Jobo 42:1-17
42 Jobo a araba Jehova a re:
2 “Joale kea tseba hore u khona ho etsa lintho tsohleEbile ha ho na ntho e ka u hlolang.+
3 U itse: ‘Ke mang eo ea senyang merero ea ka a se na tsebo?’+
Kahoo, ke ile ka bua ka lintho tse hlollang haholoEmpa ke ne ke sa li utloisise ebile ke sa li tsebe.+
4 U ile oa boela oa re: ‘Ke kopa u ’mamele ha ke bua.
Ke tla u botsa lipotso ’me uena u nkarabe.’+
5 Ke ile ka utloela ka uenaEmpa hona joale ke u bona ka mahlo a ka.
6 Ke kahoo ke hulang mantsoe a ka.*+
Ke bile ke lula leroleng le moloreng ho bontša hore ke bakile.”+
7 Ha Jehova a qeta ho bua mantsoe ana ho Jobo, Jehova a re ho Elifaze oa Motemane:
“Uena le metsoalle+ ea hao e ’meli le nkhalefisitse hobane ha lea bua ’nete ka ’na,+ ke mohlanka oa ka Jobo feela ea e buileng.
8 E-eang ho mohlanka oa ka Jobo le nkile lipoho tse supileng le liramo tse supileng ’me le iketsetse sehlabelo sa secheso. Mohlanka oa ka Jobo o tla le rapella.+ Ke tla mamela thapelo ea hae* ’me nke ke ka le fa kotlo ka lebaka la booatla ba lona. Ha lea bua ’nete ka ’na, ke mohlanka oa ka Jobo feela ea e buileng.”
9 Elifaze oa Motemane, Bildade oa Moshuha le Tsofare oa Monaama ba tsamaea ’me ba etsa seo Jehova a ba laetseng sona. Ka mor’a moo, Jehova a araba thapelo ea Jobo.
10 Ha Jobo a qeta ho rapella metsoalle ea hae,+ Jehova a tlosa mathata a hae+ a ba a etsa hore a atlehe hape.* Jehova a atisa lintho tseo a neng a e-na le tsona pele ka makhetlo a mabeli.+
11 Bana babo kaofela le metsoalle eohle ea hae ea pele+ ba ea ho eena ho ea ja le eena ntlong ea hae. Ba ile ba mo utloela bohloko ba ba ba mo tšelisa ka lebaka la mathata ’ohle ao Jehova a neng a lumelletse hore a mo hlahele. Kaofela ha bona ba mo fa chelete le reng ea khauta.
12 Jehova a hlohonolofatsa Jobo ho feta pele.+ Jobo a ba le linku tse 14 000, likamele tse 6 000, likhomo tse 2 000* le litonki tse tšehali tse 1 000.+
13 O ile a boela a ba le bara ba bang ba supileng le barali ba bang ba bararo.+
14 Morali oa hae oa pele a mo reha Jemima, oa bobeli a mo reha Kezia ’me oa boraro a mo reha Keren-hapuke.
15 Naheng eo eohle ho ne ho se na basali ba batle joaloka barali ba Jobo ’me ntate oa bona o ile a ba fa lefa hammoho le bana ba bo bona.
16 Ka mor’a moo, Jobo o ile a phela lilemo tse 140 ’me a bona bana ba hae le litloholo tsa hae. Kaofela ha bona e ne e le meloko e mene.
17 Qetellong, Jobo o ile a shoa, a phetse nako e telele a bile a thabetse bophelo.
Linaletsana
^ Kapa: “khutlisang.”
^ Ka Seheberu: “Ke tla phahamisa sefahleho sa hae.”
^ Ka Seheberu: “Jehova a tlosa botlamuoa ba Jobo.”
^ Ka Seheberu: “likhomo tse 1 000 tse pannoeng ka bobeli.”
