SEHLUKO 2
Rebheka Abefuna Kujabulisa Jehova
Rebheka abengumfati lotsandza Jehova. Libito lendvodza yakhe kwakungu-Isaka, futsi nayo beyimtsandza Jehova. BoRebheka na-Isaka bahlangana njani? Rebheka waveta njani kutsi abefuna kujabulisa Jehova? Asesifundze kabanti ngaye.
Batali ba-Isaka bekungu-Abrahama naSara. Bebahlala eveni laseKhenani, lebelinebantfu labangamkhonti Jehova. Kodvwa Abrahama abefuna kutsi indvodzana yakhe ishade nentfombi lekhonta Jehova. Ngako watfuma inceku yakhe, lokungenteka bekungu-Eliyezeri kutsi ihambe iyofunela Isaka umfati endzaweni lebitwa ngekutsi yiHarani, lapho bekunetihlobo ta-Abrahama khona.
Rebheka abetimisele kusebenta kamatima kuze anatsise emakamela
Eliyezeri wahamba naletinye tinceku ta-Abrahama. Loluhambo lwabo beluludze kakhulu. Ngako bahamba nemakamela lalishumi baphetse kudla kanye netipho. Eliyezeri abetayibona njani intfombi lebekatayikhetsela Isaka? Ngesikhatsi yena naletinceku labehamba nato befika eHarani, bema ngasemtfonjeni ngobe Eliyezeri bekati kutsi bantfu bebeta ngaleso sikhatsi kutewukha emanti. Wathantaza kuJehova watsi: ‘Nangabe ngicela intfombi kutsi inginatsise emanti, bese yona inatsisa mine kanye nemakamela ami, ngitawukwati kutsi ngiyo loyikhetsile.’
Ngemuva kwaloko, kwachamuka intfombi lokutsiwa nguRebheka ite emtfonjeni. LiBhayibheli litsi Rebheka abemuhle kakhulu. Eliyezeri wamcela kutsi amnatsise emanti, yena watsi: ‘Kulungile. Ngitawuhamba ngiyokukhela emanti, futsi ngikhele nemakamela akho.’ Asewucabange nje ngaloku! Njengobe emakamela anatsa emanti lamanyenti nawomile, kwadzingeka kutsi Rebheka aye emtfonjeni tikhatsi letinyenti. Uyambona yini kulesitfombe kutsi usebenta matima kangakanani?— Eliyezeri yammangalisa indlela Jehova lawuphendvula ngayo umthantazo wakhe.
Eliyezeri wanika Rebheka tipho letinyenti letinhle. Rebheka wabese ucela Eliyezeri naleletinye tinceku kutsi baye naye ekhaya kubo. Eliyezeri wachaza kutsi kungani Abrahama abemtfume lapho, nekutsi Jehova uwuphendvule njani umthantazo wakhe. Umndeni wakuboRebheka wajabula kakhulu futsi wamvumela kutsi ashade na-Isaka.
Rebheka waya eKhenani na-Eliyezeri futsi washada na-Isaka
Kodvwa ucabanga kutsi Rebheka abefuna yini kushada na-Isaka?— Rebheka bekati kutsi nguJehova labetfume Eliyezeri lapho. Ngako ngesikhatsi umndeni wakubo umbuta kutsi uyafuna yini kuhamba aye eKhenani kute ashade na-Isaka, watsi: ‘Yebo, ngiyafuna kuhamba.’ Ngaso leso sikhatsi, Rebheka wahamba na-Eliyezeri. Nabefika eKhenani, washada na-Isaka.
Ngesizatfu sekutsi Rebheka wenta loko Jehova labefuna kutsi akwente, Jehova wambusisa. Ngemuva kweminyaka leminyenti, Jesu watalwa emndenini wakhe. Nangabe wenta njengaRebheka futsi ujabulisa Jehova, nawe utakubusisa.
