Kulandzisa KwaLukha 24:1-53
24 Ekuseni kakhulu, ngelilanga lekucala evikini,* labafati baya ethuneni baphetse lamakha lebebawalungisile.+
2 Bakhandza litje lisusiwe emnyango walelithuna,+
3 futsi nabangena, abazange basitfole sidvumbu seNkhosi Jesu.+
4 Batsi basemangele, kwavela emadvodza lamabili lagcoke tingubo letimengetelako, ema eceleni kwabo.
5 Labafati besaba kakhulu futsi buso babo bebusolo bubheke phansi, ngako lamadvodza atsi kubo: “Nimfunelani kulabafile loyo lophilako?+
6 Akekho lapha, uvukile ekufeni. Khumbulani loko lakusho kini ngesikhatsi aseGalile,
7 nakatsi iNdvodzana yemuntfu kufanele inikelwe etandleni tetoni futsi ibulawelwe elugodvweni, bese ngelilanga lesitsatfu iyavuswa.”+
8 Ngako bawakhumbula lamavi akhe,+
9 base babuyela emuva, babikela baphostoli bakhe labangu-11 nabo bonkhe labanye ngato tonkhe letintfo.+
10 Labafati bekunguMariya waseMagdala, naJwana kanye naMariya longumake waJakobe. Bona kanye nalabanye bafati lebebanabo batjela baphostoli ngaletintfo.
11 Kodvwa labaphostoli batsatsa konkhe loku njengembhedvo futsi bangabakholwa.
12 Kepha Phetro wesuka wagijima waya ethuneni, wefika wagobondzela wahlola ngekhatsi, wabona tindvwangu kuphela. Ngako wesuka atibuta kutsi kwentekeni.
13 Ngalelolanga, bafundzi lababili bebahamba baya edolobheni lokutsiwa yi-Emawusi, lelingemakhilomitha* langaba ngu-11 kusuka eJerusalema.
14 Bebacoca ngato tonkhe letintfo lebetentekile.
15 Ngesikhatsi basacoca ngaletintfo, Jesu weta kubo wahambisana nabo,
16 kodvwa abazange babone kutsi nguye.+
17 Watsi kubo: “Yini lena lenihamba nicoca ngayo?” Ngako bema, futsi bebabuhlungu.
18 Kleyophase watsi kuye: “Usihambi yini lapha eJerusalema, futsi uhlala wedvwa yini kutsi awukwati* loko lokwenteke kulamalanga?”
19 Jesu wababuta watsi: “Kwentekeni?” Bona batsi: “Sisho lendzaba lemayelana naJesu waseNazaretha,+ lobekangumphrofethi lonemandla ngetento nangemavi embikwaNkulunkulu nasembikwabo bonkhe bantfu,+
20 nekutsi baphristi betfu labakhulu nebaholi bamnikele kutsi abulawe+ base bayambetsela elugodvweni.
21 Kodvwa besetsemba kutsi nguye lotawukhulula Israyeli;+ leli selilanga lesitsatfu kwentekile loku.
22 Ngetulu kwaloko, simangaliswe kutsi labanye bafati lebebakanye natsi bayile lethuneni ekuseni kakhulu,+
23 kodvwa abakasikhandzi sidvumbu sakhe, base bayabuya basitjela kutsi babone netingilosi, letibatjele kutsi uyaphila.
24 Nalabanye lebebakanye natsi bayile ethuneni,+ bakhandza vele kunjalo, njengobe labafati bashito, nabo abakasitfoli sidvumbu sakhe.”
25 Wase utsi kubo: “Awu nine leningakahlakaniphi futsi lenephutako kukholwa loko lokwashiwo baphrofethi!
26 Bekungakafaneli yini vele Khristu ehlelwe nguletintfo+ futsi akhatinyuliswe?”+
27 Wabachazela tintfo lebetimayelana naye letisemiBhalweni, wacala kulokwabhalwa nguMosi wayofika kulokwabhalwa ngibo bonkhe baPhrofethi.+
28 Ekugcineni, basondzela kulelidolobhana lebebaya kulo, futsi wenta shengatsi uyendlula.
29 Kodvwa bamncenga kutsi ahlale, batsi: “Hlala natsi, ngobe selishonile futsi khona nyalo nje kutawube sekumnyama.” Ngako wahamba wahlala nabo.
30 Ngesikhatsi ahleti nabo futsi badla, watsatsa sinkhwa wabonga, wasihlephula wabanika sona.+
31 Nababona loko, emehlo abo avuleka, kwabese kuyabakhanyela kutsi nguye, kodvwa wase uyanyamalala.+
32 Bakhuluma bodvwa batsi: “Angitsi sivele satsintseka tinhlitiyo ngesikhatsi akhuluma natsi endleleni, asichazela* imiBhalo?”
33 Ngaso leso sikhatsi, besuka babuyela eJerusalema, befika bakhandza baphostoli labangu-11 nalabo lebebakanye nabo,
34 futsi bebatsi: “Vele iNkhosi ivusiwe, ngobe ibonakele nakuSimoni!”+
35 Nabo babese babacocela loko lobekwentekile nabasendleleni nekutsi babone njani kutsi nguye ngesikhatsi ahlephula sinkhwa.+
36 Batsi basakhuluma ngaletintfo, Jesu wavela, futsi wema embikwabo watsi kubo: “Kuthula akube nani.”+
37 Kodvwa ngenca yekutsi bebesaba futsi betfukile, bacabanga kutsi babona ingilosi.*
38 Ngako watsi kubo: “Nikhatsatwa yini, futsi ningabatelani etinhlitiyweni tenu?
39 Ngimi, bukani tandla netinyawo tami; ngitsintseni kute nibone, ngobe ingilosi ite inyama nematsambo njengami.”
40 Nakasho njalo, wabakhombisa tandla netinyawo takhe.
41 Ngesikhatsi bangakukholwa loku ngenca yekutsi bebajabulile futsi bamangele, watsi kubo: “Ninako yini lokudliwako?”
42 Ngako bamnika inhlanti leyosiwe,
43 wayitsatsa wayidla embikwabo.
44 Wase utsi kubo: “Khumbulani loko lengakusho kini ngesikhatsi ngisenani,+ kutsi tonkhe tintfo letabhalwa ngami eMtsetfweni waMosi, etincwadzini tebaPhrofethi, nakuTihlabelelo kufanele tigcwaliseke.”+
45 Wase uyabasita kutsi bakucondzisise loko lokushiwo yimiBhalo,+
46 watsi kubo: “Kubhaliwe kutsi Khristu bekatawuhlupheka, futsi ngelilanga lesitsatfu avuswe kulabafile,+
47 nekutsi kufanele kucalwe eJerusalema+ kushunyayelwe egameni lakhe kutsi bantfu bato tonkhe tive+ baphendvuke kuze batsetselelwe tono.+
48 Nine nitawuba bofakazi baletintfo.+
49 Ngininiketa loko lokwatsenjiswa nguBabe. Kodvwa hlalani lapha edolobheni nize nitfole emandla lavela ezulwini.”+
50 Ngemuva kwaloko waphuma nabo waze wefika eBhetani, waphakamisa tandla takhe wababusisa.
51 Watsi asababusisa, wasuswa kubo wenyukela ezulwini.+
52 Bona bakhotsama base babuyela eJerusalema bajabule kakhulu.+
53 Ngaso sonkhe sikhatsi bebahlale basethempelini, badvumisa Nkulunkulu.+
Imibhalo lengentansi
^ Fundza umbhalo longentansi waMat 28:1.
^ NgesiGriki kutsi, “lelingemastadiya langu-60.” Stadiya sisinye besilingana nemamitha langu-185. Fundza Sandzisanchazo B14.
^ Kungaphindze kubekwe ngekutsi, “Usho kutsi nguwe wedvwa yini sihambi lana eJerusalema lesingati?”
^ NgesiGriki kutsi, “asivulela.”
^ NgesiGriki kutsi, “umoya.”
