’MINO o ne o le bohlokoa haholo setsong sa Iseraele. Hangata Bibele e bua ka batho ba binang le ba letsang liletsa tsa ’mino. Ha e le hantle, karolo e kholo ea Bibele ke lipina. Ka mohlala, Lipesaleme, Sefela sa Lifela le Lillo Tsa Jeremia ke lipina. Buka ea Music in Biblical Life e bontša hore Bibele e bua ka ’mino e le karolo ea bohlokoa bophelong ba letsatsi le letsatsi ba Baiseraele.

Bophelong ba letsatsi le letsatsi. Baiseraele ba ne ba bina e le ho bontša kamoo ba ikutloang kateng. (Esa. 30:29) Meketeng basali ba ne ba letsa meropa e menyenyane, ba bina ba thabile ba bile ba tantša. Mekete ena e ne e akareletsa mekete ea borapeli, ha ho behoa morena e mocha le ha masole a hlotse ntoeng. (Baahl. 11:34; 1 Sam. 18:​6, 7;1 Mar. 1:​39, 40) Baiseraele ba ne ba boetse ba bina ha ba siame. (2 Likron. 35:25) Ho ea ka McClintock and Strong’s Cyclopedia ho hlakile hore “Baheberu ba ne ba rata ’mino haholo.”

Ntlong ea borena. Marena a Iseraele a ne a rata ’mino haholo. Morena Saule o ile a bitsetsa Davida ntlong ea borena hore a tl’o mo letsetsa harepa. (1 Sam. 16:​18, 23) Ha Davida e e-ba morena o ile a iketsetsa liletsa tsa ’mino, a qapa lipina a boela a theha sehlopha sa ’mino se neng se bina tempeleng ea Jehova. (2 Likron. 7:6; Amose 6:5) Morena Solomone le eena o ne a e-na le libini tsa banna le basali ntlong ea hae ea borena.—Moek. 2:8.

Borapeling. Habohlokoa le ho feta, Baiseraele ba ne ba rorisa Jehova ka pina. Ha e le hantle, ho ne ho e-na le banna ba 4 000 ba neng ba letsa liletsa tsa ’mino tempeleng Jerusalema. (1 Likron. 23:5) Ba ne ba letsa lisimbala, liletsa tsa likhoele, liharepa le literompeta. (2 Likron. 5:12) Banna bana ba rupetsoeng, e ne e se bona feela ba rorisang Jehova ka ’mino. Baiseraele ba bangata ba ne ba bina lipina ha ba le leetong la selemo le selemo le eang moketeng Jerusalema. (Pes. 120-134) Ho latela libuka tsa Bajuda, Baiseraele ba ne ba bina Lipesaleme tsa Hallel a nakong ea Paseka.

’Mino e ntse e le karolo ea bohlokoa ho batho ba Molimo. (Jak. 5:13) Re bina lipina ho rorisa Jehova. (Baef. 5:19) ’Mino o etsa hore re ikutloe re le haufi le Bakreste-’moho le rona. (Bakol. 3:16) O boetse oa re matlafatsa ha re e-na le mathata. (Lik. 16:25) ’Mino o re thusa ho bontša Jehova hore rea mo rata ebile re lumela ho eena.