Simo Semnotfo Lesenetisa Tidzingo Tabo Bonkhe Bantfu Singaba Khona Yini?
Emaveni lamanyenti bantfu batoyitoya emigwacweni ngenca yetimo temnotfo letenta tidzingo tabo tingenetiswa. Sifo se-COVID-19 sente lesimo saba sibi nakakhulu njengobe kube netiphitsiphitsi, kuvaleleka, kuswelakala kwetintfo letinyenti lokufaka ekhatsi nelusito lwetemphilo. Loku kuvete umehluko lokhona emkhatsini webantfu labanjingile kanye nalabaphuyile.
Simo semnotfo lesibi lesikhona emhlabeni siyoke siphele yini? Yebo. LiBhayibheli liveta loko Nkulunkulu latawukwenta kuze acatulule tinkinga letikhona emhlabeni.
Tinkinga temnotfo Nkulunkulu latatilungisa
Inkinga: Bantfu bete simo semnotfo lesenetisa tidzingo tawo wonkhe muntfu.
Sisombululo: Nkulunkulu utawumisa uMbuso wakhe lotawutsatsa sikhundla sabo bonkhe bohulumende bebantfu. LoMbuso wasezulwini utawubusa umhlaba wonkhe.—Danyela 2:44; Matewu 6:10.
Umphumela: Njengobe utawube ubusa umhlaba wonkhe, loMbuso waNkulunkulu utatinakekela kahle tonkhe tidzingo tebantfu. Bantfu angeke baphindze bahlupheke ngenca yebuphuya nobe simo semnotfo lesibi. (Tihlabelelo 9:7-9, 18) Kunaloko, batawujabulela titselo temsebenti wetandla tabo kanye nemphilo leyenetisako bakanye nemindeni yabo. LiBhayibheli letsembisa kutsi: “Bayawukwakha tindlu bahlale kuto, bayawuhlanyela emasimu emagilebisi, badle titselo tawo. Angeke bakhe bese kuhlala lomunye, futsi angeke bahlanyele bese kudla lomunye.”—Isaya 65:21, 22.
Inkinga: Bantfu angeke batibalekele tentakalo letibenta baphuye futsi bahlupheke.
Sisombululo: Asebentisa uMbuso wakhe, Nkulunkulu utawususa konkhe kwesaba kanye nekungaciniseki ngelikusasa.
Umphumela: Nasekubusa uMbuso waNkulunkulu, bantfu angeke babhekane netimo letenta bona kanye nemindeni yabo bangakutfoli labakudzingako kuze baphile. Sibonelo nje, timphi, kuswelakala kwekudla kanye netifo letingumshayabhuce, ngeke tisaba khona. (Tihlabelelo 46:9; 72:16; Isaya 33:24) Nkulunkulu utsi: “Bantfu bami batawuhlala endzaweni lenekuthula kwaphakadze, batawuhlala etindzaweni letiphephile nasetindzaweni tekuphumula letinekuthula.”—Isaya 32:18.
Inkinga: Bantfu labanemona nalabaticabangela bona basitakala ngalabanye bantfu.
Sisombululo: Bantfu labatawube baphila nasekubusa uMbuso waNkulunkulu batawufundza kutsandza labanye kakhulu kwendlula indlela labatitsandza ngayo bona.—Matewu 22:37-39.
Umphumela: Nasekubusa uMbuso waNkulunkulu, bonkhe bantfu batawukhombisana lutsandvo lolunjengelwaNkulunkulu ‘lolungatifuneli kwalo.’ (1 KubaseKhorinte 13:4, 5) LiBhayibheli litsi: “Angeke tilimate lutfo futsi angeke tibangele umonakalo kuyo yonkhe intsaba yami lengcwele, ngobe umhlaba uyawugcwala lwati ngaJehova a njengobe nemanti agcwalisa lwandle.”—Isaya 11:9.
LiBhayibheli liveta kutsi siphila emalangeni ekugcina alelive nekutsi madvutane Nkulunkulu utawugcwalisa setsembiso sakhe sekucedza tonkhe tinkinga temnotfo. b (Tihlabelelo 12:5) Kwanyalo, timiso teliBhayibheli tingakusita ubhekane netinkinga temnotfo. Sibonelo nje, buka sihloko lesitsi “Indlela Ongaphila Ngayo Ngokuncane” kanye nalesitsi “Umbono Olinganiselayo Ngemali,”letitfolakala ngesiZulu.
a Jehova ligama laNkulunkulu njengobe livetwe eBhayibhelini.—Tihlabelelo 83:18.
b Kuze utfole kutsi kubaluleke ngani kutsi uletsembe liBhayibheli, fundza sihloko lesitsi “LiBhayibheli Lingumtfombo Loliciniso Lesingawetsemba.”
Lokunye Longatsandza Kukuhlola
SICONGOSEKULINDZA
Yini Letawufezwa NguMbuso WaNkulunkulu?
Jesu bekati kutsi nguMbuso waNkulunkulu kuphela longuhulumende longalungisa tinkinga letikhona emhlabeni. Yini leseyivele yentiwe nguloMbuso kuze usisite siwetsembe?
