UMBUTO 3
Ngingakhulumisana Njani Nebatali Bami?
BEWUNGENTA NJANI WENA?
Asewucabange nganasi simo: nguLesitsatfu entsambama. Musa loneminyaka lengu-17 sewuyicedzile imisebenti yakhe yasekhaya futsi sesikhatsi sekutsi naye atsi kuphumula. Utijika esofeni bese uvula i-TV.
Ngaso leso sikhatsi uyise achamuke, abonakala angakajabuli.
“Musa! Uhleti leni lapho ugcolotele i-TV kantsi ngabe ulekelela umnakenu lomncane ngemsebenti wakhe wesikolo? Awuva wena mfana mani!”
“Ey Nkosiyam,” kusho Musa akhulumela phansi kodvwa uyevakala.
Uyise atsi kusondzela kancane. “Yewena mfana utsini?”
“Angisho lutfo Babe” kusho Musa ngelivi lekwedzelela.
Babe waMusa atfukutsele kakhulu. Ngelulaka atsi: “Ungakhulumi nami kanjalo wena mfana!”
Kube bewunguMusa, bewutasibalekela njani lesimo?
CABANGISISA!
Kukhulumisana nebatali bakho kufana nekushayela imoto. Nawuhlangana nalokuvimbe umgwaco, ufuna lenye indlela.
NASI SIBONELO:
Intfombatane lokutsiwa nguLeya itsi: “Kulikhuni kucoca nababe. Ngaletinye tikhatsi ngitsi nangikhuluma naye, ngimuve sekatsi, ‘ncesi, bewukhuluma nami?’”
LEYA ANGENTA KUNYE KULOKU LOKUTSATFU
-
Angakhuluma kabi neyise.
Mhlawumbe amemete, “Kantsi yini ngawe Babe? Ngicela ungilalele! Kubalulekile loku lengifuna kukusho!”
-
Angayekela kucoca neyise.
Avele nje ayekele kwenta imetamo yekukhuluma nababe wakhe ngetinkinga takhe.
-
Angalindza kuze kuvele sikhatsi lesikahle bese uphindze uyayicala indzaba.
Angakhuluma neyise umlomo nemlomo, nobe ambhalele incwadzi ngenkinga labhekene nayo.
Kuloku lokutsatfu, ngukuphi wena longanconota kutsi Leya akwente?
KHUMBULA: Kukhona lokungenteka kumphatamisile lomuntfu lomdzala, lokwenta kutsi yena angaboni kutsi umntfwanakhe uhlushwa yini. Ngako-ke nangabe Leya akhetsa Indlela A, uyise angamangala kutsi sekwentenjani manje. Lendlela angeke imente neyise kutsi amlalele futsi itawukhombisa kungamhloniphi lomuntfu lomdzala. (Efesu 6:2) Ecinisweni, kukhetsa lendlela ngeke kube lusito kunome ngubani kubo bobabili.
Kuhlangana nentfo levimbe umgwaco akusho kuphela kweluhambo, nawe tfola lenye indlela yekukhuluma nebatali bakho
Ngisho nome Indlela B kungaba ngiyo lemelula kakhulu, kodvwa nayo akusiko kuhlakanipha kuyikhetsa. Leni? Ngoba kuze akhone kulungisa kahle tinkinga takhe, kufanele Leya akhulume neyise, ngako kubalulekile kutsi uyise ati kutsi kwentekani ekuphileni kwemntfwanakhe kute akhone kumsita. Kutithulela akufezi lutfo.
Ngekukhetsa Indlela C, Leya akavumeli kutsi tinkinga takhe timvimbe kutsi angakwenti lokulungile. Esikhundleni saloko, wetama kuyibekela lesinye sikhatsi lenkinga yakhe. Nangabe akhetsa nekubhalela uyise incwadzi, loko kungasheshe kumente ative ancono kakhulu.
Kubhala incwadzi kungaphindze kumsite kutsi acabangisise kahle ngaloko lafuna kukusho. Uyise nakafundza lencwadzi utawubona kutsi yini lena Leya abefuna kumtjela yona, futsi kutamsita kutsi abucondze kancono bumatima lendvodzakati yakhe lebhekene nabo. Lendlela yesitsatfu ibasita bobabili, Leya kanye neyise futsi ilandzela sikhutsato seliBhayibheli ‘sekuphishanekela tintfo letiletsa kuthula.’
Ngutiphi letinye tindlela Leya langatisebentisa?
Ikhona yini loyicabangako. Cabanga-ke ngemphumela waloko lokucabangako.
UNGATISHO TINTFO LETITAWUVAKALA KABI
Khumbula kutsi akusito tokhe tintfo lotishoko batali bakho labativa ngendlela lotisho ngayo.
NASI SIBONELO:
Batali bakho bangabuta kutsi yini lekwenta ubukeke ungakajabuli. Bese wena uphendvula utsi, “Ngicela singayikhulumi lendzaba.”
Batali bakho bangakuva shengatsi utsi ‘awubetsembi. Tinkinga takho ubona kuncono kutikhuluma nebangani bakho hhayi nabo.’
Ticabange usesimeni lesimatima, batali bakho bafuna kukusita. Kodvwa wena utsi: “Ningakhatsateki ngami. Ngitatibonela mine.”
-
Yini batali bakho labangayiva?
-
Nguyiphi indlela lekahle longaphendvula ngayo?
Lokunye Longatsandza Kukuhlola
LOKUSHIWO BONTSANGA
Kuphila Kwami Nangiseminyakeni Yekutfomba—Ngingakhulumisana Njani Nebatali Bami?
Kunetinzuzo letinyenti kunaleto loticabangako.
IMIDVWEBO YABOPOPAYI
Ngingakhulumisana Njani Nebatali Bami Ngendlela Lekahle?
Ungakhulumisana njani nebatali bakho nawutiva ungakhanuki kukhuluma?
