Sebe ke ho etsa, ho nahana kapa ho ikutlwa ka tsela e kgahlanong le thato ya Modimo. Se boetse se akarelletsa ho tlola molao wa Modimo ka ho etsa ntho e fosahetseng kapa ho etsa ntho e sa lokang mahlong a Jehova. (1 Johanne 3:4; 5:​17) Bibele e boetse e hlalosa sebe e le ho hloleha ho etsa ntho e nepahetseng.​—Jakobo 4:​17.

 Dipuong tse sebedisitsweng ha ho ne ho ngolwa Bibele, lentswe sebe le bolela “ho fosa moo o korisitseng.” Ka mohlala, sehlopha se seng sa masole a mehleng ya Baiseraele se ne se ipabola haholo ka ho tjeketjela majwe hoo ba neng ‘ba sa fose’ letho. Polelo ena e reng ‘ba sa fose, ha e fetolelwa lentswe ka lentswe e ka bolela “ho se etse sebe.” (Baahlodi 20:16) Ka hoo, ho etsa sebe ke ho hloleha ho etsa se nepahetseng ho latela ditekanyetso tsa Modimo.

 Ka ha Modimo ke Mmopi wa rona, o na le tokelo ya ho re behela ditekanyetso. (Tšenolo 4:​11) Re ikarabella ho yena ka diketso tsa rona.​—Baroma 14:12.

Na ho a kgoneha hore re se ke ra etsa sebe ho hang?

 Tjhe. Bibele e re “bohle ba entse sebe mme ba haellwa ke kganya ya Modimo.” (Baroma 3:​23; 1 Marena 8:​46; Moeklesia 7:​20; 1 Johanne 1:8) Ke hobaneng ha ho le jwalo?

 Batho ba pele e leng Adama le Eva qalong e ne e se baetsadibe hobane ba ne ba bopilwe ba phethahetse ka setshwantsho sa Modimo. (Genese 1:​27) Le ha ho le jwalo, e ile ya eba baetsadibe ka mora hore ba se ke ba mamela Modimo. (Genese 3:​5, 6, 17-19) Ha ba eba le bana ba ile ba fetisetsa sebe le ho se phethahale baneng ba bona. (Baroma 5:​12) Ke ka hoo Morena Davida wa Iseraele a ileng a re: ‘Ke tswaletswe phosong.’​—Pesaleme ya 51:5.

Na ho na le dibe tse kgolo ho tse ding?

 E, di teng. Ka mohlala Bibele e re banna ba Sodoma e ne “e le baetsadibe ba baholo” mme sebe sa bona se ne se le “boima haholo.” (Genese 13:13; 18:20) Bona dintho tse tharo tse re thusang ho bona boima kapa botebo ba sebe.

1.   Botebo. Bibele e re re qobe ho etsa dibe tse tebileng tse kang bohlola, borapedi ba ditshwantsho, boshodu, botahwa, ho qhekella, ho bolaya le ho sebedisana le meya. (1 Bakorinthe 6:​9-​11; Tšenolo 21:8) Bibele e bontsha phapang dipakeng tsa dibe tsena le dibe tse sa etsweng ka boomo tse kang ho utlwisa batho ba bang bohloko ka mantswe kapa ka diketso. (Liproverbia 12:​18; Baefese 4:​31, 32) Le ha ho le jwalo, Bibele e re kgothalletsa hore re se ke ra nyenyefatsa diphoso tsa rona hobane di ka qetella di entse hore re tlole melao ya Modimo.​—Matheu 5:​27, 28.

2.   Sepheo. Ka dinako tse ding batho ba etsa sebe hobane ba sa tsebe ntho e nepahetseng. (Liketso 17:30; 1 Timothea 1:​13) Le hoja ho sa bolele hore dibe tsena di lokile, Bibele e bontsha phapang dipakeng tsa tsona le tse etswang ka boomo ho tlola molao wa Modimo. (Numere 15:30, 31) Dibe tsa ka boomo di tswa pelong e mpe.​—Jeremia 16:12.

3.   Ho etsa sebe hangata. Bibele e bontsha phapang dipakeng tsa sebe se le seng le sebe se etswang hangata nako e telele. (1 Johanne 3:​4-8) “Haeba re tlwaela ho etsa sebe ka boomo,” le ka mora ho ithuta se nepahetseng, Modimo o tla re ahlola.​—Baheberu 10:​26, 27.

 Batho ba entseng dibe tse tebileng ba ka ikutlwa ba imetswe ka lebaka la botebo ba diphoso tsa bona. Mohlala, Morena Davida o ile a re: “Diphoso tsa ka di fetile hodima hlooho ya ka, jwalo ka mojaro o boima di nkimetse haholo.” (Pesaleme ya 38:4) Le ha ho le jwalo, Bibele e re fa tshepo ena: “Motho ya kgopo a tlohele tsela ya hae, le motho ya kotsi a tlohele menahano ya hae; a ke a kgutlele ho Jehova, ya tlang ho mo hauhela, le ho Modimo wa rona, etswe o tla tshwarela ka tsela e kgolo.”​—Esaia 55:7.