Moeklesia 12:1-14
12 U hopole ’Mopi oa hao e Moholo u sa le mocha,+ pele matsatsi a mahlomola*+ a tla kapa ho fihla lilemo tseo u tla re: “Ha ke li thabele.”
2 Pele letsatsi, leseli, khoeli le linaleli li fifala+ ’me maru a khutla ka mor’a hore ho ne* pula ea litloebelele.
3 Pele letsatsi le fihla leo ka lona balebeli* ba ntlo ba thothomelang, pele banna ba matla ba fokolloa ke matla le basali ba khaotsa ho sila hobane ba fokotsehile le pele bafumahali ba bona ho le lefifi ha ba nyarela ka lifensetere.+
4 Pele menyako e seterateng e koaloa, molumo oa leloala o fokotseha, pele motho a tsoha ha a utloa molumo oa nonyana le libini tsohle tsa basali li sa utloahale hantle.+
5 Pele motho a tšaba moo ho phahameng ’me a tšaba hore ho kotsi seterateng. Pele sefate sa almonde se thunya,+ lerutle le ikhulanya le monokotšoai o phatloha hobane motho a ea ntlong eo a tla phomola nako e telele ho eona+ ’me ba utloileng bohloko ba itsamaela seterateng.+
6 Pele thapo ea silevera e tlosoa, sekotlolo sa khauta se silakanngoa, pele nkho e selibeng e pshatleha le lebili la seliba le silakanngoa.
7 Ebe lerole le khutlela mobung+ moo le tsoang teng le matla a bophelo* a khutlela ho Molimo oa ’nete ea faneng ka ’ona.+
8 Mosuoe o re: “Lefeela la mafeela!+ Ntho e ’ngoe le e ’ngoe ke lefeela.”+
9 Mosuoe o ne a le bohlale hape a lula a ruta batho lintho tseo a li tsebang.+ O ne a nahanisisa le ho hlahlobisisa e le hore a bokelle maele a mangata.*+
10 Mosuoe o ile a batlisisa mantsoe a monate+ a ba a ngola mantsoe a ’nete a nepahetseng.
11 Mantsoe a ba bohlale a tšoana le litsenene tsa likhomo+ le maele a bona a tšoana le lipekere tse kokotetsoeng ka thata ’me a tsoa ho molisa a le mong.
12 Mabapi le ntho leha e le efe ntle le tsena, mora oa ka, hlokomela: Batho ba tla lula ba ntse ba ngola libuka tse ngata ’me ho li bala haholo ho tepeletsa ’mele.+
13 Ha ntho e ’ngoe le e ’ngoe e se e utloiloe, qetello ea taba ke ena: Hlompha* Molimo oa ’nete+ ’me u mamele litaelo tsa hae+ etsoe ke eona ntho eo motho a lokelang ho e etsa.+
14 Etsoe Molimo oa ’nete o tla ahlola batho ka liketso tsohle tsa bona esita le lintho tsohle tse patiloeng ’me a etse qeto ea hore na li ntle kapa li mpe.+
Linaletsana
^ Kapa: “tlokotsi.”
^ Kapa mohlomong: “a khutla le.”
^ Kapa: “bahlokomeli.”
^ Kapa: “moea.” Sheba Tlhaloso.
^ Kapa: “a hlophise maele a mangata ka tatellano.”
^ Kapa: “Tšaba.”
