Meaho yohle e teng Warwick e se e sebetsa. Mathwasong a September, batho ba ka bang 500 ba ne ba dula Warwick. Palo eo e akarelletsa baithaopi ba kaho le basebetsi ba kamehla ba neng ba sebetsa Brooklyn pele.

Morabo rona ya etsang ditshwantsho o ntse a hlahloba dithaele tse tlo behwa maboteng a ha o kena karolong e reng “A People for Jehovah’s Name.” Dithaele tseo di ile tsa etswa hore di shebahale e ka ke tsa kgale e le hore di dumellane le sehlooho se hlalosang histori ya Dipaki Tsa Jehova.

Stephen Lett, wa Sehlopha se Busang sa Dipaki Tsa Jehova, e ne e le modula setulo wa lenaneo la temana ya letsatsi ya pele e ileng ya haswa ho tswa Warwick. Hoseng hoo, Morabo rona Lett o ile a bala lengolo le lebohang batho ba fetang 27 000 ba ileng baithaopela ho thusa ho aha moaho ona le ba bang ba bangata ba ileng ba kenya letsoho ho tshehetsa mosebetsi ona ka ditsela tse ngata.

Mmetli wa mapolanka o kenya ditlhaku letshwaong le tlo ba ho e nngwe ya dikarolo tse tharo tseo baeti ba tlo di bona. Karolo ena ya “A People for Jehovah’s Name,” e hlosa histori ya Dipaki Tsa Jehova e ileng ya etsahala ho tloha ka 1870 ho fihlela mehleng ya rona.

Komiti ya Bongodi e kopane le bathusi le ditho tsa yona tsa Lefapha la Bongodi. Discreen tse kgolo di bontshitse ditshwantsho tse tlo hlaha dingolweng mme ho buisanwa le mafapha a mang nakong eo komiti ebang le dikopano. Tafole e ileng ya fuwa ntlokgolo e Brooklyn dilemo tse fetileng, e ile ya iswa Warwick.

Mothusi wa Komiti ya Bohokahanyi le basebeletsi ba loha leano la ho thusa batho ba Philippines ba ileng ba angwa ke lehodiotswana le leholo le bitswang Haima letsatsi pele ho moo. Video e etsang hore motho a kgone ho bua le motho e mong a le sebakeng se seng e thusitse mafapha a ntlokgolo hore a kgone ho buisana le diofisi tsa makala lefatsheng ka bophara ka maemo a tshohanyetso.

Letangwana le arolang Moo ho Lokiswang Thepa le tsela e kgolo e kenang. Letangwana lena le Warwick le sebedisa mekgwa ya tlhaho ya ho thibela le ho sefa matlakala a tlang le pula, mme mokgwa ona o entse hore ho bolokwe diphesente tse 50 tse ka beng di sebediseditswe hore ho be le foro e ka etsang tsamaiso eo. Ho feta moo, metsi ana a hlwekisitsweng a phallela melapong e teng moo, mme a molemo bakeng sa dimela le diphoofolo.

Barababo rona ba pakolla thoto e tlileng ka sekepe. Basebetsi ba ka bang 80 ba thusitse batho ba ntlokgolo ho tloha Brooklyn ho ya moahong o motjha wa Warwick.

Batho ba phehang ba tshwere hlama e kgolo e tswang ka hara motjhini mme ba e beha hodima tafole. Motjhini ona o etsa hore mosebetsi o be bobebe ka ha o kgona ho kopanya hlama e ngata ka nako e le nngwe. Ho boetse ho na le motjhini o mong o moholo oo motho a ka o laolang ho etsa hore hlama e bele kapele kapa e diehe ho bela. O fokotsa mosebetsi wa ho baka dilofo tse makgolo tse bakwang moo beke le beke.

Barababo rona ba ikarabellang ka ho hlokomela moaho ba ntsha matlakala ka hara moaho. Ho fapana le moaho o neng o le Brooklyn, boholo ba meaho e mona Warwick e kopane, mme sena se etsa hore ho fokotswe basebetsi le dikoloi tse ntshang matlakala.

Morabo rona o fafatsa bolaose ka metsi ho tlosa ho sosobane ebe kamora moo o bo beha hodima motjhini o otlollang diaparo. Lefapha le Hlatswang Diaparo le Warwick, le hlatswa diaparo le dilakane tse boima ba dikhilokrama tse fetang 5 000 beke le beke. E le hore batho ba sebetsang mona ba tsebe hore na diaparo tsa mang ke dife, ba di kenya dileibole ka hare. Dileibole tsena di skenuwa dibakeng tse sa tshwaneng tsa ho hlatswetsa e le ho netefatsa hore diaparo tsohle di tshwarwa ka hloko le ho kgutlisetswa lefapheng kapa ho motho ya nepahetseng.

Mekhenike o lokisa koloi e sebediswang ka sebakeng sa motlakase. Ho etsa sena ho etsa hore koloi ena e sebetse nako e telele le hore e be maemong a loketseng ho batho ba e sebedisang.

Setsebi sa computer se lokisa computer e le hore e sebetse hantle e leng se tla thusa batho ho bona karolo e reng “Faith in Action”.

Mmetli wa mapolanka o lokisa baesekele e entsweng ka selemo sa 1903, e le hore e ka bonwa karolong e reng “A People for Jehovah’s Name.” Baesekele ena eo mokgatlo o e fuweng, e kgutliseditswe maemong a yona ke basebetsi ba Warwick, e sebedisetswa ho bontsha matsapa ao Diithuti Tsa Bibele (tseo hona jwale di tsejwang ka hore ke Dipaki Tsa Jehova) di neng di a nka ho bolela ditaba tse molemo.

Batho ba sebetsang ka mapolanka ba kenya kgalase e tlo kwalla dintho tse amanang le tshwantshiso e reng “Photo-Drama of Creation,” e thehilweng Bibeleng, e leng tshwantshiso ya dislide, e ileng ya bontshwa ka 1914 e ileng ya shebellwa ke batho ba ka bang dimilione tse robong selemong seo.

Batho ba bolokang dintho tsa kgale le motho ya tsebang ho toroya, ba lokisa kgatiso ya Bibele ya 1544 ya Zurich Latin e lo dula karolong e reng “The Bible and the Divine Name.” Letshwao le lekgubedu le hlahileng ka Bibeleng le supile lebitso la Modimo e leng Jehova. Batho ba bolokang dintho tsa kgale ba nka mehato ya ho etsa hore Dibibele tse senyehang ka pele di dule di le maemo a matle. Ka mohlala, maqephe a teng a kgomareditswe, mme ka moo ho dulang Dibibele tseo ho mongobo, le kganya e teng kamoo e etsa hore maqephe ao a se ke a senyeha.

Batho ba tsamaisang baeti ba ba bontsha moaho o motle wa Warwick ba le hodimodimo moo ho nang le tora e botelele ba dimithara tse 23. Baeti ba ile ba dumellwa ho etsa kopo ya hore ba tle ba tlo bona moaho ho tloha ka la 3 April 2017. Ba batlang ho etsa kopo ya ho bona meaho ba ka etsa jwalo ka ho kena ho MABAPI LE RONA > DIOFISI LE BAETI.

Batho ba bolokang dintho tsa kgale ba beha Bibele ya pele e sa tlwaelehang ya King James Version ya 1611 moo baeti ba ka e bonang ha ba feta. Dikgalase tsena tse sireletsang dintho tse ka hare ho tsona di ile tsa etswa ke baithaopi ba sebetsang Warwick.

Motho ya kgonang ho etsa dintshwantsho o kenya katiba ka hara kgalase moo baeti ba ka e bonang ha ba feta. Katiba eo e ne e le ya Morabo rona Joseph F. Rutherford, eo e neng e le moetapele wa Dipaki Tsa Jehova lekgolong la dilemo tse fetileng. Karolo ena ya “A People for Jehovah’s Name,” e bontsha matsapa ao Dipaki tsa kgale di neng di a etsa e le hore di kgone ho bolela ditaba tse molemo tsa Mmuso.

Batho ba sebetsang studio ba tataisa motho ya balang sehlooho se reng “The Bible and the Divine Name”. Thepa ya studio e neng e le Brooklyn e ile ya iswa Warwick mme studio seo se nkile beke feela hore se kopanngwe se be se sebetse. Studio sena (se sebedisana mmoho le tse kgolo tse Watchtower Educational Center e Patterson) se sebedisetswa le ho rekota New World Translation, Watchtower, Awake! le dingolwa tse hlahang ho jw.org.

Mothusi wa mmetli wa mapolanka o penta mahlakore a senepe. Karolo ya “A People for Jehovah’s Name,” e bontsha dinepe tsa histori ya Diithuti tsa Bibele tsa lekgolong la bo 19 la dilemo.

Motho ya etsang dintshwantsho o penta Kalebe wa popae, ya sebedisetswang ho etsa divideo tsa Eba Motswalle wa Jehova. Popae ena e tlo behwa karolong eo Dipaki Tsa Jehova di e entseng e bontshang mananeo a etseditsweng bana.

Mmetli wa mapolanka o seha ditlhaku tsa mapolanka ho etsa sehlooho bakeng sa karolo ya “A People for Jehovah’s Name.” Batho ba fetang 250, ba kopanyelletsang batho ba sebetsang ka mapolanka, ditsebi tsa mananeo a dicomputer, baqapi ba dintho, ba sebetsang ka motlakase, ba tsebang ho kenya dithaele, ba nkang divideo le bangodi, ba sebeditse ka thata ho etsa dikarolo tsena tse tharo tsa museum ho tloha qalong ho fihlela qetellong.