KA 1933, barab’abo rōna ba ile ba lokisetsa hore seea-le-moea sa Jakarta se hase lipuo tse rekotiloeng tsa Senyesemane tsa Mor’abo rōna Rutherford. Ho ne ho boetse ho e-na le monna e mong ea thahasellang ho ithuta Bibele ea neng a bala lipuo tse ling ka Sedache seea-le-moeeng. Sena se ile sa etsa hore batho ba bangata ba rate ho ithuta Bibele, ’me barab’abo rōna ba ile ba tsamaisa lingoliloeng tse ngata.

Baruti ba K’hatholike ba ile ba halefa haholo ha seea-le-moea se hasa puo e matla ea Mor’abo rōna Rutherford, e nang le sehlooho se reng, “Phello ea Selemo se Halalelang sa Khotso le Katleho.” * Ba ile ba sebelisa mahlahana a bona hore Mor’abo rōna De Schumaker, ea ileng a isa lirekoto tseo a qosoe ka hore “ke moetselletsi, ke mosomi ebile o na le lehloeo.” Mor’abo rōna De Schumaker o ile a leka ka matla ho itšireletsa, empa a ahloleloa hore a lefe li-guilder tse 25 * le litšenyehelo tsa lekhotla. Likoranta tse tharo tse tsebahalang li ile tsa ngola ka nyeoe eo, e leng se ileng sa etsa hore batho ba bangata ba tsebe Lipaki.

Ka la 15 July, 1935, sekepe sa Mokhatlo oa Watch Tower se bolelele ba limithara tse 16 se bitsoang Lightbearer se ile sa fihla Jakarta, ka mor’a hore se nke likhoeli tse tšeletseng ho tloha Sydney, Australia. Se ne se palamisitse bo-pula-maliboho ba chesehang ba supileng ba neng ba ikemiselitse ho phatlalatsa litaba tse molemo Indonesia, Singapore le Malaysia.

 Ba ile ba qeta lilemo tse fetang tse peli ba ntse ba etela metse le metsana ea Indonesia, ’me ba tsamaisa lingoliloeng tse ngata tsa Bibele. Jean Deschamp o re: “Ha re fihla metsaneng, re ne re bapala lipuo tsa Mor’abo rōna J. F. Rutherford, eo e neng e le mopresidente oa Mokhatlo oa Watch Tower, ka sebuela-hōle. U ka inahanela hore na batho ba lulang metsaneng e arohaneng ea Malay ba ne ba makala hakaakang ha ba bona sekepe se seholo se fihla, ’me ba se ba utloa le lentsoe le matla. E ne eka ke mohlolo!

Kaha barab’abo rōna ba ne ba bolela ka sebete, seo se ile sa halefisa baruti, eaba ba susumetsa ba boholong hore ba thibele sekepe sa Lightbearer ho kena metseng e mengata ea Indonesia. Ka December 1937, sekepe sa Lightbearer se ile sa khutlela Australia, se thusitse barab’abo rōna ho etsa mosebetsi o tsoileng matsoho oa ho bolela litaba tse molemo Indonesia.