Sembulo Lesembulelwa Johane 17:1-18
-
Sehlulelo ‘seBhabhulona Lenkhulu’ (1-18)
17 Lenye yaletingilosi letingu-7 lebetiphetse titja letingu-7+ yeta kimi yatsi: “Wota ngitokukhombisa sijeziso lesitawutfolwa yingwadla lenkhulu lehleti etikwemanti lamanyenti,+
2 leyo emakhosi emhlaba lagwadla*+ nayo, nebantfu labahlala emhlabeni labadzakwe liwayini lebugwadla* bayo.”+
3 Lengilosi yangitsatsa ngemandla emoya yangiyisa ehlane. Ngabona umfati ahleti etikwesilwane sesiganga lesibovu, lebesigcwele emagama lahlambalatako, sinetinhloko letingu-7 netimphondvo letingu-10.
4 Lomfati bekagcoke ingubo lenembala lobukhwebeletane*+ nalobovu, agabe nemihlobiso leyentiwe ngeligolide, ngelitje leliligugu nangemapharele,+ esandleni sakhe aphetse indzebe yeligolide lebeyigcwele tintfo letenyanyekako naletingcolile tebugwadla* bakhe.
5 Ebuntini lakhe bekubhalwe ligama leliyimfihlo lelitsi: “IBhabhulona Lenkhulu, make wetingwadla+ newetintfo letenyanyekako tasemhlabeni.”+
6 Ngabona kutsi lomfati bekadzakwe yingati yalabangcwele neyabofakazi baJesu.+
Ngatsi nangimbona ngamangala kakhulu.
7 Ngako lengilosi yatsi kimi: “Umangaliswa yini? Ngitakutjela imfihlo ngalomfati+ nangalesilwane sesiganga lesimetfwele lesinetinhloko letingu-7 netimphondvo letingu-10:+
8 Lesilwane sesiganga losibonile besikhona, kodvwa asisekho, futsi sesitawenyuka siphume emgodzini longenamkhawulo+ siye ekubhujisweni. Labo labahlala emhlabeni, emabito abo langazange abhalwe emculwini wekuphila+ kusukela kwasekelwa live,* batawumangala nababona kutsi lesilwane sesiganga besikhona, kodvwa asisekho, futsi sitawuphindze sibe khona.
9 “Loku-ke kudzinga kucondza nekuhlakanipha: Letinhloko letingu-7+ timelela tintsaba letingu-7, leto lomfati lahleti etikwato.
10 Kunemakhosi langu-7: Lasihlanu sekawile, yinye ikhona, lenye isengakaveli; kodvwa nayivela kufanele ihlale sikhatsi lesifishane.
11 Lesilwane sesiganga lebesikhona kodvwa lesesingasekho,+ siphindze sibe yinkhosi yesi-8, kepha sivela kulawa langu-7, futsi siya ekubhujisweni.
12 “Letimphondvo letingu-10 lotibonile timelela emakhosi langu-10 lasengakawutfoli umbuso, kodvwa atawunikwa ligunya lekuba ngemakhosi li-awa linye kanye nalesilwane sesiganga.
13 Anemcondvo munye, ngako anika lesilwane sesiganga emandla neligunya lawo.
14 Atawulwa neliWundlu,+ kodvwa litawancoba ngobe liyiNkhosi yemakhosi neMbusi webabusi.+ Labo labakanye nalo lababitiwe, labakhetsiwe futsi labetsembekile, nabo batawuncoba.”+
15 Lengilosi yatsi kimi: “Lamanti lowabonile lapho kuhleti khona lengwadla amelela bantfu, ticumbi tebantfu, tive kanye netilwimi.+
16 Letimphondvo letingu-10+ lotibonile kanye nalesilwane sesiganga,+ titayitondza lengwadla,+ titsatse konkhe lenako futsi tiyingcunule, titawudla nenyama yalengwadla tiphindze tiyishise ingcongce.+
17 Ngobe Nkulunkulu ukufake etinhlitiyweni tato kutsi tente injongo yakhe,+ tifeze lomcondvo munye letinawo ngekutsi tinike lesilwane sesiganga+ umbuso wato, kuze kube ngulapho kugcwaliseka emavi aNkulunkulu.
18 Lomfati+ lombonile umelela lidolobha lelikhulu lelibusa etikwemakhosi emhlaba.”
Imibhalo lengentansi
^ Ligama lesiGriki lelihunyushwe ngekutsi “bugwadla,” lifaka ekhatsi tonkhe tinhlobo tekulalana letingemukeleki kuNkulunkulu. NgesiGriki kutsi por·neiʹa. Fundza Tinchazelo Temagama.
^ Ligama lesiGriki lelihunyushwe ngekutsi “bugwadla,” lifaka ekhatsi tonkhe tinhlobo tekulalana letingemukeleki kuNkulunkulu. NgesiGriki kutsi por·neiʹa. Fundza Tinchazelo Temagama.
^ NgesiNgisi kutsi “purple.”
^ Ligama lesiGriki lelihunyushwe ngekutsi “bugwadla,” lifaka ekhatsi tonkhe tinhlobo tekulalana letingemukeleki kuNkulunkulu. NgesiGriki kutsi por·neiʹa. Fundza Tinchazelo Temagama.
^ Loku kusho bantfwana ba-Adamu na-Eva.
