Jeremia 29:1-32
29 Ana ke mantswe a hlahang lengolong leo moprofeta Jeremia a ileng a le romela a le Jerusalema. O ile a le romela banna ba baholo ba hara batho ba hapuweng, baprista, baprofeta le batho bohle bao Nebukadnezare a neng a ba hapile a ba tlositse Jerusalema ho ba isa Babilona.
2 Ka nako eo, Morena Jekonia,+ mme wa morena,*+ balaodi ba lekgotla, dikgosana tsa Juda le Jerusalema, ditsebi tsa mesebetsi ya matsoho le batho ba sebetsang ka tshepe* ba ne ba se ba tswile Jerusalema.+
3 A le neheletsa Elasa mora wa Shafane+ le Gemaria mora wa Hilkia bao Morena Tsedekia+ wa Juda a neng a ba romme Babilona ho Morena Nebukadnezare wa Babilona. Lengolo leo le ne le re:
4 “Jehova wa mabotho, Modimo wa Iseraele, o re ho batho bohle ba hapuweng bao a entseng hore ba hapuwe Jerusalema ba iswe Babilona:
5 ‘Hahang matlo le dule ho ona. Lemang dirapa le je ditholwana tsa tsona.
6 Nyalang basadi mme le be le bara le baradi. Le batlele bara ba lona basadi le be le nyadise baradi ba lona e le hore le bona ba tle ba be le bara le baradi. Ngatafalang moo, le se ke la fokotseha.
7 Hape le leke ho phela ka kgotso motseng oo ke le isitseng ho wona ha le haptjwa mme le o rapelle ho Jehova, etswe ha o na le kgotso le tla ba le kgotso.+
8 Jehova wa mabotho, Modimo wa Iseraele, o re: “Le se ke la dumela ho thetswa ke dinohe le baprofeta ba hara lona+ hape le se ke la mamela ditoro tseo ba di lorang.
9 Jehova o re: ‘Ba le profetela mashano ka lebitso la ka. Ha ke a ba roma.’”+
10 Jehova o re: ‘Ha ho se ho fetile dilemo tse 70 le le Babilona, ke tla le hopola+ mme ke tla phetha tshepiso ya ka, ke le kgutlisetse hae.’+
11 Jehova o re: ‘Ke tseba hantle hore na ke tla le etsetsa’ng. Ke tla le tlisetsa kgotso eseng tlokotsi,+ e le hore le be le tshepo le bokamoso bo tjhabileng.+
12 Le tla mpitsa le nthapele mme ke tla le mamela.’+
13 ‘Le tla mpatla le mphumane+ hobane le tla mpatla ka dipelo tsohle tsa lona.+
14 Ke tla etsa hore le mphumane,’+ ke Jehova ya tjhong. ‘Ke tla bokella batho ba lona ba hapuweng mme ke le bokelle ho tswa ditjhabeng tsohle le dibakeng tsohle tseo ke le hasantseng ho tsona,’+ ke Jehova ya tjhong. ‘Ke tla le lata sebakeng seo ke le isitseng ho sona ha le ne le haptjwa.’+
15 Empa le itse: ‘Jehova o re hlahiseditse baprofeta Babilona.’
16 Jehova o re ka morena ya dutseng teroneng ya Davida+ le ka batho bohle ba dulang Jerusalema e leng bana ba bo lona ba sa haptjwang mmoho le lona:
17 ‘Jehova wa mabotho o re: “Ke ba otla ka sabole, tlala le lefu la sewa,+ ke tla etsa hore ba tshwane le difeie* tse bodileng* tse mpe hoo di ke keng tsa jewa.”’+
18 ‘Ke tla ba lelekisa ka sabole,+ tlala le lefu la sewa, ke ba etse ntho e tshosang ka pela mebuso yohle ya lefatshe,+ ntho e rohakilweng, e makallwang, e letsetswang molodi+ le e nyefolwang hara ditjhaba tsohle tseo ke tla ba hasanyetsa ho tsona+
19 hobane ha ba a mamela molaetsa wa ka oo ke ba rometseng wona ka bahlanka ba ka ba baprofeta, bao ke ba rommeng ka makgetlokgetlo,’*+ ke Jehova ya tjhong.
‘Empa le lona ha le a mamela,’+ ke Jehova ya tjhong.
20 Mamelang lentswe la Jehova, lona bohle ba hapuweng bao ke ba tlositseng Jerusalema ka ba isa Babilona.
21 Jehova wa mabotho, Modimo wa Iseraele o re ka Akabe mora wa Kolaia le Tsedekia mora wa Maseia, ba le profetelang mashano ka lebitso la ka:+ ‘Ke tla nehelana ka bona letsohong la Morena Nebukadnezare* wa Babilona mme o tla ba bolaya ka pela mahlo a lona.
22 Ntho e tla ba etsahalla e tla fetoha tlhapa e buuwang ke Bajuda bohle ba hapuweng ba leng Babilona e reng: “E se eka Jehova a ka etsa hore o tshwane le Tsedekia le Akabe, bao morena wa Babilona a ba besitseng mollong!”
23 Ba entse dintho tse swabisang Iseraele,+ ba feba le basadi ba baahisani ba bona le ho bua mashano ka lebitso la ka, mashano ao ke sa kang ka ba laela hore ba a bue.+
“Ke nna ya tsebang ebile ke paki,”+ ke Jehova ya tjhong.’”
24 “Hape o tle o re ho Shemaia+ wa Nehelame:
25 ‘Jehova wa mabotho, Modimo wa Iseraele, o re: “Ka hobane o rometse mangolo ka lebitso la hao ho batho bohle ba Jerusalema, ho Sofonia+ mora wa moprista Maseia le ho baprista bohle, a reng:
26 ‘Sofonia, Jehova o o entse moprista ho ena le ho etsa Jehojada moprista e le hore o hlokomele ntlo ya Jehova, o tshware monna le ha e le ofe ya hlanyang ya iketsang moprofeta le hore o mo kenye ditlamong tsa maoto le matsoho.*+
27 Ke hobaneng ha o sa kgalemela Jeremia wa Anathothe,+ ya iketsang moprofeta wa lona?+
28 O ile a ba a re romella molaetsa ha re ntse re le Babilona a re: “Ho tla feta nako e telele. Hahang matlo le dule ho wona. Lemang dirapa le je ditholwana tsa tsona,+ . . . ”’”’”
29 Ha moprista Sofonia+ a bala lengolo lena moo moprofeta Jeremia a ntseng a utlwa,
30 Jehova a re ho Jeremia:
31 “Romela molaetsa ho batho bohle ba hapuweng o reng: ‘Jehova o re ka Shemaia wa Nehelame: “Kahobane Shemaia o le profetetse le hoja ke sa mo roma mme o lekile ho etsa hore le dumele mashano,+
32 Jehova o re: ‘Ke tla otla Shemaia wa Nehelame le bana ba hae. Ha ho le ya mong wa bana ba hae ya tla pholoha hara setjhaba sena mme a ke ke a bona molemo oo ke tla o etsetsa setjhaba sa ka ka ha o kgothaleditse batho ho fetohela Jehova,’ ke Jehova ya tjhong.”’”
Dintlha tse qetellong ya sehloho
^ Kapa mohlomong: “dihahi tsa marako a tshireletso.”
^ Kapa: “mofumahadi.”
^ Kapa mohlomong: “tse butswitseng haholo.”
^ Kapa: “difeiga.”
^ Ka Seheberu: “ke neng ke tsoha hoseng mme ke ba roma.”
^ Ka Seheberu: “Nebukadrezare,” tsela e nngwe eo lebitso lena le ngolwang ka yona.
^ Ka Seheberu ho na le mantswe a mabedi. Ho bonahala eka le leng ke “ditlamo tsa maoto”, le leng lona ke “ditlamo tsa matsoho le hlooho.”
