NJENGOBA Jehova bekabiketele, Israyeli wehlukana ngemuva kwekutsi Solomoni ashiye kukhulekela kweliciniso. Indvodzana yakhe leyamlandzela, Rehobowamu yaba yinkhosi lelukhuni. Ngako-ke tive letilishumi taka-Israyeli tahlubuka tenta umbuso waka-Israyeli losenyakatfo. Tive letimbili tahlala tetsembekile ebukhosini baDavide lobabuseJerusalema, futsi takha umbuso wakaJuda loseningizimu.

Yomibili lemibuso yaba netinkinga letinyenti ngenca yekungabi nelukholo nekungalaleli kwemakhosi ayo. Umbuso waka-Israyeli waba netinkinga letinyenti nakakhulu kunembuso wakaJuda, ngoba tatsi tisuka nje, emakhosi awo asungula kukhulekela kwemanga. Nangetulu kwemisebenti lemikhulu leyentiwa baphrofethi lababili bo-Elija na-Elisha, njengekuvusa labafile, ema-Israyeli abechubeka abuyela endleleni yawo lembi. Ekugcineni Nkulunkulu wabangela kutsi umbuso losenyakatfo ubhujiswe ngema-Asiriya.

Umbuso wakaJuda wahlala sikhatsi lesingetudlwana kweminyaka lelikhulu kunaloyo waka-Israyeli, kodvwa nawo wajeziswa nguNkulunkulu. Ambalwa kuphela emakhosi akaJuda lalalela sicwayiso sebaphrofethi baNkulunkulu, futsi etama kuhola sive kutsi sibuyele kuJehova. Sibonelo saloku yiNkhosi Josaya, leyacala ngekucedza kukhulekela kwemanga kaJuda futsi yalungisa lithempeli laJehova. Ngesikhatsi kutfolakala incwadzi yekucala yeMtsetfo waNkulunkulu leyabhalwa nguMosi, Josaya watsintseka inhlitiyo wase ucinisa umkhankaso wakhe wekulungisa lithempeli.

Kuyadzabukisa kutsi inkhosi leyalandzela Josaya ayizange isilandzele sibonelo sakhe lesihle. Ngako-ke Jehova wabese uvumela baseBhabhulona kutsi bahlasele Juda futsi babhubhise liJerusalema nelithempeli lalo. Labasindza batfunjelwa eBhabhulona. Nkulunkulu wabiketela kutsi batawutfunjwa iminyaka lengu-70. Sonkhe leso sikhatsi live lakaJuda lahlala lingenamuntfu, kwaze kwaba kulapho lesive sema-Israyeli sikhululwa futsi sibuyela eJerusalema.

Kute lenye inkhosi lebeyitawulandzela ibuse ebukhosini baDavide, kuze kubuse Mesiya, uMsindzisi lobekatsenjisiwe. Linyenti lalamakhosi lake abusa eJerusalema, lakhombisa ngetento tawo letimbi kutsi kute umuntfu longakapheleli longakhona kubusa bantfu ngendlela lenhle. NguMesiya kuphela longakhona kukwenta loko. Jehova watsi enkhosini yekugcina yaka-Israyeli: ‘Susa lomchele.  . . Ungeke ube walomunye umuntfu, aze efike lowo lokunguyena kungewakhe sibili; ngiyakuwunika yena.’—Hezekeli 21:26, 27.

—Lendzaba itsetfwe encwadzini ya-1 Emakhosi; na-2 Emakhosi; 2 Tikhronike sehluko 10-36; Jeremiya 25:8-11.