Imisebenti Yebaphostoli 8:1-40
8 Sawula wakusekela kubulawa kwaStefano.+
Kusukela ngalelolanga, libandla lebeliseJerusalema lahlushwa kakhulu; bonkhe basakatekela etifundzeni taseJudiya naseSamariya, kwasala baphostoli.+
2 Emadvodza lesaba Nkulunkulu atsatsa sidvumbu saStefano asingcwaba, futsi amkhalela kakhulu.
3 Sawula wase ucala kulihlasela kabuhlungu libandla. Bekangena emtini ngemuti, ahudvula labadvuna nalabasikati abayise ejele.+
4 Nanobe kunjalo, labo lebebasakatekele kuletifundza bebahamba kuto tonkhe tindzawo bashumayela tindzaba letimnandzi telivi laNkulunkulu.+
5 Filiphu waya edolobheni laseSamariya+ futsi washumayela ngaKhristu.
6 Ticumbi tebantfu betikunaka loko lebekakusho, timlalela, tiphindze tibuke netibonakaliso lebekatenta.
7 Bantfu labanyenti bebanemadimoni, futsi lamadimoni bekamemeta kakhulu, bese ayaphuma kubo.+ Ngetulu kwaloko, labanyenti lebebakhubatekile nalebebachuta belashwa.
8 Ngako bantfu kulelidolobha bajabula kakhulu.
9 Kulelidolobha bekunendvodza lebeyibitwa ngekutsi nguSimoni, futsi beseyinesikhatsi lesidze yenta imilingo, imangalisa bantfu baseSamariya, itsi yona ingumuntfu lomkhulu.
10 Bonkhe bantfu, kusukela kubantfukatana kuya kubantfu labasetikhundleni letiphakeme bebayibukisisa, batsi: “Lomuntfu ungeMandla aNkulunkulu, eMandla Lamakhulu.”
11 Ngako bebayinaka ngobe besekusikhatsi lesidze ibamangalisa ngekwenta imilingo.
12 Nanobe kunjalo, ngesikhatsi Filiphu amemetela tindzaba letimnandzi teMbuso waNkulunkulu+ netelibito laJesu Khristu, labadvuna nalabasikati bamkholwa base bayabhajatiswa.+
13 Simoni naye waba likholwa, futsi ngemuva kwekubhajatiswa wachubeka anaFiliphu.+ Bekamangala nakambona enta tibonakaliso netimangaliso letinkhulu.
14 Ngesikhatsi baphostoli eJerusalema beva kutsi bantfu baseSamariya balemukele livi laNkulunkulu,+ batfumela Phetro naJohane kutsi baye khona.
15 Ngako baya, bafike babathantazela kuze batfole umoya longcwele.+
16 Ngobe bekute namunye kubo lobekawutfolile, njengobe bebabhajatiswe egameni leNkhosi Jesu kuphela.+
17 Ngako bababeka tandla,+ futsi batfola umoya longcwele.
18 Ngesikhatsi Simoni abona kutsi bantfu batfola umoya ngekutsi baphostoli bababeke tandla, wetsembisa kunika labaphostoli imali,
19 watsi: “Nami nginikeni lamandla, kuze kutsi nobe ngubani lengimbeka tandla atfole umoya longcwele.”
20 Kodvwa Phetro watsi kuye: “Shengatsi imali yakho ingabhubha nawe, ngobe ucabanga kutsi ungatfola sipho saNkulunkulu ngemali.+
21 Wena awungeni ndzawo kulomsebenti, ngobe inhlitiyo yakho ayisicotfo emehlweni aNkulunkulu.
22 Ngako-ke phendvuka kulobubi bakho, uncuse Jehova* futsi ushintje imicabango yakho lemibi kuze akutsetselele nakungenteka;
23 ngobe ngiyabona kutsi ungushevu lobabako,* nesigcili sebubi.”
24 Simoni waphendvula watsi: “Ngicela ningincusele kuJehova* kuze letintfo lenitishito tingangehleli.”
25 Ngako batsi nasebafakaze ngalokuphelele, futsi sebakhulumile ngelivi laJehova,* babuyela eJerusalema, bahamba bamemetela tindzaba letimnandzi emadolobhaneni lamanyenti emaSamariya.+
26 Ingilosi+ yaJehova* yakhuluma naFiliphu, yatsi: “Hamba uye eningizimu, emgwacweni losuka eJerusalema futsi lowehlela eGaza.” (Lomgwaco bewulugwadvule.)
27 Ngako Filiphu wahamba, futsi wahlangana nendvuna yesigodlo* saseTopiya, lebeyisiphatsimandla lesingephansi kwaKhandase indlovukazi yaseTopiya, futsi lendvuna beyinakekela yonkhe imali yakhe. Beyiye eJerusalema kuze iyokhonta Nkulunkulu,+
28 futsi beseyibuyela emuva ihleti enkalishini yayo, ifundza incwadzi yemphrofethi Isaya ngelivi lelivakalako.
29 Umoya waNkulunkulu watsi kuFiliphu: “Hamba usondzele kulenkalishi.”
30 Filiphu wagijima eceleni kwalenkalishi, weva lendvuna ifundza incwadzi yemphrofethi Isaya ngelivi lelivakalako, wase utsi kuyo: “Uyakucondza* yini loku lokufundzako?”
31 Yona yatsi: “Ngingakucondza njani nangabe kute umuntfu longichazelako?” Ngako yancenga Filiphu kutsi agibele ahlale nayo.
32 Lencenye yemBhalo lebeyifundvwa ngulendvuna ngulena: “Waletfwa njengemvu iya ekuhlatjweni, nanjengeliwundlu lelibindzile embikwaloyo lolihhulako, akawuvulanga umlomo wakhe.+
33 Ngesikhatsi edzelelwa akazange ehlulelwe kahle.+ Ngubani lotawukhuluma ngesitukulwane sakhe? Ngobe kuphila kwakhe kutawususwa emhlabeni.”+
34 Lendvuna yatsi kuFiliphu: “Ngicela ungitjele, lomphrofethi ukhuluma ngabani lapha? Utisho yena yini nobe usho lomunye umuntfu?”
35 Filiphu wase uyakhuluma, futsi wacala ngalombhalo, wayifundzisa tindzaba letimnandzi letimayelana naJesu.
36 Njengobe bahamba, befika lapho bekunemanti khona, lendvuna yase itsi: “Nankha emanti; yini lengivimba kutsi ngibhajatiswe?”
37 *——
38 Ngako yatsi akumiswe lenkalishi, base bangena emantini, futsi Filiphu wayibhabhatisa.
39 Batsi nabaphuma emantini, umoya waJehova* wamsusa ngekushesha Filiphu, lendvuna ayizange isambona, kodvwa yahamba ijabulile.
40 Filiphu wefika e-Ashdodi, wadzabula kuwo onkhe emadolobha, wachubeka ashumayela tindzaba letimnandzi waze wefika eKhesariya.+
Imibhalo lengentansi
^ Fundza Sandzisanchazo A5.
^ Nobe “ubaba njengenyongo.”
^ Fundza Sandzisanchazo A5.
^ Fundza Sandzisanchazo A5.
^ Fundza Sandzisanchazo A5.
^ NgesiGriki kutsi, “nemtsenwa.” Fundza Tinchazelo Temagama.
^ Nobe “Uyakwati.”
^ Fundza Sandzisanchazo A3.
^ Fundza Sandzisanchazo A5.
