Ngoan’a hao ea lilemo li tšeletseng oa u botsa o re, “Na le uena u tl’o shoa ka letsatsi le leng?” U makalitsoe ke potso ea hae, ua ipotsa: ‘Na ngoan’a ka o se a hōlile ka ho lekaneng hore a ka utloisisa karabo ea ka? Nka buisana le eena joang ka lefu?’

Bana ba nahana ka lefu. Ba bang ba bile ba bapala lipapali tseo ho tsona ho bang le ea iketsang eka o shoele. Kahoo, u se ke ua qoba ho bua ka lefu ’me u lokela ho lumella ngoan’a hao hore a u botse lipotso leha e le life tseo a nang le tsona ka lona. Ha ka linako tse ling u bua ka lefu, u thusa ngoan’a hao hore a sebetsane le bohloko ba ho hlokahalloa ke motho eo a mo ratang.

Ho bua ka lefu ho ke ke ha etsa hore ngoan’a hao a nahane ka lintho tse tšosang. Ho e-na le hoo, ho tla mo thusa hore a se ke a ba le tšabo. Leha ho le joalo, ho ka ’na ha hlokahala hore u lokise tsela e fosahetseng eo a nahanang ka eona. Ka mohlala, litsebi tse ling li re bana ba bangata ba lilemo tse ka tlaase ho tse tšeletseng ha ba nke lefu e le qetello. Ha ba bapala, ngoana e mong a ka iketsa eka o shoele hona joale, ebe ka mor’a nakoana oa phela hape.

Empa ha ba ntse ba hōla, bana ba ka ’na ba utloisisa kamoo lefu le tebileng kateng—e leng ntho e ka ’nang ea etsa hore ba be le lipotso, ba ngongorehe, kapa ba be le tšabo, haholo-holo haeba ho hlokahetse motho eo ba mo ratang. Kahoo, ke habohlokoa hore le buisane ka taba ena. Marion Haza, e leng setsebi sa mafu a kelello, o re: “Ngoana a ka tšaba lefu haholo haeba a nahana hore ha a lumelloa ho bua ka lona ka lapeng.”

Ha ua lokela ho tšoenyeha haholo ka hore na u tla re’ng. Ho ea ka phuputso e ’ngoe, bana ba mpa ba batla “ho bolelloa ’nete ka tsela e mosa.” Kholiseha hore hangata ngoana a ke ke a botsa potso ntle leha a itokiselitse ho utloa karabo.

Sebelisa menyetla e hlahang e le hore u bue ka lefu. Haeba ngoan’a hao a bona nonyana e shoeleng seterateng kapa haeba phoofolo ea lapeng eo a e ratang e shoa, u ka sebelisa lipotso tse bonolo ho mo khothalletsa hore a ntše maikutlo. Ka mohlala, u ka mo botsa: “Na phoofolo e shoeleng e utloa bohloko? Na ea hatsela kapa ea lapa? U bona ka eng hore phoofolo kapa motho o shoele?”—Molao-motheo oa Bibele: Moeklesia 3:1, 7.

U se ke ua pata ’nete. Ha motsoalle kapa mong ka lōna a hlokahala, qoba ho sebelisa mantsoe a ferekanyang bana a kang, “O re siile.” Ka phoso ngoan’a hao a ka ’na a etsa qeto ea hore haufinyane motho eo o tla khutlela lapeng. Ho e-na le hoo, sebelisa mantsoe a bonolo le a tobileng. Ka mohlala, u ka ’na ua re: “Ha Nkhono a shoa, litho tsohle tsa ’mele oa hae li ile tsa khaotsa ho sebetsa. Re ka se hlole re bua le eena, empa re ke ke ra mo lebala.”—Molao-motheo oa Bibele: Baefese 4:25.

Kholisa ngoan’a hao. A ka ’na a nahana hore ntho eo a e entseng kapa eo a e nahanneng ke eona e bolaileng motho eo. Ho e-na le hore u re hase eena ea mo bolaileng, u ka ’na ua mo botsa, “Ke eng e etsang hore u nahane joalo?” Mo mamele ka hloko u sa khelle maikutlo a hae fatše. Hape, kaha ngoana e monyenyane a ka ’na a nahana hore lefu lea tšoaetsana, mo kholise hore o sireletsehile.

Khothalletsa ngoan’a hao hore a ntše maikutlo. Bua ka bolokolohi ka baratuoa ba lōna ba seng ba hlokahetse, ho akarelletsa le beng ka lōna ba hlokahetseng pele ngoan’a hao a hlaha. U ka ’na ua mo phetela lipale tse qabolang ka rakhali, malome, ntate-moholo, kapa nkhono oa hae. Ha u bua ka bolokolohi ka batho bao, u thusa ngoan’a hao hore a utloisise hore ha ho hlokahale hore a tšabe ho bua ka bona kapa ho nahana ka bona. Leha ho le joalo, u se ke ua mo qobella hore a bue ka lefu. U ntse u ka bua ka taba eo neng-neng ha u nahana hore ke nako e loketseng.—Molao-motheo oa Bibele: Liproverbia 20:5.