MEHLENG ea ha ho ne ho ngoloa Bibele, mosebetsi oa motsamaisi e ne e le ho hlokomela ntlo kapa thepa ea motho e mong. Lentsoe la Seheberu le la Segerike le fetoletsoeng e le “motsamaisi,” ka linako tse ling le ne le bolela molebeli kapa mohlokomeli oa ntlo.

Ha Josefa mora oa Jakobo e ne e le lekhoba Egepeta, e ile ea e-ba motsamaisi oa ntlo ea mong’a hae. Ha e le hantle, mong’a Josefa o ile a “tlohela ntho e ’ngoe le e ’ngoe ea hae matsohong a Josefa.” (Gen. 39:​2-6) Hamorao ha Josefa a se a e-na le matla Egepeta, o ile a batla monna ea okamelang ntlo ea hae.​—Gen. 44:4.

Mehleng ea Jesu, hangata beng ba masimo ba ne ba lula litoropong hole le masimo a bona. Kahoo, ba ne ba batla batho ba ka ba hlokomellang masimo letsatsi le letsatsi le hore ba bone hore basebetsi ba etsa mosebetsi hantle.

Motsamaisi e ne e lokela ho ba motho ea joang? Mongoli e mong oa Moroma oa mehleng ea baapostola ea bitsoang Columella o ile a re haeba lekhoba le ne le ka khethoa hore ebe molebeli kapa motsamaisi “le ne le lokela hore ebe le tseba mosebetsi hantle.” E ne e lokela ho ba motho “ea etsang bonnete ba hore basebetsi ba etsa mosebetsi hantle empa a sa ba hatelle.” O ile a phaella ka hore ntho ea bohlokoa ka ho fetisisa ka motsamaisi ke hore a se ke a nahana hore o tseba ntho e ’ngoe le e ’ngoe empa a labalabele ho ithuta ho tseba lintho.

Lentsoe la Molimo le sebelisa mohlala oa motsamaisi ha le bua ka lintho tse ling tse lokelang ho etsoa ka phuthehong ea Bokreste. Ka mohlala, moapostola Petrose o ile a khothalletsa Bakreste ho sebelisa makhabane a bona “ho sebeletsaneng joaloka batsamaisi ba khabane ba mosa o sa tšoanelang oa Molimo.”​—1 Pet. 4:10.

Jesu le eena o ile a bua ka mohlala oa motsamaisi ha a etsa papiso e ho Luka 16:​1-8. Ho ekelletsa moo, boprofeteng bo neng bo bua ka hore e tla ba Morena, Jesu o ile a tiisetsa balateli ba hae hore o tla khetha “lekhoba le tšepahalang le le masene” kapa “motsamaisi ea tšepahalang.” Mosebetsi o ka sehloohong oa motsamaisi eo ke ho fa balateli ba Kreste lijo tsohle tseo ba li hlokang nakong ena ea bofelo. (Mat. 24:​45-47; Luka 12:​42) Re ananela haholo hore ebe re fumana lijo tse matlafatsang tumelo tse hlophisitsoeng ke motsamaisi ea tšepahalang ea etsang hore li fumanehe lefatšeng lohle.