Ka Labohlano la la 5 July, 2013, lelapa la Bethele la United States le ile la thaba ha Anthony Morris oa Sehlopha se Busang a etsa tsebiso ena: “Ka Labone la la 4 July, 2013 ho ile ha fihleloa qeto ea ho rekisa mehaho e tšeletseng e akarelletsang 117 Adams Street le 90 Sands Street, Brooklyn. Ha re rekisa Mohaho oa 1 ho ea ho oa 5 re tlameha re be re tsoile ho eona bohareng ba August selemong sona sena.”

Mor’abo rōna Morris o ile a re Lefapha la ho Hlatsoa Liaparo le la Dry Cleaning, le mokatong oa 6 le oa 7 Mohahong oa 3, le tla tsoela pele ho sebetsa ho fihlela bohareng ba 2014. O ile a re ba lulang “mohahong oa 90 Sands Street, ba ka ’na ba tsoa selemong sa 2017.”

 Morero oa ho rekisa mehaho ena e meholo e tšeletseng ke hore ho tlosoe ntlo-khōlō ea Lipaki Tsa Jehova New York City e isoe setšeng sa lihekthere tse 102 se Warwick, New York. Leha ho le joalo, mosebetsi oa ho lokisetsa ho haha le ho cheka o ne o ke ke oa tsoela pele ho fihlela ho fumanoe li-permit.

Ka lebaka leo, lelapa la Bethele la United States le ile la mamela ka tjantjello tsebiso e ileng ea baloa ke Mark Sanderson oa Sehlopha se Busang ka Labone la la 18 July, e neng e re: “Re thabela ho le tsebisa hore mantsiboeeng a Laboraro la la 17 July, Warwick Planning Board (Boto ea Meralo ea Warwick) e ile ea amohela lipolane tsa setša se secha sa ntlo-khōlō ea Lipaki Tsa Jehova. Tumello ena ke ea ho qetela ho tse re lokollang hore re qale ho fumana li-permit tsa ho qala mosebetsi oa ho haha. Hoa thabisa ho bona hore tumello e entsoeng mantsiboeeng a fetileng e fihlile hantle ka mor’a lilemo tse ’nè re rekile setša sena sa Warwick. Ho feta moo, liketsahalo tsa matsatsing a ’maloa a fetileng tse entseng hore re fumane tumello ena ke bopaki bo matla ba tlhohonolofatso ea Jehova.” Mor’abo rōna Sanderson o ile a leboha bohle ka boikitlaetso ba bona le lithapelo tseo ba li etsang ba sa khaotse lebitsong la morero ona oa bohlokoa. A re: “Ho feta bohle, re rorisa Jehova ’me rea mo leboha ka bohato bona ba bohlokoa ba ho fumanela ntlo-khōlō ea rōna sebaka se secha Warwick, New York.”

Ka Labohlano la la 26 July, Mor’abo rōna Morris o ile a kopana le baithaopi ba 1 000 ba Bethele le ba Komiti ea Kaho ea Lebatooa ba neng ba bokane ntlong ea ho jela e  ncha e Tuxedo, New York e haufi le Warwick, e leng moo mosebetsi oa kaho o laoloang teng. Ka mor’a ho fana ka puo e khothatsang, o ile a re ho na le tsebiso eo a lokelang ho e etsa. A re: “Letsohong mona ke tšoere foromo eo ke qetang ho e fumana eo ke batlang ho le bolella litaba tsa eona. Sehlooho sa eona se re: ‘Permit ea ho Haha.’” Le pele a bala ho ea pele, baithaopi ba ile ba opa mahofi. Bohle ba neng ba le moo ba ile ba thaba ha Mor’abo rōna Morris a bala likarolo tsa tumello ea pele ea ho haha, eo ba boholong motseng oa Warwick ba neng ba fane ka eona lihora tse tharo pele ho moo.

Ho tloha ha mosebetsi oa ho atolosa Wallkill o qala ka August 2009, bara le barali babo rōna ba ka bang 2 800 ba ne ba sebetsa e le baithaopi ba nakoana. Mosebetsi ona o akarelletsa ho haha mohaho o mocha oa bolulo, oa liofisi le sebaka sa ho paka likoloi. Ho ntse ho nchafatsoa mohaho o mong oa bolulo, sebaka sa khatiso, sa ho hlatsoetsa liaparo, holo, mohaho oa litšebeletso le moo ho amoheloang baeti. Ho lebeletsoe hore mosebetsi oa ho atolosa o tsoele pele ho fihlela qetellong ea 2015.

Ka nako e tšoanang, ho ile ha qalisoa mosebetsi oa kaho Warwick, e leng moo ntlo-khōlō e tla ba teng. Likhoeling tse ’maloa tseo ho qaliloeng ka tsona, mosebetsi oa ho potiela, oa ho cheka le oa ho kenya liphaephe o ne o ntse o tsoela pele. Mosebetsi oa kaho ea mehaho ea pele e meraro—e leng Mohaho oa Tokiso ea Likoloi, Sebaka sa ho Paka Likoloi Tsa Baeti le sa Tlhokomelo ea Mehaho—o qalile ka 2013. Mehaho ena ke ea bohlokoa haholo bakeng sa ho hlokomela thepa le batho ba sebetsang mohahong, nakong ea kaho le ka mor’a eona. Ho tla latela mosebetsi oa kaho ea libaka tsa bolulo le Mohaho  oa Liofisi le Tšebeletso, oo ho lokiselitsoeng hore o qale ka 2014.

Kenneth Chernish eo e leng setho sa Komiti ea Morero oa Kaho, o re mehahong ea Tuxedo, e setšeng se boholo ba lihekthere tse 20 ’me e le bohōle ba lik’hilomithara tse ka bang 10 ka leboea ho Warwick, “ho tla etsoa mesebetsi e tšehetsang ntlo-khōlō ea Warwick. Ho tla lula basebetsi ba bang ba baithaopi, ’me lijo tsa bona le thepa li tla behoa hona moo.” E le hore ho potlakisoe kaho ea Tuxedo, ho na le Likomiti Tsa Kaho tsa Mabatooa tse karolong e ka bochabela ea United States tse ’nileng tsa thusa ka mosebetsi o mong.

Baithaopi ba bangata ba sebetsang le Likomiti Tsa Kaho Tsa Mabatooa tsa United States ba lebella ka tjantjello hore ba kenye letsoho kahong ea ntlo-khōlō. Bara le barali babo rōna ba nang le bokhoni ba se ba ntse ba itlhahisa e le hore ba tl’o sebetsa ka nakoana libakeng tsena tsa kaho. Leslie Blondeau, ea sebetsang le monna oa hae Peter Lefapheng la Liphaephe Tsa Tsamaiso ea Metsi o re, “Ho sebetsa hammoho hoa re momahanya ’me ho etsa hore re be le liphihlelo tseo re ke keng ra li lebala.”

Mallory Rushmore o re: “Hona joale ke sebetsa le sehlopha sa motlakase sa Tuxedo. Letsatsi le leng le le leng rea thaba ha re bona barab’abo rōna ba sebetsa hammoho le baithaopi.”

Quincy Dotson o re: “Ho sebetsa mona ke tlotla e fetisisang! Ke ne ke nahana hore ke tla bolaoa ke mosebetsi, empa ha e le hantle, ke ’na ea ruileng molemo o moholo.”

Mor’abo rōna Chernish o re: “Ho monate ho sebetsa mona. Bara le barali babo rōna ba sebetsa ka potlako, ka makhethe ba bile ba thabile haholo.”