Ha motho a e-na le boikarabello u ka mo tšepa. Haeba u mo file mosebetsi, o tla o etsa hantle a be a o qete ka nako.

Esita le ngoana e monyenyane a ka ithuta ho ba le boikarabello le hoja a se na matla a makaalo. Buka ea Parenting Without Borders e re: “Ngoana o ithuta ho mamela batsoali ba hae ha a e-na le selemo le likhoeli tse peli ebe ha a e-na le selemo le likhoeli tse hlano teng o khona ho etsa lintho tseo batsoali ba hae ba li etsang. Litsong tse ngata batsoali ba qala ho ruta bana ba bona ho etsa mesebetsi ea lapeng ha ba le lipakeng tsa lilemo tse hlano le tse supileng. Bana ba ka khona ho etsa mesebetsi eo hantle le hoja ba sa le banyenyane.”

Libakeng tse ling bacha ba tloha lapeng hore ba il’o lula ba le bang empa e re ha mathata a ba hloa setha ba khutlele hae. Hangata mabaka a etsang hore ba khutle ke hobane ba sa rutoa ho sebelisa chelete hantle kapa ba sa rutoa ho hlokomela lelapa.

Taba ena e bontša hore ho bohlokoa ho thusa ngoana oa hao e le hore a be le boikarabello ha a se a le moholo. Buka ea How to Raise an Adult e re: “U se ke oa tloaetsa bana ba hao hore ebe uena ea ba etsetsang ntho e ’ngoe le e ’ngoe e re ha ba le lilemo li 18 oa ba tlohella hore ba ipone.”

Ba fe mesebetsi ea lapeng.

MOLAO-MOTHEO OA BIBELE: “Ka mofuta o mong le o mong oa ho sehla ho ba le molemo.”​—Liproverbia 14:23.

Bana ba banyenyane ba rata ho sebetsa le batsoali ba bona. U ka sebelisa monyetla ona ka hore u fe bana ba hao mesebetsi ea lapeng.

Batsoali ba bang ha ba rate ha bana ba bona ba sebetsa. Ba re bana ba bona ba na le mosebetsi o mongata oa sekolo joale ha ba batle hore ba ba ekeletse mesebetsi e meng.

Leha ho le joalo, hangata bana ba etsang mesebetsi ea lelapa baa pasa sekolong hobane mesebetsi eo e ba ruta ho qeta mosebetsi oo ba o filoeng. Hape buka ea Parenting Without Borders e re: “Kaha bana ha ba sa le banyenyane ba rata ho sebetsa, haeba batsoali ba sa ba fe mesebetsi, bana ba ka qetella ba nka ho thusa batho ba bang e se ntho ea bohlokoa . . . Ebile ba ka lebella hore batho ba bang ebe bona ba ba etsetsang lintho.”

 Joalokaha buka eo e bontša, ha bana ba fuoa mesebetsi ea lelapa, taba eo e tla ba ruta hore ba thuse batho ba bang ho e-na le hore ba lebelle ho etsetsoa ntho e ’ngoe le e ’ngoe. Mesebetsi ea lelapa e thusa bana hore ba utloe e le karolo ea lelapa, le hore ha ba sa e etse ha ho na motho ea tla ba etsetsa eona.

Thusa bana ho tseba hore liphoso li na le liphello.

MOLAO-MOTHEO OA BIBELE: “Mamela keletso ’me u amohele taeo, e le hore u ka hlalefa bokamosong ba hao.” ​—Liproverbia 19:20.

Haeba ngoana oa hao a entse phoso, u se ke oa mo sireletsa. Mohlala, haeba a sentse ntho ea motho e mong, u se ke oa mo pata bohlasoa. Ho e-na le hoo, mo rute ho amohela molato ka hore mohlomong a kope tšoarelo kapa a patale ntho eo a e sentseng.

Haeba u thusa ngoana oa hao hore a bone liphoso tsa hae a be a li amohele, u tla be u mo thusa:

• hore a tšepahale a be a ipone molato

• hore a se ke a beha batho ba bang molato ka lebaka la liphoso tsa hae

• hore a se ke a ikemela

• ho kopa tšoarelo