Sembulo Lesembulelwa Johane 22:1-21
22 Lengilosi yangikhombisa umfula wemanti ekuphila+ locwebetela njengekristalu, ugeleta usuka esihlalweni sebukhosi saNkulunkulu neseliWundlu,+
2 wehlela emkhatsini wemgwaco lomkhulu walelidolobha. Ngala nangala kwalomfula bekunetihlahla tekuphila lebetitsela titselo letingu-12, futsi betitsela inyanga nenyanga. Emacembe ato bekawekuphilisa tive.+
3 Ngeke sisaba khona sicalekiso. Kodvwa sihlalo sebukhosi saNkulunkulu neseliWundlu+ sitawuba kulelidolobha, netinceku takhe titamentela umsebenti longcwele;
4 titabubona buso bakhe,+ nelibito lakhe litawubhalwa emabuntini ato.+
5 Busuku ngeke busaba khona,+ ngeke tikudzinge nekukhanya kwesibane nobe kwelilanga, ngobe Jehova* Nkulunkulu utatikhanyisela,+ futsi titawuba ngemakhosi phakadze naphakadze.+
6 Lengilosi yatsi kimi: “Lamavi etsembekile futsi aliciniso;+ Jehova* Nkulunkulu lowaphefumulela baphrofethi,+ utfume ingilosi yakhe kutsi ikhombise tinceku takhe tintfo letitawenteka ngekushesha.
7 Ngiyeta masinyane.+ Uyajabula loyo logcina emavi esiphrofetho labhalwe kulomculu.”+
8 Mine Johane, ngimi lengativa letintfo ngaphindze ngatibona. Ngesikhatsi ngitiva futsi ngitibona, ngaguca kuze ngikhonte lengilosi lebeyingikhombisa tona.
9 Kodvwa yatsi kimi: “Ungakwenti loko! Ngobe mine ngimane nje ngiyinceku njengawe nanjengebazalwane bakho lababaphrofethi, nalabo labagcina lamavi labhalwe kulomculu. Ngako khonta Nkulunkulu.”+
10 Yaphindze yatsi kimi: “Ungawafihli lamavi esiphrofetho labhalwe kulomculu, ngobe sikhatsi lesibekiwe sesisondzele.
11 Longakalungi akachubeke nekwenta lokungakalungi; nalongcolile akachubeke nekwenta lokungcolile; kodvwa lolungile akachubeke nekwenta lokulungile, naloyo longcwele akachubeke nekuba ngcwele.
12 “‘Ngiyeta masinyane, futsi ngita nemvuzo kuze nginike umuntfu ngamunye umvuzo kuye ngemisebenti yakhe.+
13 Mine ngingu-Alfa na-Omega,*+ wekucala newekugcina, losicalo nesiphetfo.
14 Bayajabula labo labawasha tingubo tabo+ kuze babe neligunya lekuya etihlahleni tekuphila,+ futsi bakwati kungena edolobheni ngemagede alo.+
15 Ngaphandle kunetinja* nalabasebentelana nemimoya, tingwadla,* babulali, labakhonta tithico, nabo bonkhe bantfu labatsandza emanga nalabachubeka bacamba emanga.’+
16 “‘Mine Jesu ngatfuma ingilosi yami kutsi ifakaze kini ngaletintfo ngenca yemabandla. Ngiyimphandze yaDavide+ nentalelwane yakhe, futsi ngiyinkhanyeti yekusa lekhanyako.’”+
17 Umoya namakoti+ bachubeka batsi: “Wota!” Nobe ngubani lovako akatsi: “Wota!” Nobe ngubani lowomile akete;+ nanobe ngubani lofisako akawatsatse mahhala emanti ekuphila.+
18 “Ngifakaza kunobe ngubani lova lamavi esiphrofetho labhalwe kulomculu. Nangabe kukhona lowengeta lokutsite kuletintfo,+ Nkulunkulu utamengetela tishayo letibhalwe kulomculu;+
19 nangabe kukhona lokhipha lokutsite kulamavi esiphrofetho labhalwe emculwini, Nkulunkulu angeke amvumele kutsi adle etihlahleni tekuphila+ nekutsi angene kulelidolobha lelingcwele,+ lokusho tintfo letibhalwe kulomculu.
20 “Loyo lofakaza ngaletintfo utsi: ‘Ngiyeta masinyane.’”+
“Amen! Wota Nkhosi Jesu.”
21 Shengatsi umusa lomkhulu weNkhosi Jesu ungaba nalabangcwele.
Imibhalo lengentansi
^ Fundza Sandzisanchazo A5.
^ Fundza Sandzisanchazo A5.
^ Nobe “ngingu-A na-Z.” Alfa luhlavu lwekucala, futsi Omega luhlavu lwekugcina elulwimini lwesiGriki.
^ Lokusho, labo labenta tintfo letenyanyekako embikwaNkulunkulu.
^ Ligama lesiGriki lelihunyushwe ngekutsi “bugwadla,” lifaka ekhatsi tonkhe tinhlobo tekulalana letingemukeleki kuNkulunkulu. NgesiGriki kutsi por·neiʹa. Fundza Tinchazelo Temagama.
