SIHLOKO LESINGUMGOGODLA
Timphi Tiyamjabulisa Yini Nkulunkulu?
Bewungaphendvula utsini? Bantfu labanyenti bacabanga kutsi Nkulunkulu uyatitsandza timphi ngobe kadzeni watjela letinye tinceku takhe kutsi tiyokulwa. LiBhayibheli liyasho vele kutsi Nkulunkulu watitfuma kutsi tiyokulwa. Kantsi labanye bayati kutsi Jesu iNdvodzana yaNkulunkulu wafundzisa balandzeli bakhe kutsi batsandze titsa tabo. (Matewu 5:43, 44) Loko kubenta bacabange kutsi Nkulunkulu sewashintja.
Wena ucabangani? Timphi tiyamjabulisa yini Nkulunkulu? Nangabe tiyamjabulisa, ucabanga kutsi uba seluhlangotsini lwabani nakuliwa? Kwati timphendvulo talemibuto kungayitsintsa indlela locabanga ngayo mayelana nemphi. Asesitsi kuyaliwa, uyati kutsi Nkulunkulu uyativumela timphi futsi usekela nine, bekungakujabulisa ngoba bewungaciniseka kutsi nitawuncoba. Asesitsi ke manje Nkulunkulu sewusekela titsa tenu, bewungativa njani? Asingabati kutsi loku bekungayishintja indlela locabanga ngayo ngetimphi.
Kubalulekile kwati kutsi tiyamjabulisa yini Nkulunkulu timphi, ngoba kutasisita simati kutsi ungumuntfu lonjani. Nangabe timphi tikuvise buhlungu kakhulu ekuphileni kwakho asingabati kutsi uyafuna kuyati imphendvulo yalombuto lolandzelako: Nkulunkulu ukhutsata kutsi kuliwe yini, nobe akanenandzaba nebantfu uyabindza nje angenti lutfo ngisho nobe bantfu bacindzeteleka?
Kutakumangalisa kwati kutsi lokushiwo liBhayibheli kwehluke kakhulu kunaloko lokucatjangwa bantfu. Nkulunkulu abesolo atenyanya timphi kusukela kadzeni futsi nalamuhla solo akatitsandzi. Ase sicoce ngalokushiwo liBhayibheli mayelana netimphi letaliwa kadzeni, nangesikhatsi Jesu alapha emhlabeni. Loku kutasisita sati kutsi Nkulunkulu utsini ngetimphi nekutsi titawuhlale tikhona yini.
