1. Yini lebalulekile kute kube nekuphila kwemndeni lokujabulisako?

NKULUNKULU JEHOVA ufuna kutsi kuphila kwemndeni wakho kujabulise. LiVi lakhe liBhayibheli, liniketa lilunga nelilunga lemndeni ticondziso, lichaza indzima Nkulunkulu lafuna lelinye nalelinye libe nayo. Lapho lilunga ngalinye lemndeni lifeza indzima yalo ngekuvumelana nesicondziso saNkulunkulu, kuba yinjabulo yodvwa emndenini. Jesu watsi: “Babusisiwe labo labeva livi laNkulunkulu, bese bayalenta.”—Lukha 11:28.

2. Injabulo yemndeni isime ekucapheleni ini?

² Kujabula kwemndeni kusime ngalokuyinhloko ekucapheleni kwetfu kutsi nguJehova lowaphemba imindeni, loyo Jesu lambita ngekutsi: ‘NguBabe wetfu.’ (Matewu 6:9) Yonkhe imindeni lekhona lapha emhlabeni ikhona ngaBabe wetfu wasezulwini—futsi ngalokucinisekile uyati kutsi yini ledzingekako kute imindeni ijabule. (Efesu 3:14, 15) Ngaloko-ke, yini lefundziswa liBhayibheli ngendzima yelilunga ngalinye emndenini?

3. LiBhayibheli likuchaza njani kucala kwemndeni, futsi kungani sati kutsi loko lelikushoko kuliciniso?

³ Jehova wadala bantfu bekucala, Adamu na-Eva, futsi wabahlanganisa  njengendvodza nemfati. Wababeka ekhayeni lelihle emhlabeni lolipharadisi—insimi yase-Edeni—futsi wabatjela kutsi babe nebantfwana. Jehova watsi: “Talanani, nandze, nigcwalise umhlaba.” (Genesisi 1:26-28; 2:18, 21-24) Lena akusiyo nje indzaba lelihaba nobe inganekwane, ngobe Jesu wakhombisa kutsi loko lokubhalwe kuGenesisi ngekucala kwemndeni kuliciniso. (Matewu 19:4, 5) Nanobe sinetinkinga letinyenti futsi nekuphila kungasiko ngendlela Nkulunkulu abehlose ngayo, ase sibone kutsi kungani imindeni isengajabula.

4. (a) Lingentani lilunga ngalinye lemndeni kwenta likhaya libe ngulelitfokomele? (b) Kungani kufundza ngekuphila kwaJesu kubalulekile ekwenteni umndeni ujabule?

⁴ Lilunga ngalinye lemndeni lingasita ekwenteni kuphila kwemndeni kujabulise ngekulingisa Nkulunkulu ekuboniseni lutsandvo. (Efesu 5:1, 2) Noko-ke, singamlingisa njani Nkulunkulu sibe singamboni? Singafundza ngendlela Jehova lenta ngayo tintfo ngobe watfuma iNdvodzana yakhe lelitubulo isuka ezulwini yeta emhlabeni. (Johane 1:14, 18) Lapho isemhlabeni leNdvodzana, Jesu Khristu, yalingisa Babe wayo wasezulwini kangangekutsi kuyibona nekuyilalela kwakufanana nekuba naJehova nekulalela Yena. (Johane 14:9) Ngako-ke, ngekufundza ngelutsandvo Jesu lalubonisa nekulandzela sibonelo sakhe, lilunga ngalinye lemndeni lingasita ekwenteni kuphila kwemndeni kujabulise.

5, 6. (a) Kungani indlela Jesu laphatsa ngayo libandla isibonelo kumadvodza? (b) Kufanele senteni kute sitsetselelwe tono?

⁵ LiBhayibheli litsi emadvodza kufanele aphatse bafati bawo ngendlela Jesu laphatsa ngayo bafundzi bakhe. Asewulalele lesicondziso seliBhayibheli: “Madvodza tsandzani bafati benu, njengobe naKhristu alitsandza libandla. Wanikela ngekuphila kwakhe ngenca yalo,  . . Emadvodza kufanele atsandze bafati bawo, njengobe atsandza imitimba yawo. Indvodza letsandza umfati wayo ititsandza yona. Phela kute umuntfu lowake  watondza umtimba wakhe, kepha uyawondla, awunakekele, njengobe naKhristu enta ebandleni.”—Efesu 5:23, 25-29.

⁶ Lutsandvo Jesu labenalo ngelibandla lebafundzi bakhe lusibonelo lesihle kumadvodza. Jesu “wabatsandza kwaze kwaba sekugcineni,” wadzela kuphila kwakhe ngenca yabo nakuba bebangakapheleli. (Johane 13:1; 15:13) Nemadvodza kanjalo ayakhutsatwa: “Tsandzani bafati benu, ningabacansukeli.” (Kholose 3:19) Yini lengasita emadvodza alalele leseluleko, ikakhulukati nangabe umfati ngaletinye tikhatsi enta tintfo ngekungahlakaniphi? Indvodza kufanele ikhumbule kutsi nayo iyawenta emaphutsa, nekutsi kudzingeka yenteni kuze itsetselelwe nguNkulunkulu. Ngukuphi loko? Kufanele itsetselele labo labayonako, loko kuhlanganisa nemkayo. Naye umfati kufanele ente lokufanako. (Matewu 6:12, 14, 15) Umshado uyophumelela lapho kuhlanganiswe bantfu lababili labatsetselelanako.

7. Yini Jesu layicaphela, futsi abekela emadvodza siphi sibonelo?

⁷ Emadvodza kufanele acaphele kutsi Jesu abehlale abonisa kubacabangela bafundzi bakhe. Bekati kutsi babutsakatsaka emtimbeni futsi banetidzingo tenyama. Nasi sibonelo: Ngesikhatsi badziniwe, watsi: “Ase sibonane sodvwa, siphumule kancane.” (Makho 6:30-32) Ngendlela lefananako, nebafati kufanele bacatjangelwe. LiBhayibheli libachaza ngekutsi ‘basitja lesibutsakatsaka’ futsi emadvodza atjelwa kutsi ‘abahloniphe.’ Kungani kushiwo njalo? Sizatfu sikutsi indvodza nemfati bayoba ‘tindlalifa temusa wekuphila’ ngendlela lelinganako. (1 Phetro 3:7) Emadvodza kufanele akhumbule kutsi umuntfu nakafuna kuba ligugu kuNkulunkulu kufanele etsembeke, akunadzaba kutsi uyindvodza nobe ungumfati.—Tihlabelelo 101:6.

8. (a) Indvodza “letsandza umfati wayo ititsandza yona” njani? (b) Kusho kutsini kuba “nyamanye” kwendvodza nemfati?

⁸ LiBhayibheli litsi indvodza “letsandza umfati wayo ititsandza yona.” Loku kwentiwa kutsi indvodza nemfati ‘abasebabili, kodvwa sebamunye,’ njengobe Jesu asho. (Matewu 19:6) Ngaleso sizatfu ngamunye kubo akukafanele aye ecasini nalomunye umuntfu langakashadi naye. (Taga 5:15-21; Hebheru  13:4) Loku bangakwenta kuphela ngekutsi lomunye anake sidzingo salomunye, kubete loligovu lotinaka yena yedvwa. (1 Khorinte 7:3-5) Naka nasi sikhumbuto: “Kute umuntfu lowake watondza umtimba wakhe, kepha uyawondla, awunakekele.” Emadvodza kufanele atsandze bafati bawo njengobe atitsandza wona, akhumbula kutsi ayolandzisa enhlokweni yawo, Jesu Khristu.—Efesu 5:29; 1 Khorinte 11:3.

9. Nguyiphi imfanelo Jesu abenayo lokukhulunywa ngayo kuFiliphi 1:8, futsi kungani emadvodza kufanele ayibonise lemfanelo kubafati bawo?

⁹ Umphostoli Pawula wakhuluma “ngesihe [lutsandvo lolujulile] saKhristu Jesu.” (Filiphi 1:8) Ngesizatfu sekutsi Jesu abenelutsandvo, labasikati lababa bafundzi bakhe bebakujabulela kuba naye. (Johane 20:1, 11-13, 16) Ngaloko-ke, bafati bafuna kuboniswa lutsandvo ngemadvodza abo.

10. Jesu ubabekela njani bafati sibonelo?

¹⁰ Umndeni unjengenhlangano, futsi kute ubambisane kahle, udzinga inhloko. Ngisho naJesu ukhona Loyo latitfoba kuye njengeNhloko yakhe. ‘Inhloko yaKhristu nguNkulunkulu’ njengobe nje ‘nenhloko yemfati kuyindvodza.’ (1 Khorinte 11:3) Jesu usibonelo lesihle sekutitfoba ebunhlokweni baNkulunkulu, njengobe natsi sonkhe sinenhloko lesifanele sititfobe kuyo.

11. Umfati kufanele ayiphatse njani indvodza yakhe, futsi uyoba yini umphumela wekuyiphatsa kwakhe lokunjalo?

¹¹ Emadvodza akapheleli enta emaphutsa futsi kanyenti awabi tinhloko ngendlela lengiyo. Ngako, umfati kumele enteni? Akukafaneli akubukele phansi loko indvodza yakhe lekwentako nobe etame kutibambela bunhloko bayo. Umfati kufanele akhumbule kutsi umbono waNkulunkulu wekuba nemoya lomnene ubaluleke kakhulu. (1 Phetro 3:4) Ngekuba nemoya lonjalo, kwenta kube melula ngaye kutitfoba ngendlela Nkulunkulu lafuna ngayo, ngisho nalapho timo tingemelula. LiBhayibheli litsi: ‘Umfati akahloniphe indvodza yakhe.’ (Efesu 5:33) Kodvwa kutsiwani nangabe indvodza ingamemukeli Khristu njengeNhloko yayo? LiBhayibheli likhutsata bafati, litsi:  “Tfobelani emadvodza enu, kuze kutsi nakukhona emadvodza langalikholwa livi, nawo azuzeke ngaphandle kwenkhulumo, azuzwe intfobeko yebafati bawo, nakabona similo senu lesimsulwa lesinekwesaba Nkulunkulu.”—1 Phetro 3:1, 2.

12. Kungani kungasiyo intfo lembi ngemfati kutsi ngenhlonipho avete imibono yakhe?

¹² Kungakhatsaliseki kutsi indvodza yakhe iyakholwa nobe ayikholwa, umfati usuke angedzeleli nangabe aveta ngenhlonipho umbono wakhe lohlukile kuloyo wendvodza yakhe. Kungenteka kutsi umbono wakhe muhle, futsi nangabe indvodza yakhe iwulalela, ungazuzisa umndeni wonkhe. Nakuba Abrahama angazange avume ngalesikhatsi umfati wakhe Sara amtjela loko abekucabanga ngendlela lebeyingalungiswa ngayo inkinga lebebanayo emndenini wabo, Nkulunkulu watsi kuye: “Kwente njengobe akutjelile.” (Genesisi 21:9-12) Kuliciniso kutsi lapho indvodza yenta sincumo sekugcina entfweni letsite lesingaphikisani nemtsetfo waNkulunkulu, umfati wayo uyobe ukhombisa kutitfoba nakasisekela sincumo sayo.—Imisebenti 5:29; Efesu 5:24.

13. (a) Umbhalo waThithusi 2:4, 5 ukhutsata bafati labendzile kutsi benteni? (b) Litsini liBhayibheli ngekwehlukana nangedivosi?

¹³ Nangabe afeza indzima yakhe, umfati angenta lokunyenti kwekunakekela umndeni wakhe. Nasi sibonelo: LiBhayibheli likhutsata bafati labashadile kutsi “batsandze emadvodza abo nebantfwana babo, babe ngulabacondzile nalabacotfo; baphatse kahle emakhaya abo, balunge, batfobele emadvodza abo.” (Thithusi 2:4, 5) Umfati longumake lonakekela umndeni wakhe, nalotitfobako endvodzeni yakhe, uyotsandvwa futsi ahlonishwe ngumndeni wakhe. (Taga 31:10, 28) Njengobe umshado uhlanganisa bantfu labangakapheleli, letinye tinkinga letimatima tiholela ekutseni bantfu labatsatsene badivose. LiBhayibheli livumela kwehlukana ngephansi kwetimo letitsite kuphela. Nobe kunjalo, kwehlukana akukafanele kutsatfwe njengentfo lencane nje, ngobe seluleko seliBhayibheli sitsi: “Umfati angehlukani nendvodza yakhe. . . . Nendvodza ingamlahli umfati wayo.” (1 Khorinte 7:10, 11) Nangabe lomunye  kulabo labatsatsene aphingile liBhayibheli liyakuvumela kutsi badivose.—Matewu 19:9.

14. Jesu abebaphatsa njani bantfwana, futsi yini bantfwana labayidzingako kubatali babo?

¹⁴ Jesu wabekela batali sibonelo lesihle endleleni labephatsa ngayo bantfwana. Ngalesikhatsi labanye betama kuvimba bantfwana kutsi bangayi kuye, watsi: “Vumelani bantfwana bete kimi, ningabavimbeli.” LiBhayibheli litsi “wabatsatsa labantfwana, wabagona, wabeka tandla etikwabo, wababusisa.” (Makho 10:13-16) Njengobe Jesu atinika sikhatsi nebantfwana, akudzingeki yini nawe ube nesikhatsi nendvodzana kanye nendvodzakati yakho? Abadzingi nje sikhashana sekuba nawe, kodvwa badzinga sikhatsi lesinyenti. Kudzingeka ube nesikhatsi sekubafundzisa, ngobe nguloko Jehova layala batali kutsi bakwente.—Dutheronomi 6:4-9.

15. Yini batali labangayenta kute bavikele bantfwana babo?

¹⁵ Njengobe lelive lichubeka ligcwala bubi nakakhulu, bantfwana badzinga batali batewubavikela kubantfu lababi labafuna kubalimata, njengalabo labangahle babahlukubete ngekwelicasi. Ase ubuke indlela Jesu labavikela ngayo bafundzi bakhe, labo abebabita ngekutsi ‘bantfwana bakhe.’ Ngalesikhatsi  aboshiwe futsi asatawubulawa, Jesu wabalungiselela indlela yekubaleka. (Johane 13:33; 18:7-9) Njengemtali, kudzingeka utiphaphamele tindlela taDeveli tekwetama kulimata bantfwana bakho. Kudzingeka ubecwayise. * (1 Phetro 5:8) Ngobe kuphepha kwabo emtimbeni, emoyeni, kanye nesekutiphatseni, akukaze kube sengotini lengaka esikhatsini lesendlulile njenganyalo.

16. Yini batali labangayifundza endleleni Jesu lenta ngayo kubafundzi bakhe ngalesikhatsi benta tiphosiso?

¹⁶ Ngebusuku bangembi kwekufa kwaJesu, bafundzi bakhe  bebaphikisana ngekutsi ngubani kubo bonkhe lomkhulu. Kunekutsi abatfukutselele, Jesu wachubeka akhuluma nabo futsi ababekela netibonelo. (Lukha 22:24-27; Johane 13:3-8) Nangabe ungumtali, uyabona yini kutsi ungasilingisa njani sibonelo saJesu endleleni yekucondzisa bantfwana bakho? Kuliciniso kutsi bayasidzinga sicondziso, kodvwa kudzingeka siniketwe “ngekuhlanipha” hhayi ngekutfukutsela. Angeke ufune kusho emagama ngekunganaki “lahlaba njengesikhali.” (Jeremiya 30:11; Taga 12:18) Sicondziso kudzingeka siniketwe ngendlela letakwenta umntfwana asibone kutsi besimfanele.—Efesu 6:4; Hebheru 12:9-11.

17. Jesu ubabekela njani sibonelo lesihle bantfwana?

¹⁷ Bantfwana bangafundza yini kuJesu? Yebo, bangafundza! Ngesibonelo sakhe, Jesu wabonisa kutsi bantfwana kufanele bahloniphe batali babo. Waze watsi: “Kepha ngikhuluma loko, njengobe ngifundziswe nguBabe.” Wachubeka watsi: “Ngobe sonkhe sikhatsi ngenta lokutsandzekako kuye.” (Johane 8:28, 29) Jesu abemlalela Babe wakhe wasezulwini, futsi liBhayibheli litsi bantfwana kufanele balalele batali babo. (Efesu 6:1-3) Nobe Jesu abengumuntfu lophelele, wabalalela batali bakhe labebangakapheleli, Josefa naMariya. Ecinisweni lonkhe, loku kwaba nemtselela enjabulweni yemndeni wakubo.—Lukha 2:4, 5, 51, 52.

18. Kungani Jesu ngaso sonkhe sikhatsi abelalela Babe wakhe, futsi ngubani lojabulako lapho bantfwana balalela batali babo lamuhla?

¹⁸ Bantfwana bangaticaphela yini tindlela labangalingisa ngato Jesu kute bente batali babo bajabule? Kuliciniso, ngaletinye tikhatsi bantfwana bangakutfola kumatima kulalela batali babo, kodvwa nguloko kanye Nkulunkulu lafuna bakwente. (Taga 1:8; 6:20) Jesu abemlalela ngaso sonkhe sikhatsi Babe wakhe wasezulwini, ngisho nasetimeni letimatima. Ngalesinye sikhatsi intsandvo yaNkulunkulu yayifaka ekhatsi kutsi Jesu ente intfo letsite lematima kakhulu, Jesu watsi: “Susa kimi lendzebe [intfo letsite lebekudzingeka yenteke] yelusizi.” Nobe  kunjalo, Jesu wenta loko Nkulunkulu labefuna kutsi akwente, ngobe abecaphela kutsi Babe wakhe wati ncono. (Lukha 22:42) Ngekufundza kulalela, bantfwana bangajabulisa batali babo kanye naBabe wabo wasezulwini. *—Taga 23:22-25.

19. (a) Sathane ubalinga njani bantfwana? (b) Kutiphatsa kabi kwebantfwana kungaba namuphi umphumela kubatali?

¹⁹ Develi walinga Jesu, futsi siyaciniseka kutsi utabalingela kutsi bente lokubi labasha. (Matewu 4:1-10) Sathane Develi usebentisa bontsanga kute balinge labasha, futsi kumatima kumelana nabo. Kubaluleke kakhulu-ke kutsi labasha bangatihlanganisi nabontsanga labenta lokubi. (1 Khorinte 15:33) Dina indvodzakati yaJakobe abelibala kutihlanganisa nebantfu labangamkhonti Jehova, futsi loko kwamfaka elubishini. (Genesisi 34:1, 2) Cabanga nje ngendlela umndeni wakini longaphatseka kabi ngayo nangabe lilunga lawo litiphatsa kabi ngekwelicasi!—Taga 17:21, 25.

20. Kute nihlale nijabulile ekhaya, yini lilunga ngalinye lemndeni lekufanele liyente?

²⁰ Kulula kubeketelela tinkinga temndeni nangabe nisebentisa  umyalo weliBhayibheli. Ecinisweni, kusebentisa lomyalo walo kuphela kwendlela lengenta umndeni ujabule. Ngako ninemadvodza, tsandzani bafati benu, nibaphatse ngendlela Jesu laphatsa ngayo libandla. Bafati, titfobeni ekucondziseni kwemadvodza enu, nilandzele sibonelo semfati lohlakaniphile lokukhulunywa ngaye kuTaga 31:10-31. Batali, ceceshani bantfwana benu. (Taga 22:6) Bobabe ‘phatsani kahle imiti yenu.’ (1 Thimothi 3:4, 5; 5:8) Bantfwana lalelani batali benu. (Kholose 3:20) Kute ngisho namunye emndenini lophelele, bonkhe bayawenta emaphutsa. Ngako titfobeni, nicele intsetselelo kulomunye nalomunye.

21. Nguliphi likusasa lelihle lelisembikwetfu, futsi singakwenta njani kuphila kwemindeni yetfu kujabulise ngisho kwanyalo?

²¹ Kuliciniso kutsi liBhayibheli linemiyalo nemitsetfo leminyenti lebalulekile lephatselene nekuphila kwemndeni. Ngetulu kwaloko lisifundzisa ngelive lelisha laNkulunkulu nemhlaba lolipharadisi lapho kuyohlala bantfu labakhonta Jehova ngekujabula. (Sembulo 21:3, 4) Cabanga ngelikusasa lelimangalisako lelisembikwetfu! Ngisho kwanyalo, singaba nemindeni lejabulako ngekutsi sisebentise ticondziso teliVi laNkulunkulu, liBhayibheli.