Hlophisa Lintho Tsa Hao Hantle
Boiteko bo bonyenyane boo motho a bo etsang hore a hlophisehe bo ka mo tsoela molemo haholo—a ka ba le nako e eketsehileng, a fokotsa khatello ea kelello ’me a pasa hantle.
AK’U nahane u kena ka lebenkeleng e le hore u reke ntho e itseng, empa ha u kena u fumana lintho li kopa-kopane, li sa lula ka tlhophiso. Ho tla u nka nako e kae hore u fumane ntho eo u e batlang? Na u ne u ke ke ua e fumana habonolo haeba lintho li ne li hlophisitsoe ka makhethe le lishelefo li ngotsoe ka ho hlaka? U ka etsa ka tsela e tšoanang le ka lintho tsa hao tsa sekolo. Joang?
Etsa kemiso.
Zachary ea lilemo li 18 ea lulang United States o re: “Ka le leng ke ile ka lebala ho etsa mosebetsi oa sekolo o etsetsoang lapeng—’me ka hlokomoloha le mesebetsi eo ke neng ke lokela ho e etsa lapeng hobane ke ne ke etetse habo motsoalle oa ka mafelong a beke. Ka Mantaha ke ile ka lokela ho kōpa matichere a ka hore a ntumelle ho tlisa mosebetsi oa ka ka mor’a nako. Hona joale ke ngola lintho tseo ke lokelang ho li etsa, e leng se nthusang hore ke li hopole.”
Ho ngola lintho ho boetse ho thusitse mosali e mong oa Papua New Guinea ea bitsoang Celestine. Ha a nahana ka nako ea ha a sa le sekolong, o re: “Ke ne ke lula ke etsa kemiso ea mesebetsi eohle ea ka, e akarelletsang mosebetsi oa sekolo o etsetsoang lapeng, litlhahlobo le linako tsa ho ea boithabisong. Ho etsa sena ho ne ho nthusa hore ke tsebe hore na lintho tsa bohlokoa ke life le ho li etsa esale ka nako.”
Tlhahiso: Ngola lintho tseo u lokelang ho li etsa bukaneng kapa u li boloke selefounong ea hao kapa sesebelisoeng leha e le sefe sa elektronike.
U se ke ua chechisa ho etsa lintho.
Ho bonolo ho re, “Ke tla e etsa hamorao.” Ho molemo ho etsa lintho kapele kamoo u ka khonang—haholo-holo mosebetsi oa hao oa sekolo o etsetsoang lapeng.
Tlhahiso: Itloaetse ho etsa mosebetsi oa hao oa sekolo o etsetsoang lapeng hang ha u fihla hae, pele u bula TV kapa u ikhatholla.
Hlophisa lintho tseo u li sebelisang.
Na ho kile ha etsahala hore ha u fihla ka tlelaseng u hlokomele hore u lebetse pene kapa libuka hae? U ka qoba mathata a joalo! Ka tsela efe? Mohlankana e mong oa Myanmar, ea bitsoang Aung Myo Myat o re: “Ke ne ke tloaetse ho kenya lintho tsa ka ka mokotleng oa sekolo esale nako.”
Tlhahiso: Boloka mokotla oa hao oa sekolo o le makhethe ebile o hlophisehile e le hore u ka fumana lintho habonolo.
Ntlha ea bohlokoa: Ho hlophiseha ho tla u thusa hore u qobe mathata a ho lebala lintho, ho siuoa ke nako le ho se be le nako e lekaneng ea ho etsa lintho tse ling tsa bohlokoa.
Ke hobane’ng ha u sa qale hona joale? Nahana ka karolo e ’ngoe eo u lokelang ho hlophiseha ho eona. Ka mor’a moo, buisana le motsoali kapa motsoalle ka lintho tseo u ka li etsang e le hore u ntlafatse boemo ba hao.
Mohlomong u ka Rata le
BACHA BAA BOTSA
U ka Khaotsa Joang ho Lieha ho Etsa Lintho?
Fumana likeletso tsa kamoo u ka khaotsang ho lieha ho etsa lintho!
TSOHA!
Kamoo U ka Sebelisang Nako ea Hao ka Bohlale
Tsela e ’ngoe e molemo eo u ka sebelisang nako ea hao hantle ka eona, ke ka ho hlahloba bophelo ba hao u nahanne ka lintlha tse peli. Ke life?
