Lemibuto ibutwa bantfu labanyenti labafelwa tihlobo tabo, futsi abafuni timphendvulo nje kuphela, kodvwa bafuna nendvudvuto. Labanye batsatsa Kubulawa Kwebantfu Labanyenti njengebubi lobukhulu kakhulu lobake bentiwa ngumuntfu, futsi bakutfola kumatima kukholwa kutsi Nkulunkulu ukhona.

 Lokungasilo liciniso: Akukalungi kubuta kutsi Nkulunkulu wakuvumelelani Kubulawa Kwebantfu Labanyenti.

 Lokuliciniso: Bantfu labanekukholwa lokucinile baye babuta kutsi kungani Nkulunkulu avumela bubi. Sibonelo nje, umphrofethi Habakhuki wabuta Nkulunkulu: “Kungani imbhubhiso nebudlova kusembikwami? Futsi kungani kungevani nekucabana kukunyenti kangaka?” (Habakhuki 1:3) Kunekutsi atsetsise Habakhuki, Nkulunkulu wenta kutsi lemibuto ibhalwe eBhayibhelini kuze bonkhe bantfu bayifundze.

 Lokungasilo liciniso: Nkulunkulu akanendzaba nekuhlupheka kwebantfu.

 Lokuliciniso: Nkulunkulu uyabutondza bubi kanye nekuhlupheka lokububangelako. (Taga 6:16-19) Ngesikhatsi saNowa, Nkulunkulu “weva buhlungu enhlitiyweni yakhe” ngenca yebubi lebebandza emhlabeni. (Genesisi 6:5, 6) Siyaciniseka kutsi Nkulunkulu weva buhlungu lobukhulu ngenca yaloKubulawa Kwebantfu Labanyenti.—Malakhi 3:6.

 Lokungasilo liciniso: Lokubulawa Kwebantfu Labanyenti bekuyindlela yaNkulunkulu yekujezisa emaJuda.

 Lokuliciniso: Nkulunkulu wayivumela iJerusamela kutsi ibhujiswe ngemaRoma ngelikhulu lekucala. (Matewu 23:37–24:2) Nobe kunjalo, kusukela ngaleso sikhatsi, Nkulunkulu akasakhetsi sive lesitsite kuze sibe ngulesikhetsekile nobe kuze asijezise. KuNkulunkulu, “kute umehluko emkhatsini wemJuda nemGriki.”—KubaseRoma 10:12.

 Lokungasilo liciniso: Kube Nkulunkulu lonelutsandvo nemandla lamakhulu abekhona, bekangeke avumele kutsi Kubulawe Bantfu Labanyenti kangaka.

 Lokuliciniso: Ngisho nobe Nkulunkulu angakubangeli kuhlupheka, kodvwa ngaletinye tikhatsi uyakuvumela kwesikhashana.—Jakobe 1:13; 5:11.

 Nkulunkulu uvumele Kubulawa Kwebantfu Labanyenti ngenca yesizatfu lesimente wavumela kuhlupheka kwebantfu, lokukulungisa tindzaba letonakala kadzeni. LiBhayibheli likuveta ngalokucacile kutsi akusuye Nkulunkulu lobusa lomhlaba, kodvwa nguDeveli. (Lukha 4:1, 2, 6; Johane 12:31) Emaciniso lamabili laseBhayibhelini angasisita sitfole kutsi Nkulunkulu ukuvumele leni Kubulawa Kwebantfu Labanyenti.

1.   Nkulunkulu wadala bantfu babanenkhululeko yekutikhetsela. Nkulunkulu watjela bantfu bekucala, bo-Adamu na-Eva, lebekakulindzele kubo, kodvwa akazange abaphocelele kutsi bamlalele. Batincumela bona lokuhle nalokubi futsi lesincumo sabo lesibi, kanye naletinye letentiwe bantfu emlandvweni, tiletsele bantfu imiphumela lemibi. (Genesisi 2:17; 3:6; KubaseRoma 5:12) Kunjengobe incwadzi iStatement of Principles of Conservative Judaism isho: “Kuhlupheka lokunyenti lokusemhlabeni kungenca yekusebentisa kabi inkhululeko yetfu yekutikhetsela.” Kunekutsi asemuke lenkhululeko yekutikhetsela, Nkulunkulu unikete bantfu litfuba lekutsi batilungisele bona tinkinga tabo.

2.   Nkulunkulu angakhona, futsi utawulungisa umonakalo lowabangelwa Kubulawa Kwebantfu Labanyenti. Nkulunkulu wetsembisa kuvusa tigidzi tebantfu letafa, lokufaka ekhatsi naleto letafa naKubulawa Bantfu Labanyenti. Utawuphindze ente labo labasindza naKubulawa Bantfu Labanyenti kutsi bangasatikhumbuli tintfo letibuhlungu letenteka. (Isaya 65:17; Imisebenti 24:15) Indlela Nkulunkulu labatsandza ngayo bantfu iyasicinisekisa kutsi utatifeza letetsembiso.—Johane 3:16.

 Bantfu labanyenti labafelwa tihlobo tabo nalabasindza naKubulawa Bantfu Labanyenti, bakhonile kuhlala banekukholwa lokucinile. Batfole nenjongo yekuphila ngekucondza kutsi Nkulunkulu ubuvumele leni bubi nekutsi utayicedza njani imiphumela yabo.