UMbuso waNkulunkulu unguhulumende wasezulwini. Utawungena esikhundleni sabo bonkhe laba labanye bohulumende labakhona, futsi utawubangela kutsi intsandvo yaNkulunkulu yentiwe emhlabeni nasezulwini. Leti tindzaba letimnandzi sibili. Madvutane nje UMbuso waNkulunkulu utawenetisa sifiso sebantfu sekuba nahulumende lomuhle. Utawenta nekutsi bonkhe bantfu labahlala emhlabeni babe nebunye.​—Fundza Danyela 2:44; Matewu 6:9, 10; 24:14.

Umbuso uba nenkhosi. Jehova wabeka Jesu Khristu iNdvodzana yakhe kutsi abe yiNkhosi yeMbuso waKhe.​—Fundza Sembulo 11:15.

INdvodzana yaNkulunkulu kuyayifanela kuba yiNkhosi ngobe inemusa futsi iyakumelela lokulungile. (Matewu 11:28-30) Futsi inemandla lamanyenti ekusita bantfu ngesizatfu sekutsi itawubusa lomhlaba isezulwini. Ngemuva kwekuvuswa kwakhe, Jesu wenyukela ezulwini futsi walindza ngesekudla saJehova. (Hebheru 10:12, 13) Ekugcineni, Nkulunkulu wamnika emandla ekutsi acale kubusa.​—Fundza Danyela 7:13, 14.

Kunelicembu lelibitwa ngekutsi ‘ngulabangcwele’ leliyawubusa naJesu ezulwini. (Danyela 7:27) Bekucala kulaba labangcwele labakhetfwa bekubaphostoli labetsembekile baJesu. Nanyalo, Jehova seloku uyachubeka nekukhetsa emadvodza nebesifazane labetsembekile kutsi babe yincenye yalaba labangcwele. NjengaJesu, nabo bavuswa sebanemtimba wemoya.​—Fundza Johane 14:1-3; 1 Khorinte 15:42-44.

 Bangakhi bantfu labatawukuya ezulwini? Jesu wababita ngekutsi ‘ngumhlambi lomncane.’ (Lukha 12:32) Ekugcineni batawukuba ngu-144 000. Bayawubusa lomhlaba bakanye naJesu.​—Fundza Sembulo 14:1.

UMbuso waNkulunkulu wacala kubusa nga-1914. * Ngemuva kwekubekwa kutsi abe yiNkhosi, intfo yekucala Jesu layenta kuphonsa Sathane kanye nemadimoni akhe emhlabeni. Sathane watfukutsela kakhulu, wase ucala kubanga tinkinga kuwo umhlaba. (Sembulo 12:7-10, 12) Kusukela ngaleso sikhatsi, kububula kwebantfu bekusolo kwandza. Timphi, indlala, tifo kanye nekutamatama kwemhlaba, konkhe kuyincenye ‘yesibonakaliso’ sekutsi madvutane uMbuso utawulungisa tinkinga tasemhlabeni.​—Fundza Lukha 21:7, 10, 11, 31.

Ngemsebenti wekushumayela lowentiwa emhlabeni wonkhe, uMbuso waNkulunkulu sewuvele ucalile kuhlanganisa sicumbi lesikhulu sebantfu labavela kuto tonkhe tive. Tigidzi tebantfu labatfobekile tiba ngephansi kweMbuso waNkulunkulu loholwa nguJesu. LoMbuso utawubavikela labantfu lapho sewubhubhisa lelive lelibi. Bonkhe labafuna kuzuza eMbusweni waNkulunkulu kufanele bafundze kutfobela Jesu.​—Fundza Sembulo 7:9, 14, 16, 17.

Ngaleminyaka lengu-1 000, loMbuso utawuyifeza injongo yaNkulunkulu yasekucaleni ngebantfu. Wonkhe umhlaba utawuba lipharadisi. Ekugcineni, Jesu uyawubuyisela uMbuso kuYise. (1 Khorinte 15:24-26) Ukhona yini umuntfu lomatiko longatsandza kumtjela ngaloMbuso waNkulunkulu?​—Fundza Tihlabelelo 37:10, 11, 29.