“Nangisakhula, intfo lematima lokwadzingeka kutsi ngilwe nayo kutsandza bantfu bebulili lobufana nebami. Bengicabanga kutsi kutawendlula, kodvwa lemiva solo isangihlupha.”​—David, 23.

 David ngumKhristu lofuna kujabulisa Nkulunkulu. Angamjabulisa yini Nkulunkulu abe atsandza bantfu bebulili lobufana nebakhe? Vele Nkulunkulu utiva njani ngebutabani?

•  Litsini liBhayibheli?

•  Ngabe loko kusho kutsi . . . ?

•  Kutsiwani nangabe . . . ?

 Indlela bantfu labatsatsa ngayo butabani iyehlukahluka kuye ngemasiko endzawo nobe sikhatsi lokuphilwa kuso. Nobe kunjalo emaKhristu awabuswa yimibono yebantfu levamile nobe ‘ayiswe lena nalena ngiyo yonkhe imimoya yetimfundziso.’ (Kubase-Efesu 4:14) Kunaloko, imibono yawo ngebutabani (kanye naleminye imikhuba yekutiphatsa) ayisekela etimisweni letiseBhayibhelini.

 Simiso seliBhayibheli mayelana netento tebutabani sicacile. LiVi laNkulunkulu litsi:

•  “Ungayi ecansini nalenye indvodza.”​—Levithikhusi 18:22.

•  “Nkulunkulu wabayekelela ebubini ngekuvumelana netifiso tetinhlitiyo tabo, . . . abayekelela etinkhanukweni tabo letilihlazo, ngobe labasikati sebasebentisa imitimba yabo ngendlela lephambene nemvelo.”​—KubaseRoma 1:24, 26.

•  “Ningadukiswa. Tingwadla, labakhonta tithico, tiphingi, titabane, emadvodza lalalana nemadvodza, emasela, bantfu lababukhali, tidzakwa, labetfukako kanye netigebengu ngeke balidle lifa leMbuso waNkulunkulu.”​—1 KubaseKhorinte 6:9, 10.

 Ecinisweni, timiso taNkulunkulu tisebenta kubo bonkhe bantfu, ngisho batsandza bantfu bebulili lobufana nebabo nobe lobehlukile. Wonkhe umuntfu kufanele afundze kutibamba nakeva sifiso sekwenta intfo lengamjabulisi Nkulunkulu.​—KubaseKholose 3:5.

 Ngabe loko kusho kutsi liBhayibheli likhutsata kuzonda titabani?

 Cha. LiBhayibheli alikukhutsati kutondza labanye bantfu, kungaba ngulabatitabani nobe labangesito. Kunaloko, lisitjela kutsi ‘silwele kuba nekuthula nabo bonkhe bantfu,’ ngisho nobe baphila luphi luhlobo lwemphilo. (KumaHebheru 12:14) Ngako kubi kuphatsa kabi, kukhombisa inzondo, kanye nekwenta nobe ngabe nguluphi luhlobo lwekuhlupha titabani.

 Ngabe loko kusho kutsi emaKhristu kufanele awuphikise umtsetfo lovumela bantfu bebulili lobufanako kutsi bashade?

 LiBhayibheli likhombisa kutsi timiso taNkulunkulu ngemshado tivumela kutsi kushade indvodza nemfati. (Matewu 19:4-6) Nobe kunjalo, imitsetfo yebantfu lemayelana nekushada kwebantfu bebulili lobufanako iphatselene netindzaba tepolitiki, hhayi tekutiphatsa. LiBhayibheli litjela emaKhristu kutsi angalutsatsi luhlangotsi etindzabeni tepolitiki. (Johane 18:36) Ngako-ke, emaKhristu awakhutsati nobe aphikise imitsetfo yahulumende lemayelana nekushada kwebantfu bebulili lobufanako nobe butabani.

 Kutsiwani nangabe lotsite asitabani? Usengashintja yini?

 Yebo. Ecinisweni labanye bantfu bangelikhulu lekucala bashintja! Ngemuva kwekuveta kutsi titabani angeke tilidle lifa leMbuso waNkulunkulu, liBhayibheli litsi: “Nguloko labanye benu lebebangiko.”​—1 KubaseKhorinte 6:11.

 Ngabe loku kusho kutsi labo lebebatitabani sebete ngisho nalesincane sifiso salemphilo yabo labayishiya? Cha. LiBhayibheli litsi: “Nigcoke buntfu lobusha, lokutsi ngelwati lolungulonalona bentiwe bube busha.” (KubaseKholose 3:10) Lushintjo yintfo lechubekako.

 Kutsiwani nangabe lotsite lofuna kulandzela timiso taNkulunkulu ahlushwa tifiso tebutabani?

 Njenganobe ngabe ngusiphi lesinye sifiso, umuntfu angakhetsa kutsi uyasenetisa yini nobe cha. Kanjani? LiBhayibheli litsi: “Chubekani nihamba ngemoya futsi ngeke nize nente lokufiswa yinyama.”​—KubaseGalathiya 5:16.

 Naka kutsi lelivesi alisho kutsi lomuntfu angeke asaba nesifiso senyama. Kunaloko, ngekuhloma ngeluhlelo lolukahle lwekutadisha liBhayibheli kanye nekuthantaza, angaba nemandla ekumelana naleto tifiso.

 David, lokukhulunywe ngaye ekucaleni wabona kutsi loku kuliciniso, ikakhulukati nasekakhulume nebatali bakhe labangemaKhristu ngalenkinga yakhe. Utsi, “ngeva ungatsi ngetfulwe umtfwalo futsi mhlawumbe ngabe ngayijabulela iminyaka yami yebusha kube ngasheshe ngakhuluma nabo.”

 Ekugcineni kwako konkhe, siyajabula nasiphila ngekuvumelana netimiso taJehova. Siyaciniseka kutsi ‘tilungile, tenta inhlitiyo ijabule,’ futsi “loyo lotigcinako utfola umvuzo lomkhulu.”​—Tihlabelelo 19:8, 11.