Njalo ngemnyaka, kuba nekutamatama kwemhlaba lokunyenti. Nanobe lokunye kutamatama kwemhlaba kuba kuncane, kodvwa lokunye kuba kukhulu futsi kubangela umonakalo lomkhulu, kuhlupheka kanye nekufa. Ngaletinye tikhatsi, kutamatama kwemhlaba kubangela ema-tsunami lenta umonakalo etindzaweni letiseceleni kwelwandle futsi abulale bantfu labanyenti. LiBhayibheli laphrofetha yini ngalokutamatama kwemhlaba lokukhulu?

Lokukulesihloko

•  LiBhayibheli laphrofetha yini ngekutamatama kwemhlaba?

•  Kutamatama kwemhlaba lokwenteka lamuhla kugcwalisa tiphrofetho teliBhayibheli yini?

•  Tiphrofetho teliBhayibheli letimayelana nekutamatama kwemhlaba tisho kutsini kitsi?

•  Lokungasilo liciniso ngetiphrofetho teliBhayibheli nekutamatama kwemhlaba

 LiBhayibheli likhuluma ngekutamatama kwemhlaba esiphrofethweni lesashiwo nguJesu. Emavi akhe abhalwe kunati tincwadzi letintsatfu teliBhayibheli:

 “Sive sitawuvukela lesinye sive, nembuso uvukele lomunye umbuso, futsi kutawuba khona indlala nekutamatama kwemhlaba etindzaweni letehlukahlukene.”—Matewu 24:7.

 “Sive sitawuvukela lesinye sive, nembuso uvukele lomunye umbuso; kutawuba khona kutamatama kwemhlaba etindzaweni letehlukahlukene, futsi kutawuba khona nendlala.”—Makho 13:8.

 “Kutawuba khona kutamatama lokukhulu kwemhlaba; kube nendlala kanye netifo letingumshayabhuce etindzaweni letehlukahlukene.”—Lukha 21:11.

 Ngako Jesu waphrofetha kutsi bekutawuba “nekutamatama lokukhulu kwemhlaba etindzaweni letehlukahlukene” ngesikhatsi lesifanako kube netimphi, indlala kanye netifo letungumshayabhuce. Konkhe loku bekutawukhombisa sikhatsi emlandvweni webantfu lesibitwa ngekutsi ‘kuphela kwalelive’ nobe ‘ngemalanga ekugcina.’ (Matewu 24:3; 2 KuThimothi 3:1) Nasihlolisisa kubalwa kwetikhatsi lokusekelwe eBhayibhelini, siyabona kutsi emalanga ekugcina acala nga-1914 futsi asengakapheli.

 Yebo. Tintfo lesitibona tenteka lamuhla tiyavumelana nesiphrofetho saJesu lesifaka ekhatsi kutamatama kwemhlaba. Kusukela nga-1914, kube nekutamatama lokukhulu kwemhlaba, lokulinganiselwa ngetulu kwa-1 950 futsi kubulele bantfu labangetulu kwa-2 million. a Cabanga nganati tibonelo talokwenteke eminyakeni yakamuva.

 Nga-2004—E-Indian Ocean. Kutamatama kwemhlaba lokungu-9.1-magnitude kwabangela i-tsunami leyafika emaveni lamanyenti futsi yabulala bantfu labangaba ngu-25 000.

 Nga-2008—E-China. Kutamatama kwemhlaba lokungu-7.9-magnitude kwabhidlita tindzawo letisemakhaya naletisemadolobheni, futsi kucatjangwa kutsi kwabulala bantfu labangu-90 000, kwalimata labanye labangaba ngu-375 000 futsi kwashiya tigidzi tebantfu tite emakhaya.

 Nga-2010—E-Haiti. Kutamatama kwemhlaba lokungu-7.0-magnitude kanye netintfo letenteka ngemuva kwako, kwabulala bantfu labangetulu kwa-300 000 futsi kwashiya nalabangaba ngu 1 million bete emakhaya.

 Nga-2011—E-Japan. Kutamatama kwemhlaba lokungu-9.0-magnitude kanye nema-tsunami labangelwa ngiko kwabulala bantfu labalinganiselwa ku-18 500, futsi bantfu labangaba ngemakhulu etinkhulungwane balahlekelwa yimiti yabo. Siteshi sekuphehla gesi lesise-Fukushima salimala futsi loko kwabangela umonakalo lomkhulu we-nuclear. Ngemuva kweminyaka lengu-10, bantfu labangaba ngu-40 000 bebasolo bangakhoni kubuyela emakhaya abo laseceleni kwalesiteshi sekuphehla gesi ngenca yekutsi lendzawo beseyingcoliswe ngumoya lonebungoti nobe i-radioactive contamination.

 Tiphrofetho teliBhayibheli letimayelana nekutamatama kwemhlaba tisitjela ngaloko lokutawenteka madvutane. Jesu watsi: “Nanibona letintfo tenteka, nibowati kutsi uMbuso waNkulunkulu sewusondzele.”—Lukha 21:31.

 LiBhayibheli litsi uMbuso waNkulunkulu unguhulumende mbamba losezulwini lobuswa nguJesu Khristu, futsi ngiwo Jesu lafundzisa balandzeli bakhe kutsi bawuthantazele.—Matewu 6:10.

 UMbuso waNkulunkulu nasewubusa emhlabeni, Nkulunkulu utawucinisekisa kutsi tehlakalo temvelo letinjengekutamatama kwemhlaba atisabalimati bantfu. (Isaya 32:18) Ngetulu kwaloko, utawelapha imitimba netingcondvo tebantfu letilinyetwe kutamatama kwemhlaba. (Isaya 65:17; Sembulo 21:3, 4) Kuze utfole lokunyenti, fundza sihloko lesitsi: “Yini Letawufezwa NguMbuso WaNkulunkulu?”