lesi-Aramu lelitsi “Abha,” lelisho kutsi “Babe!” Umntfwana abengalisebentisa nakakhuluma neyise, ngobe ligama leliveta lutsandvo nenhlonipho njengaleli lelitsi “babe.” Labo labatfole ‘umoya lobenta bafakwe esiswini bentiwe emadvodzana’  babantfwana baNkulunkulu labagcotjwe ngemoya. Umoya wakhe uvumelana nemoya wabo, kuze babone kutsi bangemadvodzana aJehova lagcotjwe ngemoya. Akusiko kutsi abasakutsandzi kuphila emhlabeni. Bayaciniseka kutsi nabatawetsembeka kuze kube sekufeni, batawubusa naJesu eMbusweni wasezulwini. Lamuhla, bambalwa kuphela labasele kubalandzeli baKhristu labangu-144 000, labatfole ‘kugcotjwa lokuvela kulongcwele,’ Jehova. (1 Joh. 2:20; Semb. 14:1) Ngalomoya waNkulunkulu bayamemeta batsi: “Abha, Babe!” Buhle kakhulu buhlobo labanabo naNkulunkulu!

17. Liyini litsemba lalabagcotjiwe, futsi balitsatsa njani?

¹⁷ Nangabe ungumKhristu logcotjiwe, litsemba lasezulwini lihamba embili emithantazweni yakho. LiBhayibheli nalikhuluma ‘ngekwetsenjiswa kwendziswa’ kuJesu Khristu longuMkhwenyane ezulwini, uyati kutsi loko kusebenta kuwe futsi ukubuke ngalabovu kuba yincenye ‘yamakoti’ waKhristu. (2 Khor. 11:2; Joh. 3:27-29; Semb. 21:2, 9-14) Nangabe eVini lakhe Nkulunkulu aveta lutsandvo lanalo ngebantfwana bakhe labagcotjiwe, uyati kutsi kusuke kushiwo nakuwe. Nangabe liVi laJehova liniketa emadvodzana akhe lagcotjiwe ticondziso, umoya longcwele ukukhutsata kutsi ulalele futsi utsi: “Loku kuyasebenta nakimi.” Umoya waNkulunkulu uyavumelana nemoya wakho kutsi unelitsemba lasezulwini.

18. ‘Letinye timvu’ tinaliphi litsemba, futsi utiva njani ngalo?

¹⁸ Ngakulokunye, nawuyincenye ‘yesicumbi lesikhulu’ ‘saletinye timvu,’ Nkulunkulu ukunike litsemba lasemhlabeni. (Semb. 7:9; Joh. 10:16) Uyafuna kuphila phakadze ePharadisi futsi utfola injabulo ngekuzindla ngaloko liBhayibheli lelikushoko ngelikusasa emhlabeni. Ukubuke ngalabovu kujabulela kuthula ukanye nemndeni wakho nalabanye labalungile. Uyasilangatelela sikhatsi lapho indlala, buphuya, kuhlupheka, kugula ngisho nekufa kungasayuphindze kubahluphe bantfu. (Hla. 37:10, 11, 29; 67:6; 72:7, 16; Isa. 33:24) Ubuke embili ekwemukeleni labavusiwe ekufeni sebanelitsemba lekuphila phakadze emhlabeni. (Joh. 5:28, 29) Umbonga kakhulu Jehova ngekutsi ukubusise ngelitsemba lekuphila emhlabeni. Ngisho nome ungatidli tifanekiselo, uba khona eSikhumbutweni kuze ukhombise kubonga lonako ngemhlatjelo wenhlawulo waJesu Khristu.

19, 20. (a) Yini lokufanele uyente kute utfole kuphila lokuphakadze? (b) Ngusiphi sizatfu lesitakwenta kutsi ube khona eSikhumbutweni?

¹⁹ Ngisho nobe unelitsemba lekuphila emhlabeni nobe ezulwini, lelitsemba utalitfola kuphela nangabe unekukholwa kuJehova Nkulunkulu, kuJesu Khristu nasenhlawulweni yakhe. Kuba khona eSikhumbutweni kutakunika litfuba lekucabangisisa ngelitsemba lakho nangekubaluleka kwekufa kwaJesu. Ngako timisele kutsi ube semkhatsini wetigidzi tebantfu labatawube bakhona eSidlweni SeNkhosi Sakusihlwa ngemuva kwekushona kwelilanga ngaLesihlanu, April 3, 2015, emaHholweni eMbuso nakuletinye tindzawo emhlabeni wonkhe.

²⁰ Kuba khona eSikhumbutweni kutawenta kutsi uwubonge kakhulu umhlatjelo waJesu loyinhlawulo. Kulalelisisa inkhulumo letawube yetfulwa kutakukhutsata kutsi ukhombise lutsandvo kubomakhelwane bakho ngekubacocela tintfo lotifundzile ngelutsandvo lwaJehova nangenjongo lanayo ngebantfu. (Mat. 22:34-40) Ngako-ke, yenta konkhe lokusemandleni akho kute ube khona eSidlweni SeNkhosi Sakusihlwa.