Ho Bagalata 1:1-24
1 Nna moapostola Pauluse ha ke a kgethwa ke motho kapa ke batho empa ke kgethilwe ke Jesu Kreste+ le Modimo Ntate+ ya ileng a mo tsosa bafung.
2 Nna le bana beso bohle bao ke nang le bona mona, re dumedisa diphutheho tsa Galatia:
3 E se eka Modimo Ntate wa rona le Morena Jesu Kreste ba ka ba mosa* ho lona le ho le fa kgotso.
4 Jesu Kreste o ile a fana ka bophelo ba hae bakeng sa dibe tsa rona+ e le hore a tle a re pholose lefatsheng lena le kgopo*+ ho ya ka thato ya Modimo le Ntate wa rona,+
5 ya lokelwang ke kganya ka ho sa feleng. Amen.
6 Ke makatswa ke hore le fetohetse Modimo kapele, ya le bitsitseng ka mosa wa Kreste. Le se le amohela molaetsa o mong jwalo ka ha eka ke ditaba tse monate.+
7 Ha se hore ho na le ditaba tse ding tse monate empa ho na le batho ba batlang ho le kgelosa+ ka hore ba senye ditaba tse monate tse buang ka Kreste.
8 Haeba le ha e le mang a ka le bolella ditaba tse fapaneng le ditaba tse monate tseo re ileng ra le bolella tsona, ebang ke rona kapa lengeloi le tswang lehodimong, motho eo a ahlolwe.
9 Ke pheta mantswe ao re a buileng ke re: Mang kapa mang ya tla le bolella ditaba tse fapaneng le ditaba tse monate tseo le ileng la di amohela, a ahlolwe.
10 Na ke leka ho thabisa Modimo kapa batho? Haeba ke ne ke thabisa batho, nka be ke se lekgoba la Kreste.
11 Bana beso, ke batla le tsebe hore ditaba tse monate tseo ke le boleletseng tsona ha di a iqapelwa ke batho.+
12 Le nna ha ke a di bolellwa ke batho ebile ha ke a di rutwa empa ke di senoletswe ke Jesu Kreste.
13 Le utlwile hore na ke ne ke itshwere jwang ha ke ntse ke le bodumeding ba Bojuda,+ ke ne ke hlorisa phutheho ya Modimo haholo eseng hanyane ebile ke batla ho e fedisa.+
14 Ke ne ke tseba dintho tse ngata ka bodumedi ba Bojuda ho feta dithaka tsa ka tse ngata setjhabeng sa heso hobane ke ne ke tjhesehela dithuto tsa baholoholo ba ka.+
15 Empa ha Modimo ya ileng a etsa hore ke tswalwe* a mpitsa ka mosa wa hae,+ o ile a thabela
16 ho ntshenolela Mora wa hae e le hore nka phatlalatsa ditaba tse monate ka Mora wa hae ditjhabeng.+ Ha ho na motho eo ke ileng ka mathela ho yena ho ya batla keletso.
17 Ha ke a ka ka ya le ho batho bao e bileng baapostola pele ho nna ba neng ba le Jerusalema empa ke ile ka ya Arabia yaba ke kgutlela Damaseka.+
18 Ka mora dilemo tse tharo, ke ile ka ya Jerusalema+ ho etela Kefase*+ mme ke ile ka dula le yena ka matsatsi a 15.
19 Empa ha ke a ka ka bona baapostola ba bang, ke bone feela Jakobo+ e leng ngwanabo Morena.
20 Ke hlapanya ka pela Modimo hore dintho tseo ke le ngollang tsona ha se leshano.
21 Ka mora moo, ke ile ka ya Siria le Silisia.+
22 Empa batho ba diphutheho tsa Kreste tsa Judea ba ne ba sa ntsebe.
23 Ba ne ba tlwaetse ho utlwa ho thwe: “Monna ya neng a re hlorisa+ o se a phatlalatsa ditaba tse monate ka bodumedi boo pele a neng a batla ho bo fedisa.”+
24 Ka hoo, ba ile ba qala ho rorisa Modimo ka lebaka la ka.
Dintlha tse qetellong ya sehloho
^ Ka Segerike: “ya nkarotseng popelong ya mme wa ka.”
^ Lebitso la hae le leng ke Petrose.
