Kulandzisa KwaMakho 6:1-56
6 Wesuka lapho waya endzaweni yakubo,+ futsi bafundzi bakhe bahamba naye.
2 Kwatsi ngeliSabatha wacala kufundzisa esinagogeni, futsi labanyenti labamuva bamangala batsi: “Lomuntfu utitsatsaphi tonkhe letintfo?+ Kwentiwa yini kutsi ahlakaniphe kangaka, futsi abe nemandla ekwenta letimangaliso?+
3 Lona akusuye yini umbati,+ indvodzana yaMariya+ futsi akasuye yini umnakabo Jakobe,+ Josefa, Judasi naSimoni?+ Bodzadzewabo abahlali yini natsi lapha?” Ngako bamcansukela.
4 Kodvwa Jesu watsi kubo: “Umphrofethi uyemukelwa kuto tonkhe tindzawo ngaphandle kwasendzaweni yakubo, etihlotjeni takhe, kanye nasekhaya kubo.”+
5 Ngako-ke kute simangaliso lasenta lapho ngaphandle nje kwekuphilisa labambalwa lebebagula.
6 Kwammangalisa kungakholwa kwabo. Ngako wesuka wayofundzisa kuwo onkhe emadolobhana akuleyo ndzawo.+
7 Wabita baphostoli bakhe labangu-12, wabatfuma ngababili,+ wabanika nemandla ekukhipha emadimoni.+
8 Wabatjela nekutsi bangaphatsi lutfo lwendlela ngaphandle kweludvondvolo—bangaphatsi sinkhwa, sikhwama sekudla, ngisho nemali* etipatjini tabo,+
9 kodvwa watsi bafake tincabule futsi bangagcoki tingubo letimbili.
10 Wachubeka watsi: “Kunobe ngumuphi umuti leningena kuwo, hlalani lapho nize nihambe.+
11 Kunobe nguyiphi indzawo labanganemukeli kuyo, nobe labanganilaleli khona, naniphuma lapho nibotsintsitsa lutfuli etinyaweni tenu khona kutewuba bufakazi kubo.”+
12 Ngako besuka futsi bashumayela kuze bantfu baphendvuke,+
13 bakhipha emadimoni lamanyenti,+ bagcobisa bantfu labanyenti labagulako ngemafutsa futsi babelapha.
14 INkhosi Herodi yeva ngaloku ngobe libito laJesu besekukhulunywa ngalo yonkhe indzawo, nebantfu bebatsi: “Johane uMbhabhatisi uvukile ekufeni, kungako enta letimangaliso letingaka.”+
15 Labanye bebatsi: “Ngu-Elija.” Kantsi labanye bona bebatsi: “Ngumphrofethi lonjengebaphrofethi basendvulo.”+
16 Ngesikhatsi Herodi eva ngaloku, watsi: “LoJohane lengamjuba inhloko uvusiwe ekufeni.”
17 Herodi bekatsite Johane akabanjwe futsi aboshwe aphindze avalelwe ejele, ngenca yaHerodiyasi umfati waFiliphu umnakabo labemtsetse.+
18 Ngobe Johane bekahlale atsi kuHerodi: “Akukavumeleki kutsi utsatse umfati wemnakenu.”+
19 Ngako Herodiyasi wabambela Johane emagcubu futsi bekafuna kumbulala, kodvwa abehluleka.
20 Ngobe Herodi bekamesaba Johane ngesizatfu sekutsi bekamati njengendvodza lelungile+ naletinikele kuNkulunkulu, ngako bekamvikela. Nakeva Johane akhuluma, bekangati kutsi kufanele amenteni, kodvwa bekachubeka amlalela.
21 Kodvwa litfuba lavuleka ngesikhatsi Herodi ente lidzili lekugubha lilanga lekutalwa kwakhe,+ futsi abememe bantfu labakhulu netindvuna temasotja, nalamanye emadvodza aseGalile latiwako.+
22 Indvodzakati yaHerodiyasi yafike yadansa, yamjabulisa Herodi kanye nalabo lebebanaye.* Herodi watsi kulentfombatana: “Cela nobe yini loyifunako, ngitakunika yona.”
23 Herodi wafunga watsi: “Ngitakunika nobe yini loyicelako, ngisho nobe ungacela incenye yembuso wami.”
24 Lentfombatana yaphuma yaya kumake wayo, yambuta yatsi: “Ngicele ini?” Herodiyasi watsi: “Cela inhloko yaJohane uMbhabhatisi.”
25 Ngekushesha lentfombatana yaya kuHerodi yafike yacela yatsi: “Ngiphe ngemgcwembe nyalo inhloko yaJohane uMbhabhatisi.”+
26 Nanobe loku kwamvisa buhlungu kakhulu Herodi, kepha bekangafuni kwephula setsembiso lebekasentile, ngobe bekafunge embikwabo bonkhe lebebahleti naye etafuleni.
27 Ngekushesha watfumela gadzi kutsi aletse inhloko yaJohane. Ngako logadzi wahamba waya ejele wafike wayijuba,
28 wayiletsa ngemgcwembe, wayinika lentfombatana, yona yayiniketa make wayo.
29 Batsi bafundzi baJohane nabeva ngaloku, beta bafike batsatsa sidvumbu sakhe bayosingcwaba.
30 Baphostoli baJesu babutsana embikwakhe bambikela konkhe lebebakwentile nako konkhe lebebakufundzisile.+
31 Jesu watsi kubo: “Wotani siye endzaweni lethulile kuze niphumule.”+ Ngobe lapho bekuphitsitela bantfu behla benyuka, futsi Jesu nebaphostoli bakhe bebangakasitfoli sikhatsi sekuphumula ngisho nesekudla.
32 Ngako bagibela sikebhe bahamba bodvwa baya endzaweni lethulile.+
33 Kodvwa bantfu bababona nabahamba, futsi labanyenti beva ngaloku, ngako bantfu lebebasuka kuwo onkhe emadolobha bagijima ngetinyawo, befika kucala kuleyo ndzawo.
34 Watsi nakehla, wabona sicumbi lesikhulu sebantfu, futsi wasihawukela+ ngobe besinjengetimvu letite umelusi.+ Wase usifundzisa tintfo letinyenti.+
35 Nasekunguntsambama, bafundzi bakhe beta kuye batsi: “Lendzawo isiganga, futsi selivele lishonile.+
36 Tjela labantfu bahambe baye emaphandleni nasemadolobheni lasedvute kuze bayotitsengela kudla.”+
37 Jesu wabaphendvula watsi: “Bapheni nine kudla.” Bona batsi kuye: “Sihambe yini siyotsenga tinkhwa tabodenariyo* labangu-200 kuze sinike labantfu badle?”+
38 Jesu watsi kubo: “Hambani niyobuka kutsi tingakhi tinkhwa leninato.” Nasebatfolile kutsi tingakhi, batsi kuye: “Kunetinkhwa letisihlanu kuphela netinhlanti letimbili.”+
39 Wase utjela bonkhe labantfu kutsi abahlale ngeticheme etjanini.+
40 Bahlala ngeticheme tebantfu labangu-100 netebantfu labangu-50.
41 Wase utsatsa letinkhwa letisihlanu naletinhlanti letimbili, wabuka ezulwini, wabonga.+ Wahlephula letinkhwa watinika bafundzi bakhe, bona batinika labantfu, wase uhlephula naletinhlanti letimbili wabanika tona.
42 Bonkhe badla besutsa,
43 futsi babutsa kudla lobekusele, kwagcwala bobhasikidi labangu-12, babutsa netinhlanti lebetisele.+
44 Labo labadla letinkhwa bekungemadvodza langu-5 000.
45 Ngekushesha watjela bafundzi bakhe kutsi abagibele esikebheni bahambe embili bewelele ngesheya eBhethsayida njengobe yena asakhulula labantfu.+
46 Nasekabakhululile, wenyukela entsabeni wayothantaza.+
47 Ngesikhatsi sekuhwalele, sikebhe besesisekhatsi nelwandle, kodvwa Jesu bekasele yedvwa kuleyo ndzawo.+
48 Watsi nakabona kutsi bafundzi bakhe basigwedla kamatima lesikebhe ngobe umoya bewuphambana nabo, waya kubo ekuseni kakhulu* ahamba etikwelwandle, kodvwa wenta shengatsi uyabendlula.*
49 Nabambona ahamba etikwelwandle, batsi: “Siyabhudza yini?” Ngako bamemeta.
50 Bonkhe bambona futsi besaba. Kodvwa ngekushesha wakhuluma nabo watsi: “Banini nesibindzi! Ningesabi, ngimi lo!”+
51 Jesu wagibela kulesikebhe, umoya wase uyathula. Nababona loku, labafundzi bamangala kakhulu,
52 ngobe bebangakasifundzi sifundvo kulesimangaliso setinkhwa lebekasentile, netingcondvo tabo betisolo tingacondzi.
53 Nasebewelile, befika eGenesaretha futsi bakhunga sikebhe edvute nalapho.+
54 Kodvwa batsi nje nabehla kulesikebhe, bantfu bambona.
55 Bagijima bonkhe bachamuka kuto tonkhe tigodzi baletsa labagulako babetfwele ngetinhlaka, babaletsa lapho bebeve kutsi ukhona khona.
56 Yonkhe indzawo lapho bekaya khona, kungaba kusemadolobhaneni, emadolobheni, nobe emaphandleni, bantfu bebaletsa labagulako etimakethe. Letigulane betimncenga kutsi timane nje titsintse umphetfo wengubo yakhe yangetulu.+ Bonkhe lebebawutsintsa bebaphila.
Imibhalo lengentansi
^ NgesiGriki kutsi, “nelitfusi.”
^ Nobe “lebebahleti naye etafuleni.”
^ Fundza Sandzisanchazo B14.
^ Kungenteka bekusemkhatsini wa-3 ekuseni na-6 ekuseni nasekutawuphuma lilanga.
^ Nobe “besekatabendlula.”
