Imisebenti Yebaphostoli 9:1-43
9 Sawula bekasolo asongela bafundzi beNkhosi futsi afuna kubabulala,+ ngako waya kumphristi lophakeme,
2 wamcela kutsi amnike tincwadzi lebetiya emasinagogeni aseDamaseko, kuze abophe bonkhe labadvuna nalabasikati lebebalandzela leNdlela,+ bese ubaletsa eJerusalema.
3 Ngesikhatsi ahamba, futsi sekasondzela eDamaseko, ngekuphatima nje kweliso, kukhanya lokuvela ezulwini kwamanyata ndzawo tonkhe eceleni kwakhe,+
4 ngako wawa phansi, weva livi litsi kuye: “Sawula, Sawula, ungihluphelani?”
5 Wabuta watsi: “Ungubani wena Nkhosi?” Lelivi latsi: “NginguJesu,+ loyo lomhluphako.+
6 Vuka uye edolobheni futsi utawutjelwa loko lokufanele ukwente.”
7 Lamadvodza lebekahamba naye ema, abindza atsi dvu; bekaliva lelivi kodvwa bekangamboni lomuntfu lokhulumako.+
8 Sawula wasukuma, futsi nanobe bekawavulile emehlo akhe, bekangaboni lutfo. Ngako bambamba ngesandla bamyisa eDamaseko.
9 Kwaphela emalanga lamatsatfu angaboni,+ angadli futsi anganatsi lutfo.
10 EDamaseko bekunemfundzi lobekutsiwa ngu-Ananiyase,+ futsi iNkhosi yatsi kuye embonweni: “Ananiyase!” Yena watsi: “Yebo Nkhosi.”
11 INkhosi yatsi: “Hamba uye emgwacweni lobitwa ngekutsi nguMgwaco Locondzile, endlini yaJudasi, ngobe kuyo kunendvodza levela eThasusi+ lokutsiwa nguSawula. Njengobe sikhuluma iyathantaza,
12 futsi embonweni ibone kungena indvodza lokutsiwa ngu-Ananiyase, yayibeka tandla kuze iphindze ibone.”+
13 Kodvwa Ananiyase waphendvula watsi: “Nkhosi, tinyenti tintfo lengitivile ngalendvodza, ngivile nangendlela lebahlasela ngayo labangcwele bakho eJerusalema.
14 Kantsi futsi baphristi labakhulu bayinike imvume yekubavalela ejele* bonkhe lababita libito lakho.”+
15 Kodvwa iNkhosi yatsi kuye: “Hamba, ngobe lomuntfu usitja sami lengisikhetsile,+ kuze ngimemetele ngaso libito lami kubantfu betive,+ nasemakhosini+ kanye nasemadvodzaneni aka-Israyeli.
16 Ngobe ngitamkhombisa ngalokucacile kutsi kungakanani kuhlupheka lokufanele ahlangabetane nako ngenca yelibito lami.”+
17 Ngako Ananiyase wahamba wangena kulendlu, wambeka tandla, wase utsi: “Sawula mzalwane wami, iNkhosi Jesu lebonakele kuwe emgwacweni lobewuhamba ngawo ingitfumile kuze uphindze ubone futsi ugcwale umoya longcwele.”+
18 Masinyane kwawa lokunjengetimphepheleti emehlweni aSawula, wase uyabona; ngako wasukuma futsi wabhajatiswa,
19 ngemuva kwaloko wadla waba nemandla.
Wahlala emalangana nebafundzi baseDamaseko,+
20 futsi ngekushesha wacala kushumayela emasinagogeni, atsi Jesu uyiNdvodzana yaNkulunkulu.
21 Kodvwa bonkhe labamuva bamangala futsi bebatsi: “Lomuntfu akusuye yini lona lobekabahlupha kamatima bantfu baseJerusalema lababita leligama,+ futsi lote lapha kutobabopha bese ubayisa* kubaphristi labakhulu?”+
22 Kodvwa Sawula wachubeka aba nemandla lamakhulu, futsi emaJuda lebekahlala eDamaseko amangala ngesikhatsi akufakazela ngalokucacile kutsi Jesu unguKhristu.+
23 Kwatsi nasekwendlule emalanga lamanyenti, emaJuda akha lisu lekumbulala.+
24 Nanobe kunjalo, Sawula weva ngalelisu. LamaJuda bekagadzisisa emagede busuku nemini, kuze ambulale.
25 Ngako bafundzi bakhe bamtsatsa futsi bamehlisa ngelubondza ebusuku, bamfake kubhasikidi.+
26 Nakefika eJerusalema,+ wetama kutihlanganisa nebafundzi, kodvwa bonkhe bebamesaba ngobe bebangakholwa kutsi sewungumfundzi.
27 Ngako Bhanabasi+ wamsita, wamyisa kubaphostoli, wafike wabachazela indlela Sawula lebekayibone ngayo iNkhosi+ ngesikhatsi asendleleni nekutsi yakhuluma naye, futsi wabachazela nangendlela lebekakhulume ngayo ngesibindzi ngelibito laJesu eDamaseko.+
28 Ngako Sawula wachubeka ahleti nabo, ahamba ngekukhululeka* eJerusalema, futsi akhuluma ngesibindzi ngelibito leNkhosi.
29 Bekakhuluma futsi aphikisane nemaJuda lakhuluma siGriki, kodvwa wona bekafuna tindlela tekumbulala.+
30 Ngesikhatsi bazalwane bakubona loko, bamtsatsa bamyisa eKhesariya base bamtfumela eThasusi.+
31 Ngako onke emabandla laseJudiya, eGalile kanye naseSamariya+ aba nesikhatsi sekuthula futsi akheka; njengobe bewakhombisa kutsi esaba Jehova* futsi asekelwa ngumoya longcwele,+ achubeka andza.
32 Ngesikhatsi Phetro ahamba kuso sonkhe lesifundza, wefika nakulabangcwele lebebahlala eLida.+
33 Kuleyondzawo, watfola indvodza lokutsiwa ngu-Ayeneyasi, lebesekuphele iminyaka lengu-8 ilele phansi ngenca yekukhubateka.
34 Phetro watsi kuyo: “Ayeneyasi, Jesu Khristu uyakuphilisa.+ Vuka ugcebe umbhedze wakho.”+ Ngako wavuka masinyane.
35 Bonkhe lebebahlala eLida naseTsafeni laseSharoni bambona, base bakholwa yiNkhosi.
36 EJopha bekunemfundzi lobekutsiwa nguThabitha, lokusho kutsi “Dokhasi.”* Bekenta tintfo letinyenti letinhle futsi apha labanye tipho.
37 Kulawo malanga wagula wase uyafa. Ngako bamgeza, bamlalisa ekamelweni lelisetulu.
38 Njengobe iLida beyisedvute neJopha, bafundzi batsi nabeva kutsi Phetro ulapho, batfuma emadvodza lamabili kutsi amncenge, atsi: “Sicela uphutfume ute lapha kitsi.”
39 Ngesikhatsi Phetro eva loko, wasukuma wahamba nawo. Watsi nakefika, amyisa kulelikamelo lelisetulu, futsi bonkhe bafelokati baya kuye bakhala, bamtjengisa tingubo letinyenti tangephansi netangetulu lebetentiwe nguDokhasi ngesikhatsi asaphila.
40 Kodvwa Phetro wabakhiphela ngephandle bonkhe,+ waguca ngemadvolo wase uyathantaza. Ngemuva kwaloko wabuka lesidvumbu watsi: “Thabitha, vuka!” Thabitha wavula emehlo, watsi nakabona Phetro, wavuka wahlala.+
41 Phetro welula sandla wamsukumisa, ngemuva kwaloko wabita labangcwele kanye nebafelokati wabanika yena sekaphila.+
42 Loku kwatiwa kuyo yonkhe iJopha, futsi labanyenti bakholwa eNkhosini.+
43 Phetro wahlala emalanga lamanyentana eJopha, ahlala nemshuki wetikhumba lokutsiwa nguSimoni.+
Imibhalo lengentansi
^ NgesiGriki kutsi, “yekubopha.”
^ NgesiGriki kutsi, “uhamba nabo baboshiwe.”
^ NgesiGriki kutsi, “aphuma futsi angena.”
^ Fundza Sandzisanchazo A5.
^ Ligama lesiGriki lelitsi Dokhasi nelesi-Aramu lelitsi Thabitha asho kutsi “Inyamatane.”
