Lengolo la Bobedi la Petrose 1:1-21
1 Nna Simone Petrose, mohlanka le moapostola wa Jesu Kreste, ke ngolla lona ba amohetseng dithuto tsa nnete tsa bohlokwa tseo le rona re di amohetseng.* Kaofela ha rona re di amohetse hobane Modimo le Jesu Kreste Mopholosi wa rona ba lokile.
2 E se eka Modimo a ka le ekeletsa mosa* le kgotso hobane le tseba Modimo+ le Morena wa rona Jesu hantle.
3 Matla a Modimo a re file dintho tsohle tseo re di hlokang e le hore re phelele ho mo sebeletsa ka botshepehi. Re ile ra fumana dintho tsena hobane re tseba Modimo hantle.+ O ile a re bitsa hobane ke Modimo e moholo, ya mosa.
4 O ile a re tshepisa dintho tse kgolo le tsa bohlokwa hobane o moholo ebile o mosa.+ O ile a etsa jwalo e le hore le ka ba le mmele ya moya e tshwanang le wa hae+ hobane ha re sa etsa dintho tse mpe tse etswang lefatsheng tse susumetswang ke ditakatso tse fosahetseng.
5 Ka lebaka leo, le leke ka matla+ ho ba le tumelo,+ ho etsa dintho tse lokileng, ho ba le tsebo,+
6 ho ba le boitshwaro,+ ho mamella, ho sebeletsa Modimo ka botshepehi,+
7 ho rata bana ba bo lona le ho rata batho bohle.+
8 Haeba le etsa dintho tsena tsohle ebile le ena le makgabane ana ka bongata, a tla le thusa hore le se ke la tlohela ho sebeletsa Modimo+ le ho etsa dintho tse dumellanang le tsebo e nepahetseng eo le nang le yona ka Morena wa rona Jesu Kreste.
9 Motho ya se nang makgabane ana ke sefofu hobane ha a batle ho bona kganya*+ ebile o lebetse hore nakong e fetileng o ile a hlatsuwa dibe.+
10 Bana beso ka ha Modimo o le kgethile le etse sohle seo le ka se kgonang hore le dule le tshwaneleha.+ Haeba le dula le ena le makgabane ana le tla dula le tshwaneleha.+
11 Hape le tla hlohonolofatswa haholo ka hore le kene Mmusong o sa feleng+ wa Morena le Mopholosi wa rona Jesu Kreste.+
12 Ka lebaka leo, ke ikemiseditse ho dula ke le hopotsa dintho tsena le hoja le di tseba ebile le kgodisehile ka nnete eo le ithutileng yona.
13 Ke nka ho loketse hore ke nne ke le hopotse+ dintho tsena ha ke sa ntse ke le mmeleng ona*+
14 hobane ke a tseba hore haufinyane ke tla siya mmele ona jwalo ka ha Morena wa rona Jesu Kreste a mpoleletse.+
15 Ke tla dula ke etsa sohle seo nka se kgonang e le hore le nne le hopole dintho tsena le ka mora hore ke shwe.*
16 Ha re ne re le bolella hore Morena wa rona Jesu Kreste o teng re bile re le bolella ka matla a hae, ha re a ka ra ipapisa le dipale tsa bohata tse iqapetsweng ke batho ka bomenemene. Empa re buile hobane re bone hore o moholo.+
17 Modimo Ntate ya phahameng haholo o ile a mo phahamisa ha a ne a bua mantswe ana: “Enwa ke Mora wa ka eo ke mo ratang, ya nkgahlisang.”+
18 Re ile ra utlwa mantswe ana a tswa lehodimong ha re ne re ena le yena thabeng e halalelang.
19 Ke ka hoo re kgodisehileng le ho feta hore boprofeta bo tla phethahala. Le ele hloko boprofeta bona. Mantswe a boprofeta bona a be jwalo ka lebone+ le kganyang sebakeng se lefifi e leng dipelong tsa lona. Le a ele hloko ho fihlela letsatsi le tjhaba le naledi ya meso+ e hlaha.
20 Le tseba taba ena ya bohlokwa, hore ha ho boprofeta bo hlahang ka Mangolong bo thehilweng tlhalosong ya batho.
21 Ha ho mohla boprofeta bo kileng ba tla ka thato ya motho+ empa batho ba ile ba bua ditaba tse tswang ho Modimo hobane ba susumetswa ke moya o halalelang.+
Dintlha tse qetellong ya sehloho
^ Kapa: “ba fumaneng tlotla ya bohlokwa jwalo ka rona.”
^ Kapa mohlomong: “o bonela haufi.”
^ Kapa: “tenteng ena.”
^ Ka Segerike: “tsamaye.”
