E KA BA lilemo tse 800 batho ba morabe oa Maori ba se ba tsamaile leeto la lik’hilomithara tse likete ba tšela leoatle ba ea naheng ea New Zealand. Ha ba fihla moo, ba fumane naha ena e fapane hole le lihlekehleke tse mongobo tsa Polynesia tseo ba tsoang ho tsona. New Zealand e na le matamo a metsi a chesang, lehloa le lithaba tse phoroselang metsi. Batho ba bang ba lulang New Zealand ba fihlile lilemo tse 500 hamorao ba tsoa Europe. Mehleng ena baahi ba New Zealand ba phela ka setso se tsoakaneng sa meetlo ea Jeremane, Brithani le Polynesia ’me karolo e kholo ea bona e phela litoropong. Motse-moholo oa New Zealand ke Wellington ’me ke motse o ka boroa ho feta metse eohle e teng lefatšeng.

 Le hoja New Zealand e le thoko le linaha tse ling, e ipabola ka ho eteloa ke bahahlauli ba ka bang limilione tse tharo ka selemo ka lebaka la botle ba eona.

E boetse e ikhetha ka ho ba le mefuta e fapaneng ea liphoofolo tse hlaha. Ho ekelletsa moo, ke teng moo ho fumanoang mokholutsoane o ka phelang lilemo tse 100 o bitsoang tuatara. Liphoofolo tsa naheng eo tse anyesang li fokola haholo ka palo. Li akareletsa bo-’mankhane, leruarua le tlhapi e bitsoang dolphin.

Lipaki Tsa Jehova li ’nile tsa tsoela pele li bolela molaetsa oa Bibele hoo e ka bang ka lilemo tse 120 naheng eo. Li bolela ka lipuo tse ka bang 19 tsa Polynesia tse akareletsang Seniue, Serarotong, Sesamoa le Setonga.