Nkulunkulu Ubukeleleni Futsi Yini Latayenta?

“Simakadze [Jehova], umeleni khashane? Utifihleleni ngesikhatsi sisekuhluphekeni?” a—TIHLABELELO 10:1.

NAWUTSI nhla! ubuka tihloko tetindzaba kuyakukhanyela kutsi siphila ‘esikhatsini sekuhlupheka.’ Nakugadla inhlekelele emakitsi—kungaba imiphumela yekuhlaselwa tigelekece, tingoti lokufihlwa emehlo kuto, nobe kuphangalala kwebantfu lesibatsandzako—sitibuta nayi imibuto: Nkulunkulu uyabona yini kutsi kwentekani? Unayo yini indzaba ngatsi? Ukhona yini vele?

Nobe kunjalo, uke wacabanga yini kutsi makhulu kangakanani ematfuba ekutsi lokucabangako ngaNkulunkulu kushaya eceleni? Kulendzaba cabanga nganasi sibonelo: Umntfwana lotsite utfukutseliswa kutsi babe wakhe uhambile waya emsebentini. Lomntfwana uyamkhanuka babe wakhe futsi ufisa kutsi abuye. Utiva alahliwe. Lilanga lonkhe uhlabela umbuto lofanako lotsi, “Uphi Babe?”

Kulula kubona liphutsa lelikhona engcondvweni yalomntfwana. Liciniso lelisebaleni kutsi babe wakhe lomfana usebentela kondla wonkhe umndeni. Kungenteka kutsi natsi sisuke sisephutseni nasikhala sitsi, “Uphi Nkulunkulu”?

Nasi sibonelo: Bantfu labanyenti bacabanga kutsi Nkulunkulu ufanana nelijaji lelisenkantolo lelihlalele kugweba bantfu labatigelekece. Labanye bacabanga kutsi Nkulunkulu uhlalele kusitfolela umsebenti nasingasebenti, asiphe indvodza nobe umfati nobe asisite siphumelele emdlalweni wemathikithi e-lotto.

Lemibono lesisandza kuyidzingidza igudlisela kutsi nangabe Nkulunkulu angaticatululi tinkinga tetfu masinyane nobe nakangasenteli bubele, loko kusho kutsi utitsela ngalabandzako futsi akanendzaba netidzingo tetfu. Loko akusilo liciniso! Kuliciniso lesingeke siliphike kutsi nyalo Nkulunkulu Jehova wenta umsebenti lolusito kubo bonkhe bantfu kodvwa hhayi ngendlela lesifisa ngayo.

Nkulunkulu ubukeleleni futsi yini latayenta? Kute siphendvule lombuto kufanele sihlole lokwenteka kubantfu bekucala labadalwa nguNkulunkulu, sihlole indlela lobatsikameteka ngayo buhlobo bebantfu naNkulunkulu—kodvwa simo lesilungisekako lesi.

Umonakalo Lobangelwe Sono

Ase ucabange ngendlu losekuphele iminyaka idzilikile. Luphahla lwayo ludzilikile, iminyango iwele phansi, netindvonga tidzilikile. Lendlu ngalelinye lilanga yake yaba sesimeni lesihle, kodvwa  nyalo akusenjalo. Nawubuka lomonakalo lowentekile kulendlu, kuyilungisa angeke kube ngumdlalo futsi angeke kwenteke ngekucwabita kweliso.

Nyalo ase ucabange ngemonakalo lowenteka eminyakeni lengu-6 000 lendlulile ngalesikhatsi Sathane enta kutsi bo-Adamu na-Eva bavukele Nkulunkulu. Kusengakenteni loko, labantfu bekucala bebajabulela imphilo lenhle bete sono futsi banenkhaphunkhaphu yekuphila phakadze kanye netitukulwane tabo. (Genesisi 1:28) Kodvwa ngalesikhatsi benta sono, kwaba shengatsi bo-Adamu na-Eva babhidlita lomndeni lebewusetawutalwa.

Ungacali uwutsatsele phansi lomonakalo lowabangelwa ngulokuhlubuka. LiBhayibheli litsi: “Sono sangena ngemuntfu munye [Adamu] emhlabeni, sangena nekufa, kufa kwase kwendlulela kubo bonkhe bantfu.” (Roma 5:12) Ngaphandle nje kwekusiletsela kufa, sono sitsikamete buhlobo betfu neMdali futsi sasitsikameta ngisho nasemtimbeni, engcondvweni nasemiveni. Umphumela ube kutsi simo setfu nyalo sifanane nesendlu ledzilikile. Indvodza lelungile lenguJobe nayichaza simo umuntfu labhekene naso, lendzaba yayisonga ngekutsi umuntfu ‘unemalanga nje lambalwa ekuphila, nawo agcwele lusizi.’—Jobe 14:1.

Kodvwa Nkulunkulu wayekela yini kubanaka bantfu bonkhe ngalesikhatsi bo-Adamu na-Eva bona? Cha, akentanga njalo! Ecinisweni, kusukela ngaleso sikhatsi kute kube ngunyalo, Babe wetfu wasezulwini bekawusita umndeni lobantfu. Kute sikubone kahle loko Nkulunkulu lasentela kona, asesikhulume ngetindlela letintsatfu letibalulekile kute kulungiswe kabusha indlu lebeyidzilikile futsi sibone kutsi ngayinye yaletindlela ihlobana njani naloko Nkulunkulu lakwentile kute avuselele buhlobo bakhe natsi.

1 Ngemuva kwekuba asabuke lomonakalo walendlu, umnikati wayo utsatsa sincumo sekutsi uyivuselela kabusha yini nobe uyayibhidlita unomphela.

Ngemuva nje kwekuvukelwa bo-Adamu na-Eva e-Edeni, Nkulunkulu Jehova wayiveta injongo yakhe yekuvuselela buhlobo bakhe nebantfu. Watsi kulombangeli walokuvukela: “Ngitawubeka butsa emkhatsini wakho nemfati, nasemkhatsini wentalo yakho nentalo yemfati. Yona iyawufihlita inhloko yakho, wena uyawuluma sitsendze sayo.”—Genesisi 3:15.

Ngalawo mavi, Jehova wetsembisa kubhubhisa lomphembi walokuvukela lokwenteka e-Edeni. (Roma 16:20; Sembulo 12:9) Ngetulu kwaloko, Jehova wakuveta kutsi esikhatsini lesitako ‘lentalo’ itawenyula bantfu esonweni. b (1 Johane 3:8) Ngaleyo ndlela, Nkulunkulu ngalokusebaleni wetsembisa loko abetawukwenta: Wetsembisa kutsi utawusilungisa lesimo, hhayi kutsi acalele phansi adale bantfu. Kodvwa kwenta loko bekutawutsatsa sikhatsi.

2 Umdvwebi ulungisa ipulani yendlu.

Nkulunkulu Jehova wanika ema-Israyeli imitsetfo leminyenti waphindze wawadvwebela lithempeli labekatalisebentisa ekumkhonteni.  LiBhayibheli litsi: “Loko bekusitfunti nje saloko bekuta.” (Kholose 2:17) Njengepulani, lemitsetfo imelela lokutsite lokubalulekile.

Nasi sibonelo: Ema-Israyeli enta umhlatjelo wekushiswa kwetilwane kute atsetselelwe tono tawo. (Levithikhusi 17:11) Ngekwenta loko, abekhombisa umhlatjelo lobaluleke kakhulu lobewutawentiwa ngemva kweminyaka leyinkhulungwane—umhlatjelo lobewutawukhulula bantfu siphelane. c Tonkhe letincenye tendlu lengcwele kanye nelithempeli ema-Israyeli labetawukhonta kulo betikhombisa tintfo Mesiya labetatenta, kusuka ekutinikeleni kwakhe njengesihlengo kuye nasekwenyukeni kwakhe aye ezulwini.—Buka  lishadi lelisekhasini 7.

3 Kukhetfwa umakhi lotawusebentisa lepulani aphindze alungise kabusha lendlu.

Jesu abenguMesiya lotsenjisiwe lobekatawulandzela imitsetfo lebeyisetjentiswa ngema-Israyeli nakenta umhlatjelo kute anikele ngekuphila kwakhe futsi asindzise bantfu bonkhe. Johane uMbhabhatisi wabita Jesu ngekutsi “liWundlu laNkulunkulu lelisusa sono selive!” (Johane 1:29) Jesu wawemukela ngekutitsandzela lomsebenti. Watsi “Ngobe kwehla kwami ezulwini akusiko kutsi ngetela kutakwenta intsandvo yami, kepha kutakwenta intsandvo yalowo longitfumile.”—Johane 6:38.

Intsandvo yaNkulunkulu ngaJesu beyingafaki ekhatsi ‘kunikela ngemphilo yakhe kutsi ibe inhlawulo yalabanyenti’ kuphela, kodvwa beyiphindze ifake ekhatsi kwenta sivumelwane nebalandzeli bakhe ngeMbuso. (Matewu 20:28; Lukha 22:29, 30) Nkulunkulu utawusebentisa loMbuso kute afeze injongo yakhe ngebantfu. Lomlayeto lomayelana neMbuso waNkulunkulu ubitwa ngekutsi “tindzaba letinhle” ngobe uchaza kutsi Nkulunkulu ubeke hulumende ezulwini lotawubusa umhlaba wonkhe.—Matewu 24:14 NW; Danyela 2:44. d

Umsebenti Wekulungisa Uyachubeka

Ngembikwekuba Jesu enyukele ezulwini, naku lakutjela balandzeli bakhe: ‘Ngako-ke hambani, nente tive tonkhe tibe bafundzi bami, nibabhabhatise egameni leYise, neleNdvodzana, nelemoya longcwele . . . Nibokwati kutsi mine nginani onkhe emalanga, kuze kube ngusekupheleni kwetikhatsi.’—Matewu 28:19, 20.

Kulungiswa kwesimo sebantfu kwakungeke kugcine ngemva kwekufa kwaJesu. Bekutawuchubeka kute kube ‘semalangeni ekugcina’—ngalesikhatsi uMbuso waNkulunkulu sewucala kubusa umhlaba wonkhe. Sesisedvute leso sikhatsi. Loko sikwati ngobe tibonakaliso Jesu latibiketela mayelana ‘nemalanga ekugcina,’ tiyagcwaliseka lamuhla. e—Matewu 24:3-14; Lukha 21:7-11; 2 Thimothi 3:1-5.

Lamuhla, emaveni langu-236 boFakazi BaJehova balalela umyalo waJesu wekushumayela tindzaba letinhle teMbuso waNkulunkulu. Ecinisweni, nalomagazini lowufundzako ulungiselelwe kutsi ukusite ufundze lokunyenti ngalowoMbuso nekutsi yini lowutasentela yona. Ekhasini 2 kuleSicongosekulindza utawutfola nangu umlayeto: “Lomagazini udvudvuta bantfu ngetindzaba letinhle tekutsi uMbuso waNkulunkulu, hulumende sibili wasezulwini, ngekushesha utawucedza bonkhe bubi futsi wente lomhlaba ube lipharadisi. Ukhutsata bantfu kutsi babe nekukholwa kuJesu Khristu, lowafa kute sitfole kuphila lokuphakadze futsi loyiNkhosi yeMbuso waNkulunkulu.”

Nanobe nyalo uva ngekuhlaselwa kwebantfu, tinhlekelele temvelo, futsi uphindze ube netinkinga ekuphileni. Kufundza liBhayibheli kutakunika litsemba lekutsi Nkulunkulu akakabashiyi bantfu. LiBhayibheli litsi: “Akekho khashane ngisho nakumunye wetfu.” (Imisebenti 17:27) Lesetsembiso sakhe sekusinika kuphila lokwalahlwa batali betfu bekucala sitawuphumelela.—Isaya 55:11.

[Imibhalo lengentasi]

 [Lishadi/Titfombe ekhasini 7]

 (Kute ubone kwatiswa lokuhlelwe kahle, fundza incwadzi)

“Incwadzi Yetintfo Letenteka Sibili”—Loko Lokwakumelelwe Lithende Lekukhontela

LI-ALTARE

Kuvuma kwaNkulunkulu ngekutitsandzela kwemukela umhlatjelo waJesu.—HEBHERU 13:10-12.

UMPHRISTI LOMKHULU

Jesu.—HEBHERU 9:11.

1 NgeLilanga leNhlawulo, umphristi lomkhulu abenta umnikelo wetono tebantfu.—LEVITHIKHUSI 16:15, 29-31.

1 NgaNisan 14 33 C.E., Jesu wanikela ngekuphila kwakhe kute kuzuze tsine.—HEBHERU 10:5-10; 1 JOHANE 2:1, 2.

INDZAWO LENGCWELE

Simo saJesu sekuba yiNdvodzana yaNkulunkulu letelwe ngemoya, letawuphila ezulwini.—MATEWU 3:16, 17; ROMA 8:14-17; HEBHERU 5:4-6.

LIKHETHINI

Umtimba waJesu wenyama, usihenco lesehlukanisa imphilo yasemhlabeni nemphilo yasezulwini.—1 KHORINTE 15:44, 50; HEBHERU 6:19, 20; 10:19, 20.

2 Umphristi lomkhulu wendlulela kulena lenye incenye yelikhethini lelihlukanisa indzawo leNgcwele kanye nendzawo leNgcwelengcwele.

2 Ngemva kwekuba asavusiwe, Jesu wendlulela kulena lenye incenye yelikhethini ngekwenyukela ezulwini “lapho abonakala khona asimele kuNkulunkulu.”—HEBHERU 9:24-28.

INDZAWO LENGCWELENGCWELE

Lizulu.—HEBHERU 9:24.

3 Abetsi nakafika ngekhatsi kwendzawo leNgcwelengcwele, umphristi lomkhulu afafate ingati yalomhlatjelo embikwelibhokisi lesivumelwane.—LEVITHIKHUSI 16:12-14.

3 Ngekuveta kuba ligugu kwengati yakhe, Jesu abesikhombisa inhlawulo yetono tetfu lekungiyo sibili.—HEBHERU 9:12, 24; 1 PHETRO 3:21, 22.