RE LOKELA ho sebetsa ka thata hore re be le kgotso, hobane re phela lefatsheng leo kgotso e leng leqeme. Esita le ha re na le kgotso ka tekanyo eitseng, ho thata hore e tshwarelle. Jwale, Bibele e ka re thusa jwang hore re be le kgotso ya moshwelella? Hona re ka thusa ba bang jwang hore le bona ba be le kgotso?

Re ka ba le kgotso ya sebele, ha feela re utlwa re sireletsehile ebile re le hantle maikutlong. Hape re lokela ho theha setswalle se matla le ba bang. Sa bohlokwa le ho feta, re lokela ho ba le kamano e haufi le Modimo, e le hore re be le kgotso e tshwarellang. Empa re ka etsa seo jwang?

Ha re hlompha melaomotheo le ditekanyetso tse lokileng tsa Jehova, re bontsha hore re a mo tshepa le hore re labalabela ho ba metswalle ya hae. (Jer. 17:7, 8; Jak. 2:22, 23) Ka lehlakoreng le leng, le yena o tla atamela ho rona mme a re hlohonolofatse ka kgotso ya kelello. Esaia 32:17 e re: “Mosebetsi wa ho loka ha nnete e tla ba kgotso; mme tshebeletso ya ho loka ha nnete, e be kgutso le tshireletseho ho isa nakong e sa lekanyetswang.” Re ka ba le kgotso ya kelello ka ho mamela Jehova ka pelo yohle.—Esa. 48:18, 19.

Ntho e nngwe e re thusang hore re be le kgotso, ke mpho e tswang ho Ntate wa rona, e leng moya o halalelang.—Lik. 9:31.

Moapostola Pauluse o thathamisitse kgotso e le ya boraro ho “ditholwana tsa moya.” (Bagal. 5:22, 23) Ka ha kgotso ke tholwana ya moya o halalelang, re lokela ho o dumella hore o sebetse ka hare ho rona. Ka hona, a re ke re hlahlobeng ditsela tse pedi tsa ka moo moya o halalelang, o ka re thusang kateng, hore re be le kgotso.

Ya pele, ho bala Bibele kamehla ho ka re thusa hore re be le kgotso. (Pes. 1:2, 3) Ha re ntse re nahanisisa ka seo re se badileng  Bibeleng, moya o halalelang o tla re thusa hore re utlwisise tsela eo Jehova a tadimang dintho ka yona. Ka mohlala, re tla bona ka moo a dulang a na le kgotso kateng le hore na ke hobaneng ha e le ya bohlokwa hakana ho yena. Ha re kenya seo re ithutang sona tshebetsong, re tla ba le kgotso bophelong ba rona.—Liprov. 3:1, 2.

Ya bobedi, re lokela ho rapella moya o halalelang. (Luka 11:13) Jehova o re tshepisa hore haeba re mo kopa thuso, “kgotso ya [hae] e fetang monahano ohle e tla lebela dipelo tsa [rona] le matla a [rona] a kelello ka Kreste Jesu.” (Bafil. 4:6, 7) Ha re itshetleha ka moya o halaleleng, Jehova o tla re fa kgotso ya kelello eo a e fang metswalle ya hae feela.—Bar. 15:13.

Batho ba bang ba ile ba sebedisa keletso ya Mangolo jwang, ho etsa diphetoho tse ileng tsa etsa hore ba be le kgotso le Jehova hammoho le ba bang?

Diphuthehong tsa Bokreste kajeno, ho na le batho ba neng ba ‘ineheletse bohale.’ Empa hona jwale ke batho ba nahanelang, ba mosa, ba nang le mamello le ba nang le kgotso le ba bang. * (Liprov. 29:22) Sena ke sona se ileng sa etsahalla bahweletsi ba bang ba babedi ba Mmuso, ba ileng ba thuswa ho hlola bohale mme ba bopa kgotso le ba bang.

David o ne a na le bothata ba ho buisa batho hampe. Pele a inehela ho Modimo, o ne a tumme ka ho tshwayatshwaya ba bang diphoso le ho bua puo e hlohlontshang ditsebe ha a bua le ba lelapa. Empa ha nako e ntse e ya, David o ile a bona ho hlokahala hore a fetohe mme e be motho ya ratang kgotso. Ho tlile jwang hore a be le kgotso? O re: “Ha ke qalella ho sebedisa melaomotheo ya Bibele bophelong ba ka, re ile ra hlomphana ka lapeng.”

Rachel o hodisitswe ka tsela e ileng ya etsa hore e be sefelapelwana. O re: “Le hona jwale, ke ntse ke thatafallwa ke ho ba bonolo, hobane ke holetse lelapeng la bontwa dumela.” Ebe o thusitswe keng hore a be le  kgotso le bohle? O di beha tjena: “Ho rapela le ho itshetleha ka Jehova e bile pheko.”

David le Rachel ke e meng ya mehlala e bontshang hore ha re sebedisa keletso ya Bibele ebile re itshetleha ka moya o halalelang, re ka ba le kgotso. Ho hlakile hore, ho sa tsotellehe hore na re phela hara batho ba kgopo hakae, re ka ba le kgotso ya kelello e re thusang hore re phele hamonate le malapa le Bakrestemmoho. Etswe Jehova o re kgothalletsa hore re “be le kgotso le batho bohle.” (Bar. 12:18) Empa na ehlile ho a kgonahala, hona re rua molemo ofe ha re etsa boiteko ba ho bopa kgotso?

Ha re ya tshimong, re fa batho monyetla wa hore le bona ba rue molemo molaetseng wa kgotso o mabapi le Mmuso wa Modimo. (Esa. 9:6, 7; Mat. 24:14) Re thabela hore ebe ba bangata ba ile ba mamela. Ka lebaka leo, ha ba sa nyotobeditswe ke ho nyahama kapa ho kwata nako e telele. Ho e na le hoo, hona jwale ba na le tshepo ya sebele ka bokamoso ebile ba susumelletseha ho batla ho fumana kgotso, le ho e phehella.—Pes. 34:14.

Le ha ho le jwalo, ha se batho bohle ba ratang molaetsa wa rona, haholoholo qalong. (Joh. 3:19) Ho ntse ho le jwalo, moya o halalelang o re thusa hore re ba bolelle ditaba tse molemo ka kgotso le tlhompho. Ha re etsa jwalo, re latela ditaelo tsa Jesu mabapi le tshebeletso, tse ho Matheu 10:11-13, e leng moo a reng: “Ha le kena ka tlung, le dumedise ba ntlo eo; mme haeba ntlo eo e tshwaneleha, kgotso ya lona eo le e lakaletsang yona e ke e be ho yona; empa haeba e sa tshwanelehe, kgotso e tswang ho lona e ke e kgutlele ho lona.” Ha re latela keletso ya Jesu, re tla phela ka kgotso re ntse re lebelletse hore motho o tla fetoha nakong e tlang.

Re boetse re bopa kgotso ha re bua ka tlhompo le ba boholong pusong, ho akarelletsa le ba hanyetsang mosebetsi wa rona. Ka mohlala, puso ya naheng e nngwe ya Africa, e ile ya hana ho fana ka tumello ya ho haha Holo ya Mmuso ka lebaka la kgethollo. Morabo rona e mong eo e neng e kile ya ba morumuwa moo, o ile a romelwa hore a ilo rarolla bothata boo mme a etsa seo ka kgotso. O ile a etela Mokomishinara e Moholo kwana London, England. O ne a lokela ho bolella ba boholong hore ha e le hantle Dipaki Tsa Jehova, di etsa mosebetsi wa tsona ka kgotso. Ho ile ha fella jwang?

O re: “Eitse ha ke fihla moo ho amohelwang baeti teng, ka bona ka moaparo feela hore motho enwa o bua puo eo nkileng ka ithuta yona pejana. Ka hoo, ka mo dumedisa ka yona. A hlolletswe, o ile a re: ‘Ebe o behwa keng moo?’ Yaba ke mo bolella hore ke kopa ho bona Mokomishinara e Moholo. Ke ha a mo letsetsa, mme a tla. A fihla a ntumedisa ka puo e neng e sebediswa moo. Ka mora moo, a mmamela ka hloko ha ke mo hlalosetsa hore Dipaki Tsa Jehova di etsa tshebeletso ya tsona ka kgotso.”

Tsela eo morabo rona enwa ya neng a bua ka tlhompho a ileng a hlalosetsa mokomishinara ka yona, e ile ya etsa hore a utlwisise mosebetsi wa rona hantle. Nakwana ka mora moo, mmuso wa naha eo ya Africa, o ile wa tlosa dithibelo. Barababo rona ba ile ba thaba hakaakang ka tlholo eo! Ka sebele, ho tshwara ba bang ka tlhompho ho tlisa melemo e mengata, jwalo ka kgotso.

Bahlanka ba Jehova kajeno, ba thabela paradeise ya tshwantshetso e renang kgotso. Le wena o ka kgatha tema e kgolo ka ho sebetsa ka thata ho bopa kgotso, e leng tholwana ya moya wa Modimo. Ka hodima tsohle, Jehova o tla o amohela mme o fumane kgotso ya moshwelella lefatsheng le letjha la hae.—2 Pet. 3:13, 14.