Ngatalelwa edolobheni lelincane lasePoland lebelisedvute neJalimane. Ngakhulela emapulazini endzaweni lebeyithulile. Batali bami bebangitsandza, bebangikhutsata kutsi ngitiphatse kahle ngitimisele esikolweni kuze ngitotfola umsebenti lokahle.

Inkinga yacala ngesikhatsi sengingasahlali ekhaya, sengisenyuvesi eWrocław ngiyofundzela umtsetfo. Besenginebangani lababi. Bengivele ngiyitsandza ibhola kodvwa bangani bami bangenta ngayitsandza kakhulu. Bengifeva licembu laseWarsaw ngako bengiya kuyolibukela ngetimphelasontfo njalo nalidlala. Lebholeni bekunatfwa, kubhenywa futsi ngalesinye sikhatsi bekuliwa. Noma bengati kutsi nakungenteka ngiboshwe ngitawonakalelwa likusasa lami kodvwa bengiva ngatsi letintfo letimbi lebengitenta tinginciphisela kukhatsateka.

Besitsandza kuya ema-disco nasemaklabhini. Lapho besivame kufike silwe. Ngaboshwa kanyenti, kodvwa njalo bengiphuma ngesemagundvwane, ngalesinye sikhatsi bengidiza kuze ngiphume. Bengititjela kutsi ngiphila kamnandzi. Kodvwa lengekhatsi enhlitiyweni bengati kutsi lentfo lengiyentako yimbi. Ngako njalo ngelisontfo bengiya esontfweni ngicabanga kutsi Nkulunkulu utangitsetselela.

Ngalelinye lilanga nga-2004 kwefika BoFakazi BaJehova batoshumayela, ngavuma kufundza nabo liBhayibheli. Njengobe ngiya ngicondza kutsi kusho kutsini kuba ngumKhristu nembeza wacala kungihlupha. Ngabona kutsi kufanele ngiyekele kunatsa tjwala nekubhema ngiphindze ngishiye bangani lababi. Ngabona nekutsi bekufanele ngiyekele lokuba silwi. Nanobe bengati kutsi bekufanele ngishintje kodvwa bengichubeka ngenta tintfo letimbi.

Laba linye, ngalobunye busuku ngacala emadvodza langu-8. Angishaya ngetibhakela, angikhahlela enhloko angishiya ngilele phansi. Bengicanga kutsi ngitakufa ngalelo langa, ngathantaza kuJehova ngatsi: “Ngiyacolisa Jehova ngekwephula imitsetfo yakho. Nangingasindza lamuhla, ngiyakwetsembisa kutsi ngitofundza  naBoFakazi futsi ngiyekele tintfo letimbi.” Ngasindza futsi ngasigcina setsembiso sami sekufundza liBhayibheli naBoFakazi.

Nga-2006 ngatfutsela eNgilandi. Bengifuna kutfola umsebenti lotangiholela imali lenyenti besengibuyela ePoland ngiyochubeka nekufundza. Ngisachubeka nekufundza liBhayibheli kukhona umBhalo lowangitsintsa kakhulu. Umphostoli Pawula watsi: “Ngako tonkhe tintfo ngititsatsa njengaletilite ngesizatfu selwati lolukhulu lwaKhristu Jesu iNkhosi yami. Ngenca yakhe ngilahlekelwe ngito tonkhe tintfo futsi ngititsatsa njengencumbi yetibi, kuze ngitfole Khristu.” (Filiphi 3:8) Kulelivesi ngabona kutsi umphostoli Pawula bekafana nami, naye bekafundzele umtsetfo futsi asidlova. (Imisebenti 8:3) Kodvwa wabona kutsi indlela lencono yekuphila kukhonta Nkulunkulu aphindze etame kulingisa Jesu. Kucabanga ngalolokwentiwa nguPawula kwangisita ngabona kutsi kuba nemali lenyenti nekubasidlova bekungeke kungente ngijabule. Ngabona kutsi nangabe Pawula akhona kushintja nami bengingakhona. Ngabese ngincuma kuhlala eNgilandi ngingasachubeki nekufundzela umtsetfo.

Kufundza lokunyenti ngaJehova kwangisondzeta kuye. Kwangijbulisa kwati kutsi utsembisa kubacolela bonkhe labaphendvukako. (Imisebenti 2:38) Ngesikhatsi ngizindla ngencwadzi ya-1 Johane 4:16 letsi “Nkulunkulu ulutsandvo” ngabona kutsi yini leyenta Nkulunkulu abenyanye budlova.

Lokunye lokwangichaza, yindlela BoFakazi labatiphatsa ngayo. Kwavele kwangicacela kutsi betama kukwenta konkhe labakufundzako. Nami ngafisa kuba nguFakazi. Ekugcineni ngakhona kuyekela imikhuba Jehova langayitsandzi, nga-2008 ngakhombisa kutsi sengifuna kuba ngulomunye waBoFakazi BaJehova, ngabhajatiswa.

LiBhayibheli lingisitile ngakhona kuyekela tjwala, kubhema, kuba silwi nekuba ngumlandzeli webhola. Nyalo sengikhonta Jehova, futsi ngifundzisa labanye liBhayibheli. Solo ngisayitsandza ibhola kodvwa lesekubaluleke kakhulu kimi kukhonta Nkulunkulu.

Nyalo mine nemkami lomuhle Esther sikhonta Jehova. Kuyasijabulisa kufundzisa bantfu labakhuluma siPolish liBhayibheli. Ngiyacala kujabula ekuphileni kwami. Nginanembeza lohlantekile futsi ngenetisekile.