Litsebi tsa molao tsa Chaena li re bana e ba mahlatsipa a ho hlekefetsoa ka thobalano haeba batsoali ba sa buisane le bona ka eona ha ba sa le banyenyane. Lilemong tse ’nè tse fetileng ho bile le linyeoe tse ka bang 8 000 tsa tlhekefetso ea bana ka thobalano, Chaena. Setsebi se seng sa molao sa Beijing Normal University se re kaha bana “ha ba tsebe ho itšireletsa, ba hlekefetsoa habonolo. Ho ba ruta ka thobalano ho ka ba thusa hore ba se ke ba hlekefetsoa.”

SEO BIBELE E SE BUANG: Batsoali ba bohlale ba ruta bana ba bona ka litsela tsa ho itšireletsa “ho motho ea buang lintho tse khelohileng.”—Liproverbia 2:1, 10-12.

Phuputso e ’ngoe e bontša hore kakaretso ea masea a Philippines a banana a shoang selemo ka mor’a leholiotsoana, e feta hōle palo ea batho ba bolailoeng ke leholiotsoana ka bolona. E ka ’na eaba sena se bakoa ke tlhokahalo ea mesebetsi ka mor’a leholiotsoana, litšenyehelo tsa ho haha hape esita le tsela eo liphallelo li abeloang masea a banana ka eona ho akarelletsa lijo le meriana.

SEO BIBELE E SE BUANG: ‘Le arolele ea lapileng bohobe, le hore le tlise batho ba hlorileng, ba hlokang mahae ka matlung a lōna. . . . Haeba le bona ea hlobotseng, le mo apese.’—Esaia 58:7.

Ka 2011, har’a batho ba ipolaileng Korea Boroa, ba fetang kotara e ne e le batho ba lilemo li 65 kapa ho feta. Bafuputsi ba bang ba re sena se bakoa ke hore batho ba ba hlokomelang ha ba ba tšoare hantle le hore ha ba na chelete e lekaneng hore ba itlhokomele—hoo e ka bang halofo ea maqheku a Korea Boroa a lula libakeng tse futsanehileng. Batho ba ka tlaase ho halofo ea baahi ba Korea Boroa ba se ba bona ho le molemo hore bana ba hlokomele batsoali ba bona ba tsofetseng.

SEO BIBELE E SE BUANG: “Hlompha ntat’ao le ’m’ao.”—Baefese 6:2.