Haeba u ntse u batla molekane oa lenyalo, ha ho letho le phoso ka ho lebella hore a be le litšobotsi tse boletsoeng leqepheng le fetileng. Mohlomong u ka ba ua fumana motho ea nang le tsona kaofela. Leha ho le joalo, ’nete ke hore ha nako e ntse e ea batho baa fetoha—’me maemo le ’ona aa fetoha.

Ntlha ea bohlokoa: E le hore u be le lenyalo le atlehileng, u lokela ho lebella seo u sa nahaneng hore se ka etsahala.

Litaba tse monate. Lintho tse ling tse etsahalang lenyalong u sa li lebella, e ka ba tse thabisang.

“Kaha joale re se re nyalane, ke talima metlae ea Maria * ka tsela eo ho seng mohla nkileng ka e utloisisa ha re ne re le leferehong. Kahobane ha rea tiisa ’mele haholo, esita le mathata ao re tobanang le ’ona a bonahala a se maholo hakaalo.”—Mark.

Litaba tse seng monate hakaalo. Lintho tse ling tse etsahalang lenyalong tseo u sa li lebellang e ka ba tse bosula. Nahana ka mohlala ona.

Nka hore uena le motho eo u tla nyalana le eena le na le pakane ea ho etsa mosebetsi oa boromuoa naheng e ’ngoe. Empa u ka etsa’ng haeba ka mor’a lenyalo molekane oa hao a ka kula haholo hoo le ke keng la khona ho finyella pakane ea lōna? Ka sebele, seo se ka etsahala kaha Bibele e bolela hore “lintho tse mpe li etsahalla motho e mong le e mong!” (Moeklesia 9:11, Holy Bible—Easy-to-Read Version) Ntle ho pelaelo, u ne u tla utloisoa bohloko ke boemo ba molekane oa hao—ebile u ne u tla nyahama ka lebaka la ho se khone ho finyella pakane ea lōna. Leha ho le joalo, haeba ho ne ho ka hlaha boemo bo joalo bo sa lebelloang, u ne u tla lokela ho bo amohela ebe u ikamahanya le bona. Etsoe u nyalane le motho eo, eseng le pakane.

Ntlha ea bohlokoa: Joalokaha Bibele e bontša, ba kenang lenyalong ba tla ba le “matšoenyeho” a itseng. (1 Bakorinthe 7:28) Ka linako tse ling, matšoenyeho ao a hlahisoa ke maemo a sa lebelloang.

U ka itokisetsa maemo a sa lebelloang joang? Haeba u kena lenyalong, u tla lokela ho etsa lintho tse peli.

Ho sa tsotellehe hore na le tšoanelana hakae le motho eo u tla nyalana le eena, le lokela ho lebella hore

• le ke ke la lumellana linthong tsohle kamehla.
• le ke ke la etelletsa pele lintho tse tšoanang kamehla.
• le ke ke la thabela ho etsa lintho tse tšoanang kamehla.
• le ke ke la utloa le ratana ka matla ka linako tsohle.

Maemo a kang ana a thathamisitsoeng ka holimo, a tloaelehile. Empa a ke ke a senya lenyalo la lōna ntle le ha le a lumella! Hopola hore Bibele e re lerato “le mamella lintho tsohle” hape “ha le fele le ka mohla.”—1 Bakorinthe 13:4, 7, 8.

Seo e leng ’nete bophelong: Qetellong, hase mathata ao u tobanang le ’ona a tla matlafatsa kapa a senye lenyalo la lōna empa ke tsela eo le sebetsanang le ’ona ka eona.—Bakolose 3:13.

Haeba uena le molekane oa hao le ikemiselitse ho lula ’moho ho sa tsotellehe hore na ho etsahala’ng, le tla atleha ho hlōla mathata ao le sa a lebellang.—Matheu 19:6.

Ba bang ba bolela hore ho tšepahalla molekane ho etsa hore lenyalo e be moroalo. Empa ha e le hantle, ho etsa se fapaneng. Ho tšepahalla molekane oa hao ho etsa hore kamano ea lōna e tsitse. Ha ho hlaha maemo ao le sa a lebellang, uena le molekane oa hao le tla batla ho fumana tharollo, eseng monyetla oa ho tsoa lenyalong.

Hore le tšepahallane, le tla lokela ho nahana ka lenyalo ka tsela e hlakileng, ho e-na le ho nahana ka lintho tseo e seng tsa sebele. E le ho bontša phapang, ak’u leke ho etsa se latelang.

1. Ak’u nke hore u fuoe tekete ea mahala ea sefofane hore u ee kae kapa kae moo u batlang lefatšeng. U ne u tla khetha ho ea hokae, hona hobane’ng?

Sebaka:

Lebaka:

• botle ba sebaka
• mokhoa oa bophelo
• maemo a leholimo
• boithabiso
• tse ling

2. Ak’u nke hore tekete eo ke ea ho ea feela, le hore sebakeng seo u eang ho sona ke moo u tla lula teng kamehla.

Joale u ne u tla khetha ho ea sebakeng sefe—haeba se teng?

• Sebaka:
• kapa Ke ne ke tla lula moo ke ntseng ke le hona teng.

Papisong e ka holimo, sebaka sa pele seo u khethileng ho ea ho sona se ka ’na sa fapana le sa bobeli. Esita le haeba u khethile sebaka se tšoanang, mohlomong u ile ua tlameha ho nahana ka tsela e fapaneng ha u khetha sebaka sa bobeli. Ho e-na le ho nka hore u motho ea ileng phomolong, ea robileng monakeli lebōpong la leoatle kapa ea ikhathollang ka ho hloa lithaba, u ile ua tlameha ho nahana hore u mojaki ea fumanang melemo le ea tobanang le mathata a letsatsi le letsatsi.

Ke eona tsela eo u lokelang ho nahana ka eona ka lenyalo. Etsoe, ha nako e ntse e feta, maemo a ka ’na a fetoha. Ka ho tšoanang, ha ho pelaelo hore uena le molekane oa hao le tla fetoha. Hore na u atleha hakae lenyalong, ho tla itšetleha ka bokhoni ba hao ba ho lebella lintho tseo u sa nahaneng hore li ka etsahala le ho sebetsana le tsona ha li hlaha.

Seo u ka nahanang ka sona: Hona joale, ha u ntse u le lesoha, u sebetsana joang le maemo a sa lebelloang?