“Kucindzeteleka kwebantfu labasha sekuyinkinga lenkhulu futsi ledzinga kulungiswa ngekushesha. Kubonakala shengatsi tekuchumana tihamba embili ekubangeni lenkinga.”​—Dr. Vivek Murthy, U.S. surgeon general, New York Times, yaJune 17, 2024.

 Batali bangabavikela njani bantfwana babo etingotini letibangwa tekuchumana? LiBhayibheli lineteluleko letingabasita.

 Cabanga nganaku lokushiwo liBhayibheli.

 “Lohlakaniphile uyacabangisisa ngako konkhe lakwentako.”​—Taga 14:15.

 Ngenca yekutsi tekuchumana tingamlimata umntfwana wakho, awukaphoceleleki kutsi umvumele atisebentise. Ngaphambi kwekuvumela umntfwana wakho kutsi asebentise tekuchumana, ciniseka kutsi ukhule ngalokwenele kutsi angakhona kulandzela sikhatsi lomkalele sona. Ciniseka nekutsi uyakwati kukhetsa bangani labakahle futsi uyakugwema kubukela tintfo letingcolile.

•   Kuze utfole lokunyenti, fundza sihloko lesitsi “Kufanele Yini Kutsi Umntfwana wami Atisebentise Tinhlelo Tekuchumana?” nalesitsi “Kufundzisa Bantfwana bakho Labaseminyakeni Yekutfomba Kusebentisa Tekuchumana Ngekuphepha.”

 ‘Sisebentise Kahle Sikhatsi Sakho.’​—Kubase-Efesu 5:16.

 Nangabe umvumela umntfwana wakho kutsi asebentise tekuchumana, mbekele imitsetfo, umtjele kutsi angatisebentisa njani futsi nini, uphindze umchazele kutsi lemitsetfo itamsita njani kutsi ahlale aphephile. Nangabe indlela umntfwana wakho latiphatsa ngayo ishintja, kungenteka loko kukhombisa kutsi sekufanele uyinake indlela lasebentisa ngayo tekuchumana futsi umbekele imitsetfo.

•   Sebentisa i-video yemidvwebo yabopopayi lenesihloko lesitsi Hlakanipha Nawusebentisa Tekuchumana kuze usite umntfwana wakho abone kutsi lemitsetfo lombekele yona ibaluleke ngani.

 LiBhayibheli litsi siphila etikhatsini “letibucayi lokumatima kubhekana nato.” (2 KuThimothi 3:1-5) Nome kunjalo, liphindze lisinikete teluleko lesingatisebentisa kuze sibhekane nalobumatima. Kunetihloko letingetulu kwa-20 letisekelwe eBhayibhelini letimayelana nekucindzeteleka kwebantfu labasha letingasita batali kanye nebantfwana babo.