Lengolo la Bobedi la Petrose 2:1-22
2 Ho ile ha hlaha baprofeta ba bohata hara batho ba Modimo. Ka tsela e tshwanang, ho tla boela ho hlahe batho ba rutang mashano hara lona.+ Ba tla etsa hore ka lekunutu ho be le maqulwana a tla senya tumelo ya lona ebile ba tla latola le monga bona ya ba rekileng.+ Ba tla fediswa kapele ka lebaka la ho etsa dintho tseo.
2 Hape ba tla etsa boitshwaro bo bobe ba sa swabe*+ mme batho ba bangata ba tla ba etsisa. Tsela ya Modimo e tla buuwa hampe ka lebaka la bona.+
3 Ka ha ba meharo, ba tla le qhekella ka mashano. Empa kahlolo ya bona eo e leng kgale Modimo a itse o tla ba fa yona,+ e ke ke ya dieha ho fihla ebile jwang kapa jwang ba tla fediswa.+
4 Modimo o ile a otla mangeloi a entseng sebe,+ a a lahlela Tartarase,*+ a a fasa ka diketane yaba o a beha lefifing le letsholetsho* moo a emetseng ho ahlolwa.+
5 Hape o ile a otla batho ba lefatshe la kgale+ empa a sireletsa Noe ya neng a phatlalatsa ditaba tse lokileng+ ha mmoho le ba bang ba supileng+ ha a ne a tlisa morwallo lefatsheng la batho ba sa rateng Modimo.+
6 O ile a ba a otla metse ya Sodoma le Gomora ka ho e tjhesa ho fihlela ho setse molora feela,+ e le ho bontsha batho ba sa mo mameleng hore na ho tla etsahalang nakong e tlang.+
7 O ile a pholosa Lota ya lokileng,+ ya neng a utlwisitswe bohloko ke batho ba sa mameleng ba neng ba etsa boitshwaro bo bobe ba sa swabe.*
8 Ha monna eo ya lokileng a ne a phela le batho bao ba kgopo, o ne a dula a utlwile bohloko letsatsi le leng le le leng hobane a bona tsela eo ba phelang ka yona le ho utlwa dintho tseo ba neng ba di bua.
9 Jehova* o tseba ho pholosa batho ba mo sebeletsang ka botshepehi mathateng+ hape o tseba ho boloka ba sa lokang e le hore a tle a ba fedise ka letsatsi la kahlolo,+
10 haholoholo ba batlang ho silafatsa batho ba bang ka ho etsa thobalano le bona+ le ba sa batleng ho laelwa.*+
Ka ha ba a itshepa ebile ba rata hore dintho di etswe ka tsela ya bona, ha ba tshabe ho bua hampe ka bao Modimo a ba phahamisitseng.
11 Le hoja mangeloi ona a le matla haholo ho feta batho bana ba rutang mashano, ha a ba qose ebile ha a bue hampe ka bona hobane a hlompha Jehova.*+
12 Empa batho bana ba bua hampe ka dintho tseo ba sa di tsebeng. Ka lebaka la mekgwa ya bona e mebe, ba tla bolawa jwalo ka diphoofolo tse sa nahaneng, tse tswaletsweng ho tshwaswa le ho bolawa feela.+
13 Ba tla fuwa kotlo ka lebaka la mesebetsi ya bona e mebe.
Ba natefelwa ke ho phelela monate+ esita le motshehare. Ba tshwana le matheba a diaparong le maqeba a sefahlehong. Ha ba ntse ba keteka le lona, ba thabela ho kgelosa ba bang ka ho ba bolella mashano.+
14 Ba na le takatso e matla ya ho etsa bofebe,*+ ha ba kgone ho tlohela ho etsa sebe ebile ba tjheha ba sa tiyang tumelong. Dipelo tsa bona di tletse meharo. Modimo o tla ba ahlola.
15 Ba kgelositswe hobane ba lahlile tsela e nepahetseng. Ba kgethile ho etsisa Balame+ mora wa Beore ya ileng a etsa sebe hobane a kgalletse ho fumana moputso+
16 empa a kgalemellwa ho tlola molao.+ Tonki e sa tsebeng ho bua e ile ya bua ka lentswe le kang la motho e le hore e thibe moprofeta eo hore a se ke a etsa ntho e se nang kelello.+
17 Batho bana ba tshwana le didiba tse se nang metsi le mehodi e kgannwang ke sefefo se matla mme lefifi le letsholetsho le ba emetse.+
18 Ba bua dintho tseo ekang di bohlokwa empa di se na thuso. Ba etsa boitshwaro bo bobe ba sa swabe*+ ebile ba etsa hore batho ba be le ditakatso tse fosahetseng e le hore ba ba susumeletse ho etsa dintho tse fosahetseng tseo ba tlohetseng ho di etsa.+
19 Batho bana ba rutang mashano ba ntse ba ba tshepisa tokoloho empa bona e le makgoba a sebe+ ka ha motho ke lekgoba la ntho e mo laolang.*+
20 Tsebo e nepahetseng ya Morena le Mopholosi wa rona Jesu Kreste e ile ya ba pholosa ditshileng tsa lefatshe lena.+ Jwale haeba ka mora hore tsebo eo e ba pholose ebe ba kgutlela ho tsona mme di a ba laola, maemo a bona a ho qetela a mabe ho feta a pele.+
21 Ho ka be ho bile molemo hore ba se ke ba tseba tsela e nepahetseng ho ena le hore ba e tsebe ebe ka mora moo ba furalla taelo e halalelang eo ba e filweng.+
22 Ba etsahaletswe ke ntho e buuwang ke maele ana a nnete a reng: “Ntja e kgutletse mahlatseng a yona le kolobe e ileng ya hlatsuwa e boetse e ipitika seretseng.”+
Dintlha tse qetellong ya sehloho
^ Kapa: “boitshwaro bo hlabisang dihlong.” Ka Segerike ke bongata ba lentswe a·sel′gei·a. Sheba Tlhaloso.
^ Kapa mohlomong: “dikoting tse lefifi.”
^ Kapa: “boitshwaro bo hlabisang dihlong.” Ka Segerike ke bongata ba lentswe a·sel′gei·a. Sheba Tlhaloso.
^ Sheba Ntlha ya A5.
^ Kapa: “ba kgellang borena fatshe.”
^ Sheba Ntlha ya A5.
^ Ka Segerike: “Mahlo a bona a tletse bofebe.”
^ Kapa: “boitshwaro bo hlabisang dihlong.” Ka Segerike ke bongata ba lentswe a·sel′gei·a. Sheba Tlhaloso.
^ Ka Segerike: “motho ya mo laolang.”
