1. Keng e etsang hore batho ba bang ba tshwarwe ka tsela e kgethehileng, hona re tlo bua kang sehloohong see?

HO HLOMPHA motho e mong ho bolela ho mo tshwara ka tsela e kgethehileng le ho mo tlotla. Motho o tshwarwa ka tsela ena haeba a entse ntho e kgethehileng kapa a le boemong bo phahameng. Kahoo, ke bo mang bao re lokelang ho ba hlompha, hona hobaneng?

2, 3. (a) Ke hobaneng ha re lokela ho hlompha Jehova ka ho kgetheha? (Sheba setshwantsho se qalong.) (b) Tšenolo 5:13, e re Konyana ke mang, hona ke hobaneng ha re lokela ho mo hlompha?

² Tšenolo 5:13 e re “Ya dutseng teroneng le . . . Konyana” ba lokela ho hlomphuwa. Kgaolong ya 4 lengolong lona lena, re hlokomela le leng la mabaka a etsang hore Jehova a hlomphuwe. Ka mantswe a phahameng mangeloi a rorisa Jehova, “Ya phelang ka ho sa feleng le kamehla.” A re: “Jehova, Modimo wa rona, o a tshwaneleha ho amohela kganya le tlhompho le matla, hobane o bopile dintho tsohle, mme ka lebaka la thato ya hao di ile tsa e ba teng mme tsa boptjwa.”—Tšen. 4:9-11.

³ Konyana ke Jesu Kreste, e leng “Konyana ya Modimo e tlosang  sebe sa lefatshe.” (Joh. 1:29) Bibele e re bolella hore o phahame ho feta batho bohle bao e leng marena le bao e kileng ya e ba marena. E re ke “Morena wa ba busang e le marena le Kgosi ya ba busang e le dikgosi, eo e leng yena feela ya nang le ho se shwe, ya dulang leseding le sa atameleheng, eo ho seng le ya mong wa batho ya mo boneng kapa ya ka mo bonang.” (1 Tim. 6:14-16) Ka sebele ha ho na morena e mong ya ileng a ithaopela ho shwela dibe tsa rona. Mohlomong le wena o ikutlwa jwalo ka dimiriade tsa mangeloi tse ileng tsa re: “Konyana e ileng ya hlajwa e tshwaneleha ho amohela bonatla le maruo le bohlale le matla le tlhompho le kganya le poko.”—Tšen. 5:12.

4. Ke hobaneng ha re tlameha ho hlompha Jehova le Kreste?

⁴ Re tlameha ho hlompha Jehova le Kreste, hobane bophelo bo sa feleng bo itshetlehile ka ho etsa jwalo. Mantswe a Jesu a ngotsweng ho Johanne 5:22, 23 a re thusa hore re utlwisise seo: “Etswe ho hang ha ho eo Ntate a mo ahlolang, empa o file Mora ho ahlola hohle, e le hore bohle ba ka hlompha Mora feela jwalo ka ha ba hlompha Ntate. Ya sa hlompheng Mora ha a hlomphe Ntate ya mo romileng.”—Bala Pesaleme 2:11, 12.

5. Ke hobaneng ha re lokela ho hlompha batho ba bang?

⁵ Batho ba bopilwe “ka setshwantsho sa Modimo.” (Gen. 1:27) Kahoo, ba bangata ba bontsha makgabane a tshwanang le a Modimo ka ditsela tse sa tshwaneng. Ba kgona ho bontshana lerato, mosa le ho utlwelana bohloko. Batho ba bopilwe ba e na le letswalo, le ho ja ka dinako tse ding le fosa, le ba thusa ho lemoha ntho e nepahetseng le e fosahetseng, e lokileng le e sa lokang, ho tshepahala le ho se tshapahale. (Bar. 2:14, 15) Batho ba bangata ba rata dintho tse hlwekileng le tse ntle mme ba batla ho phedisana le ba bang ka kgotso. Ho sa tsotellehe hore na ba a hlokomela kapa tjhe, ho isa boholeng bo itseng ba tlotlisa Jehova mme ka lebaka leo ba lokela ho hlomphuwa.—Pes. 8:5.

6, 7. Dipaki Tsa Jehova di fapana jwang le batho ba bang tabeng ya ho hlompha batho?

⁶ Re lokela ho hlompha e mong le e mong ka tsela e mo loketseng. Batho ba bangata ba sa phethahalang ba kgeloswa ke lefatshe la Satane. Ke kahoo ba tlwaetseng ho rapela banna le basadi ba itseng ho e na le hore ba bafe tlhompho e ba loketseng feela. Ba hlompha baetapele ba bodumedi le ba dipolotiki, dikgalala tsa dipapadi le tsa boithabiso le batho ba bang ba hlaheletseng ka mahetla mme ba ba nkela hodimo ka tsela e feteletseng. Ke kahoo bana le batho ba baholo ba latelang mohlala wa bona, ka ho etsisa mekgwa, moaparo le boitshwaro ba bona.

⁷ Bakreste ba nnete ha ba hlomphe batho ka tsela e jwalo e fosahetseng. Re nka Kreste e le yena motho a kileng a phela eo re ka latelang mohlala wa hae. (1 Pet. 2:21) Jehova a ke ke a thaba haeba re fa batho tlhompho e feteletseng. Re lokela ho hopola nnete ena ya Bibele e reng: “Etswe bohle ba entse sebe mme ba haellwa ke kganya ya Modimo.” (Bar. 3:23) Kahoo ha ho na motho ya lokelang ho hlomphuwa jwalo ka ha e ka ke Modimo.

8, 9. (a) Dipaki Tsa Jehova di nka balaodi ba puso jwang? (b) Re lokela ho hlompha balaodi ho fihlela boholeng bofe?

⁸ Batho ba bang ba sebeletsa e le balaodi pusong. Hangata re lebeletse hore batho ba boholong pusong ba mamele melao hape ba thuse le baahi ka dintho  tseo ba di hlokang. Mme re rua molemo ha ba etsa jwalo. Moapostola Pauluse o ile a eletsa Bakreste hore ba nke balaodi bao ba puso e le “balaodi ba phahameng” bao Bakreste ba lokelang ho ba mamela. O ile a re ho bona: “Fang bohle tse ba lokelang, ya batlang lekgetho, le mo fe lekgetho; . . . ya batlang tlhompho, le mo fe tlhompho e jwalo.”—Bar. 13:1, 7.

⁹ Dipaki Tsa Jehova di thabela ho fa basebeletsi ba setjhaba tlhompho e ba loketseng ho ya ka molao wa sebaka seo ba dulang ho sona. Re etsa dintho tseo ba reng re di etse. Leha ho le jwalo, Bibele ke yona e re thusang ho tseba hore na re ka ba mamela ho fihlela boholeng bofe. Re ke ke ra ba mamela haeba ba re re etse dintho tse etsang hore re tlole melao ya Modimo kapa ha ba batla hore re nke karolo dipolotiking.—Bala 1 Petrose 2:13-17.

10. Bahlanka ba Jehova ba nakong e fetileng ba ile ba re behela mohlala jwang tabeng ya ho sebedisana le puso le balaodi ba yona?

¹⁰ Bahlanka ba Jehova ba nakong e fetileng ba ile ba re behela mohlala tabeng ya ho hlompha puso le balaodi ba yona. Ha Mmuso wa Roma o ntsha taelo ya hore ho balwe batho, Josefa le Maria ba ile ba mamela taelo eo. Ba ile ba ya Bethlehema le hoja Maria a ne a se a le haufi le ho ba le ngwana wa hae wa pele. (Luka 2:1-5) Ha morao, ha ho ne ho thwe Pauluse o entse tlolo ya molao, o ile a ipuella ka tlhompho ho Morena Heroda Agripa le ho Festase e leng mmusi wa profinse ya Roma ya Judea.—Lik. 25:1-12; 26:1-3.

11, 12. (a) Ke hobaneng ha re sa lokela ho hlompha baetapele ba madumedi le ba puso ka tsela e kgethehileng? (b) Ho ile ha ba le ditlamorao dife ha Paki ya Austria e ne bua le radipolotiki e mong ka tlhompho?

¹¹ Baetapele ba bodumedi ba thabela ho hlomphuwa ka tsela e feteletseng empa Dipaki Tsa Jehova di qoba ho ba hlompha ka tsela e jwalo. Madumedi a bohata ha a etse dintho tse kgahlisang Modimo ebile a sotha dithuto tsa Bibele. Ha re a lokela ho hlompha baetapele ba madumedi ka tsela leha e le efe e kgethehileng ho e na le hoo re lokela ho ba hlompha jwalo ka motho e mong le e mong. Jesu o ne a sa tshehetse banna ba neng ba batla tlhompho e kgethehileng. O ile a re ke baikaketsi le batataisi ba foufetseng. (Mat. 23:23, 24) Ka lehlakoreng le leng, ho ka ba le ditlamorao tse ntle haeba re hlompha balaodi ba puso.

¹² Leopold Engleitner e ne e le Paki ya Austria e neng e dula e phathahane ka ho sebeletsa Modimo mme Manazi a ile a mo tshwara a mo isa kampong ya mahloriso ya Buchenwald ka terene. Dr. Heinrich Gleissner le yena e ne e le motshwaruwa ka tereneng eo. E ne e le radipolotiki wa Austria. Empa jwale Manazi a ne a se a sa mo rate. Ha ba ntse ba le leetong, Morabo rona Engleitner ka tlhompho o ile a hlalosetsa Gleissner seo a se dumelang mme Gleissner o ile a mamela ka hloko. Kaha Gleissner e ne e le akgente, ka mora ntwa ya bobedi ya lefatshe o ile a thusa Dipaki tsa Austria ka makgetlo. Mohlomong o hopola mehlala e meng e bontshang hore ho ba le ditlamorao tse molemo ha Dipaki di fa basebeletsi ba setjhaba tlhompho eo Bibele e reng Bakreste ba lokela ho ba fa yona.

13. Ke bo mang bao ka ho kgetheha re lokelang ho ba hlompha, hona hobaneng?

¹³ Re boetse re lokela ho hlompha Bakreste mmoho le rona, haholoholo ba re etellang pele. (Bala 1 Timothea 5:17.)  Re hlompha bara bao babo rona ho sa tsotellehe boemo ba bona ba ditjhelete, hore na ba tswa naheng efe, ba rutehile hakae kapa ba tumme hakae. Bibele e re ke “dimpho [tseo e leng] banna,” mme ke bona bao Modimo a ba kgethileng hore ba hlokomele ditlhoko tsa batho ba hae. (Baef. 4:8) Ba akareletsa baholo, balebedi ba potoloho, ditho tsa Komiti ya Lekala le tsa Sehlopha se Busang. Bakreste ba mehleng ya baapostola ba ne ba hlompha ba etellang pele mme le rona re etsa se tshwanang. Ha re rapele banna bao Mokgatlo o ba sebedisang ebile ha re ba bona ha re itshware jwalo ka ha eka re bona mangeloi. Leha ho le jwalo re a ba hlompha ka lebaka la mosebetsi wa bona o boima le boikokobetso boo ba bo bontshang.—Bala 2 Bakorinthe 1:24; Tšenolo 19:10.

14, 15. Badisa ba Bakreste ba nnete ba fapane jwang le baetapele ba madumedi a mang?

¹⁴ Baholo ke badisa ba ikokobeditseng le ba nang le kamano e ntle le Modimo. Kahoo, ha ba batle ho tshwarwa jwalo ka batho ba tummeng. Ha ba tshwane le baetapele ba madumedi a mehleng ena le a mehleng ya baapostola, bao Jesu a ileng a re ka bona: “Ba rata sebaka se hlaheletseng ka ho fetisisa dijong tsa shwalane le ditulo tse ka pele ka disynagogeng, le ditumediso dimmarakeng.”—Mat. 23:6, 7.

¹⁵ Kaha badisa ba Bakreste ba nnete ba ikokobeditse, ba mamela mantswe a Jesu ha a re: “Empa lona, le se ke la bitswa Rabi, kaha mosuwe wa lona o mong, athe lona bohle le bara ba motho. Ho feta moo, le se ke la bitsa mang kapa mang ntata lona lefatsheng, kaha Ntata lona o mong, wa lehodimo. Leha e le hore le bitswe ‘baetapele,’ kaha Moetapele wa lona o mong, Kreste. Empa e moholo hara lona e lokela ho ba mosebeletsi wa lona. Mang kapa mang ya iphahamisang o tla kokobetswa, mme mang kapa mang ya ikokobetsang o tla phahamiswa.” (Mat. 23:8-12) Ka lebaka leo bara le baradi babo rona lefatsheng lohle ba rata baholo ebile ba a ba hlompha.

16. Ke hobaneng ha re lokela ho ikitlaelletsa ho utlwisisa le ho sebedisa seo Bibele e se rutang mabapi le ho hlompha ba bang?

¹⁶ Ke nnete hore ho ka nna ha re nka nako e telele hore re kgone ho fa batho tlhompho e ba loketseng. Taba ena e ile ya etsahalla le Bakreste ba mehleng ya pele. (Lik. 10:22-26; 3 Joh 9, 10) Empa re lokela ho leka ka matla ho sebedisa seo re ithutang sona Bibeleng ha e bua  ka ho hlompha ba bang. Re tla rua molemo haeba re qoba ho hlompha ba bang ka tsela e feteletseng.

17. Re ka rua molemo jwang ka ho hlompha ba boholong?

¹⁷ Ha re hlompha ba boholong, ho ka etsahala hore ba re thuse ho sireletsa tokelo ya rona ya ho bolela ditaba tse molemo. Mme ba tla lemoha hore mosebetsi wa rona ke wa bohlokwa. Dilemong tse mmalwa tse fetileng, moradi wabo rona wa Germany wa pulamadiboho ya bitswang Birgit, o ile a ya moketeng wa sekolo sa moradi wa hae moo bana ba neng ba fuwa disetifikeiti. Matitjhere a ile a mo bolella hore ho theosa le dilemo, ha esale a thabela ho ruta bana ba Dipaki. Ba ile ba re ho ne ho ke ke ha eba monate sekolong haeba ho ne ho se na bana ba Dipaki. Birgit o ile a re, “Bana ba rona ba rutwa ho latela melao ya Modimo mabapi le boitshwaro le hore ba hlomphe matitjhere.” Titjhere e nngwe e ile ya re, “Haeba bana bohle ba ne ba tshwana le ba Dipaki, matitjhere a ne a tla natefelwa ke mosebetsi wa bona.” Dibeke tse mmalwa ka mora moo, e mong wa matitjhere ao o ile a ya kopanong e neng e tshwaretswe Leipzig.

18, 19. Ke hobaneng ha e le ha bohlokwa hore re hlomphe baholo ka tsela e ba loketseng?

¹⁸ Re lokela ho latela melaomotheo e Lentsweng la Modimo ha re bontsha tlhompho ho baholo ka phuthehong. (Bala Baheberu 13:7, 17.) Re ka ba babatsa bakeng sa mosebetsi o boima oo ba o etsang mme ra mamela tataiso eo ba re fang yona. Haeba re etsa jwalo ba tla thabela ho etsa mosebetsi wa bona. Empa sena ha se bolele hore re lokela ho etsisa ntho e nngwe le e nngwe eo moholo ya “itseng” a e etsang, ho akareletsa tsela eo a itokisang le ho apara ka yona le tsela eo a buwang ka yona ha a fana ka dipuo kapa a qoqa. Haeba re ka etsa jwalo re ka kgopisa moholo eo. Ha re a lokela ho lebala hore le yena ha a phethahala. Motho eo re lokelang ho mo etsisa ke Kreste.

¹⁹ Haeba re hlompha baholo ka tsela e loketseng mme re qoba ho ba tshwara jwalo ka batho ba tummeng, re a ba thusa. Re etsa hore ho be bonolo hore ba qobe leraba la ho ikgohomosa kapa hore ba ikutlwe ba phahame ho feta batho ba bang.

20. Ho hlompha ba bang ho re thusa jwang?

²⁰ Ho hlompha ba bang ho re thusa hore re se ke ra ikgohomosa, le hore re dule re ikokobeditse le ha ba bang ba re fa tlhompho e itseng. Ho boetse ho re thusa ho sebedisana le mokgatlo wa Jehova. O re thusang ho qoba ho fa batho tlhompho e feteletseng ebang ke Dipaki kapa ha se tsona. Ho feta moo, re fumana bohlale bo re thusang hore re qobe ho nyahamiswa ke batho bao re ba hlomphang haeba ba etsa dintho tse swabisang.

21. Ke molemo ofe wa bohlokwa oo re o fumanang haeba re hlompha batho bao tlhompho e ba loketseng?

²¹ Molemo o mong wa bohlokwa ke hore re tla thabisa Modimo haeba re hlompha batho bao tlhompho e ba loketseng. Re etsa seo a reng re se etse ebile re dula re mo tshepahalla. Mme ha re etsa jwalo re etsa ho re Modimo a arabe mang kapa mang ya mo qosang. (Liprov. 27:11) Lefatshe le tletse ka batho ba sa tsebeng ho hlompha ka tsela e loketseng. Re motlotlo hore e be re kgona ho hlompha ka tsela eo Jehova a batlang hore re hlomphe ka yona.